НІШО будзе! З’явіўся адкрыты слоўнік беларускага слэнгу, які можа дапоўніць кожны
Актывісты стварылі анлайн-слоўнік «НІШО», у якім, паводле задумы, будуць збірацца сучасныя беларускія словы, слэнг гарадскіх і сельскіх супольнасцяў, прафесійны жаргон, а таксама старыя словы, якія набываюць новы сэнс у сучасным кантэксце.
НІШО: Твая мова — твае правілы
Праект стварыў актывіст Міхаіл Волчак са сваёй невялікай валанцёрскай камандай дызайнераў і праграмістаў. Ідэя ўзнікла восенню 2022 года на першым хакатоне digital-рашэнняў «Культурны код», які праводзіўся Беларускай радай культуры і Imaguru Startup HUB Vilnius.
Слова «Нішо», якое ўзята ў якасці назвы слоўніка, на заходнепалескім дыялекце азначае «нешта». Яно выбрана, відаць, невыпадкова, бо сам Волчак займаўся пчалярствам у палескай вёсцы.
У адрозненне ад іншых слоўнікаў, ствараць яго будуць не лінгвісты ці прафесійныя літаратары, а простыя людзі: адмыслоўцы ў розных галінах, падлеткі, блогеры, журналісты, наогул любы, хто штодзённа карыстаецца мовай. Каб пачаць дадаваць словы, дастаткова проста зарэгістравацца. Тым не менш каманда шукае гіка-лінгвіста, які дапаможа праекту ў зборы слоў і мадэрацыі кантэнту.
Прыклад слоўнікавага азначэння
Як тлумачыць стваральнік сайта, «слэнг можа быць прафесійны, гарадскі, узроставы, рэгіянальны, сельскі, субкультурны, наогул [кажучы], любы, якому, вы лічыце, варта быць у беларускай мове».
«Ваша мова — вашы правілы. І тады дакладна нішо будзе!» — тлумачаць стваральнікі сайта.
Падобныя праекты існуюць і для іншых моў. Найбольш вядомы — анлайн-слоўнік моладзевых слоў і фраз англійскага слэнгу Urban Dictionary, створаны яшчэ ў 1993 годзе, які змяшчае больш за сем мільёнаў слоўнікавых азначэнняў. Матэрыялы на ім таксама рэдагуюцца валанцёрамі і ацэньваюцца наведвальнікамі сайта.
1. каб, для таго каб;