Славенія пачала выдаваць беларусам пашпарты іншаземца
27 сакавіка стала вядома, што беларуская сямʼя атрымала славенскі пашпарт замежніка (Potni list za tujca) для свайго 9-гадовага сына. Гэта першы вядомы выпадак атрымання беларусам такога дакумента ў Славеніі, паведамляюць «Народныя амбасады Беларусі».
Пасля падпісання Лукашэнкам указа №278, які забараняе пасольствам Беларусі выдаваць пашпарты, Народная амбасада Беларусі ў Славеніі падрыхтавала інструкцыю пра атрыманне пашпарта іншаземца. Умовамі для атрымання дакумента з'яўляецца наяўнасць дазволу на жыхарства і немагчымасць атрымаць пашпарт сваёй краіны.
«Разумеючы, што тэрмін дзеяння пашпарта сына заканчваецца ў чэрвені 2024 года, а ехаць у Беларусь небяспечна, мы звярнуліся ў адміністрацыйную адзінку, якая па законе аб замежніках адказвае за выдачу пашпартоў. Першапачаткова цяжкасці ўзніклі з-за недасведчанасці супрацоўніка, які накіраваў нас у МЗС. Ведаем, што іншым беларусам адмовілі, бо тэрмін іх беларускага пашпарта яшчэ не скончыўся. Пасля звароту ў МЗС Славеніі мы атрымалі адказ з інфармацыяй аб працэдуры выдачы пашпарта замежніка, і пасля новага звароту атрымалі цягам тыдня пашпарт на 2 гады»,
— падзялілася сваім досведам беларуска з Славеніі.
Са свайго боку Народная амбасада Беларусі ў Славеніі падрыхтавала запыты ў МЗС, МУС і Упраўленне адміністрацыйнымі адзінкамі з просьбай праясніць працэдуру, у прыватнасці каб пазбегнуць часовага разрыву ў дзеянні дакументаў і прызнаваць небяспечнасць вяртання ў Беларусь дастатковай падставай немагчымасці атрымання пашпарта на фоне ўказу №278.
«У Славеніі жыве больш за 400 беларусаў і беларусак. Паводле апытання сярод беларускай дыяспары, з праблемай пратэрмінаваных беларускіх пашпартоў у найбліжэйшыя два гады сутыкнуцца прынамсі 20 чалавек. У працэсе вырашэння цяпер пытанне дакументаў для дзяцей, народжаных у Славеніі»,
— пракаментавала сітуацыю з пашпартамі прадстаўніца Народнай амбасады Беларусі ў Славеніі Аляксандра Мамаева.
Чытайце таксама:
З лета можна будзе ўзяць грамадзянства Германіі, не адмаўляючыся ад беларускага
Швецыя будзе выдаваць пашпарты замежніка беларусам з пратэрмінаванымі дакументамі
Кавалеўскі адказаў на восем гарачых пытанняў пра пашпарт Новай Беларусі
