Бутэлька прасэка ў рэстаране — 210 даляраў. Вядучая БТ распавяла пра кошт адпачынку ў Катары
Адпачынак у Катары, рэкламуюць турфірмы, гэта як у Дубаі, але больш танна. Колькі ж каштуе правесці там водпуск, распавяла ў сваім інстаграме вядучая тэлеканала «Беларусь-5» Марыя Багатыр.
Марыя Багатыр. Фота: яе інстаграм
Разам с сяброўкай Марыя выбрала небанальны кірунак для пляжнага водпуску і паляцела ў сталіцу арабскай дзяржавы Катар — горад Доха, які размешчаны ля ўзбярэжжа Персідскага заліва.
Пасялілася тэлеведучая ў пяцізоркавым Sheraton Grand Doha Resort & Convention Hotel. Гатэль сапраўды шыкоўны. Ён размешчаны на ўласным пляжы з відам на Персідскі заліў. У распараджэнні гасцей сем рэстаранаў, у якіх падаюць стравы блізкаўсходняй, італьянскай і азіяцкай кухні. Таксама гасцям сервіруюць тэматычны «шведскі стол». А ў рэстаране на даху гатэля, адкуль адкрываецца маляўнічы від на Персідскі заліў, гасцям прапануюць стравы арабскай кухні.
Скрыншот сторыс у інстаграме Марыі Багатыр
Ёсць плавальны басейн з рэгуляванай тэмпературай вады, тэнісныя корты, пляцоўкі для гульні ў сквош і трэнажорная зала з сучасным абсталяваннем.
Марыя распавяла падпісчыцам, што алкаголь у Катар правезці ніяк не атрымаецца, на месцы набыць таксама даволі складана — прадаецца ён толькі ў некаторых рэстаранах і гатэлях. Цэны пры гэтым уражваюць. У якасці прыклада вядучая новага сезона шоу «Героі» на БТ прывяла цэны на кактэйль «Піна калада» (33 еўра) і бутэльку Bottega Prosecco (210 даляраў).
Скрыншот сторыс у інстаграме Марыі Багатыр
Падзялілася яна і сваімі ўражаннямі наконт таго, як жанчыне можна апранацца ў гэтай арабскай краіне:
— У клубы дзяўчаты апранаюцца, як і ў нас. На вуліцы ніхто наперакос не глядзіць, калі калені не закрытыя. Але я і не злоўжываю голымі вобразамі.
Чым жа заняцца ў горадзе Доха? Марыя наведала вядомы аквапарк Merya, дзе можна скаціцца з горкі вышынёй з 28-павярховы дом. Схадзіла на шопінг у самы вялікі гандлёвы цэнтр City Centre Doha Mall, дзе можна набыць рэчы такіх сусветна вядомых брэндаў як «Луі Вітон», «Гучы» і «Дыёр».
Даведаўшыся, што ў Досе якраз праходзіць чэмпіянат Азіі па футболе U23, Марыя наведала адзін з матчаў на Jassim Bin Hamad Stadium:
— Не наша «Барысаў-Арэна», але ўсё роўна сімпатычненька.
Скрыншот сторыс у інстаграме Марыі Багатыр
Дык колькі ж каштуе адпачыць у Катары? Ад прамога адказу на гэтае пытанне падпісчыц Марыя сышла. Яна вырашыла агучыць лічбы ад турфірмы, якая арганізоўвала ёй адпачынак.
— Мінімальная цана на адпачынак у гарадскім гатэлі 4 зоркі — 822 даляры (без харчавання) — для турыстаў, якія плануюць шмат і самастойна глядзець горад. Са сняданкамі ў 4-зоркавым гатэлі — 1041 даляр. Паўпансіён — 1260 даляраў. Гэта цана за дваіх і вылеты бліжэйшыя. Наш казачны гатэль на сёння каштуе: са сняданкамі 2598 даляраў, паўпансіён — 3319 даляраў.
Згодна з данымі booking.com, толькі за тое, каб адпачыць 9 начэй у маі ў Sheraton Grand Doha Resort & Convention Hotel, трэба заплаціць 4188 даляраў (уключаны толькі сняданкі) ці 5150 даляраў (уключаны сняданкі, абеды і вячэры).
Адна з турыстычных фірм, якія прадаюць беларусам туры ў Катар, распавяла ў тыктоку, што з 22 сакавіка была адноўлена палётная праграма і цяпер з Мінска ў Доху можна даляцець менш чым за 6 гадзін. Праўда, не атрымаецца самастойна вырашыць, колькі працягнецца твой адпачынак. Усе туры разлічаны на 9 начэй.
Чытайце таксама:
«Я, можа, і не магу паехаць у ваш засраны Парыж…» Лебедзеву зусім не бамбіць у адпачынку
Беларусам прапаноўваюць адпачыць на адным з Карыбскіх астравоў. Віза непатрэбная, але хапае нюансаў
Беларусам прапаноўваюць ляцець загараць зімой у Кітай. Кірунак называюць самым даступным
