Колішняга кіраўніка «Антымайдан Мінск» асудзілі на 15 сутак за ўдзел у маршы за перамены
24-гадовы Іван Ус быў асуджаны 2 кастрычніка за ўдзел у нядзельным маршы 16 жніўня. Пра гэта «Нашай Ніве» расказаў ягоны бацька, былы палітвязень і кандыдат у прэзідэнты Дзмітрый Ус.
Так Іван Ус пазіцыянаваў сябе ў інтэрнэце
«1 кастрычніка да Івана дадому на Нававіленскую вуліцу прыйшло пяць чалавек у масках. Гэта ўсё адбывалася а 7-й ранку, — расказвае Дзмітрый Ус. — Разам з ім быў сябар, а таксама дзяўчына. Калі дзяўчыну адпусцілі, мы даведаліся, што хлопцаў павезлі ў Цэнтральнае РУУС».
На наступны дзень Іван Ус быў прысуджаны да 15 сутак зняволення, а ягоны сябар Аляксей Гацко — да 13. Пакаранне хлопцы адбываюць на Акрэсціна.
«Судзілі іх за ўдзел у маршы 16 жніўня. На сына ўжо другі пратакол, першы быў за ўтварэнне затораў на Нямізе 21 жніўня, тады далі штраф», — расказвае Дзмітрый Ус.
Іван Ус набыў вядомасць колькі гадоў як адміністратар суполкі «УКантакце» — «Антымайдан Мінск», ён планаваў правесці ў сталіцы Беларусі з’езд «Антымайдана», але адмовіўся ад ідэі з прычын бяспекі. У інтэрнэце існуе відэа пра тое, як анархісты і фанаты «Партызана» злавілі Уса і правялі размову. Пасля гэтага актыўнасць хлопца знізілася.
Дзмітрый Ус таксама выказваў прыхільнасць да «рускага свету». Ці змяніліся ў яго і сына погляды ў сувязі з апошнімі падзеямі?
«Можа, і памяняю сваю пазіцыю. Бо бачу, што ўсё гэтае беззаконне ў нас адбываецца праз Расію і Пуціна. З сынам на гэтую тэму не гаварыў, але думаю, што і ён зробіць пераацэнку каштоўнасцяў».
Да маршаў пратэсту Дзмітрый Ус ставіцца станоўча: «Яны павінны быць, у людзей скралі іх волю, іх галасы. Гэтая ўлада трымаецца толькі праз падтрымку Расіі».
Дзмітрый Ус быў кандыдатам у прэзідэнты на выбарах 2010 года, за ўдзел у Плошчы прысуджаны да 5,5 гадоў зняволення, але не прабыў у калоніі і года. Ус — уласнік друкарскага бізнэсу, ягоны сын працуе памочнікам у бацькі.
