Айцішніцу з мяцежнага дома запрасілі ў паліклініку — доктар адпусціў праз 2 хвіліны, а на выхадзе міліцыя забрала на 15 сутак

Кацярына Жылінская — 24-гадовая айцішніца, жыве ў «мяцежным» доме на Прытыцкага, 97.

Жыхары ўпрыгожваюць двор у белы і чырвоны колеры, замянілі лямпачкі на пляцоўках, якія выходзяць на вуліцу, каб атрымліваўся бела-чырвона-белы сцяг падсветкі.

Многія жыхары дома прайшлі праз суткі, іх забіралі проста з вуліц. А вось Жылінскую затрымалі вельмі нетыпова і, выглядае, са спрыяннем медыкаў.

Са словаў блізкай сяброўкі і калегі Наталлі, Кацярына хварэла на каранавірус і была дома ў ізаляцыі больш за два тыдні.

Бальнічны сканчаўся ў аўторак. Раніцай Кацярына пайшла ў паліклініку №31 на Бурдзейнага, каб закрыць бальнічны, закрыла і вярнулася дадому. Пасля чаго ёй пазванілі з паліклінікі і папрасілі зайсці яшчэ раз разам з бальнічным — нібыта засталіся нейкія дакументы і пытанні, якія забылі вырашыць першы раз.

«Як потым Каця казала на судзе, у паліклініцы доктар літаральна дзве хвіліны пакруціў у руках яе бальнічны і вярнуў ёй, яна паціснула плячыма і пайшла дадому, а на выхадзе з паліклінікі да яе падышлі супрацоўнікі міліцыі і забралі ў РУУС. Яна перапытала, ці затрыманне гэта, ёй адказалі што не, «проста размова», — расказала Наталля.

З аддзялення міліцыі дзяўчына ўжо не выйшла.