Kolišniaha kiraŭnika «Antymajdan Minsk» asudzili na 15 sutak za ŭdzieł u maršy za pieramieny
24-hadovy Ivan Us byŭ asudžany 2 kastryčnika za ŭdzieł u niadzielnym maršy 16 žniŭnia. Pra heta «Našaj Nivie» raskazaŭ jahony baćka, były palitviazień i kandydat u prezidenty Dźmitryj Us.
Tak Ivan Us pazicyjanavaŭ siabie ŭ internecie
«1 kastryčnika da Ivana dadomu na Navavilenskuju vulicu pryjšło piać čałaviek u maskach. Heta ŭsio adbyvałasia a 7-j ranku, — raskazvaje Dźmitryj Us. — Razam ź im byŭ siabar, a taksama dziaŭčyna. Kali dziaŭčynu adpuścili, my daviedalisia, što chłopcaŭ pavieźli ŭ Centralnaje RUUS».
Na nastupny dzień Ivan Us byŭ prysudžany da 15 sutak źniavoleńnia, a jahony siabar Alaksiej Hacko — da 13. Pakarańnie chłopcy adbyvajuć na Akreścina.
«Sudzili ich za ŭdzieł u maršy 16 žniŭnia. Na syna ŭžo druhi pratakoł, pieršy byŭ za ŭtvareńnie zatoraŭ na Niamizie 21 žniŭnia, tady dali štraf», — raskazvaje Dźmitryj Us.
Ivan Us nabyŭ viadomaść kolki hadoŭ jak administratar supołki «UKantakcie» — «Antymajdan Minsk», jon płanavaŭ pravieści ŭ stalicy Biełarusi źjezd «Antymajdana», ale admoviŭsia ad idei z pryčyn biaśpieki. U internecie isnuje videa pra toje, jak anarchisty i fanaty «Partyzana» złavili Usa i praviali razmovu. Paśla hetaha aktyŭnaść chłopca źniziłasia.
Dźmitryj Us taksama vykazvaŭ prychilnaść da «ruskaha śvietu». Ci źmianilisia ŭ jaho i syna pohlady ŭ suviazi z apošnimi padziejami?
«Moža, i pamianiaju svaju pazicyju. Bo baču, što ŭsio hetaje biezzakońnie ŭ nas adbyvajecca praz Rasiju i Pucina. Z synam na hetuju temu nie havaryŭ, ale dumaju, što i jon zrobić pieraacenku kaštoŭnaściaŭ».
Da maršaŭ pratestu Dźmitryj Us stavicca stanoŭča: «Jany pavinny być, u ludziej skrali ich volu, ich hałasy. Hetaja ŭłada trymajecca tolki praz padtrymku Rasii».
Dźmitryj Us byŭ kandydatam u prezidenty na vybarach 2010 hoda, za ŭdzieł u Płoščy prysudžany da 5,5 hadoŭ źniavoleńnia, ale nie prabyŭ u kałonii i hoda. Us — ułaśnik drukarskaha biznesu, jahony syn pracuje pamočnikam u baćki.
