Śpiecnazy Biełarusi
Amal kožny viedaje, što jość śpiecnaz va Uruččy, Marjinaj Horcy, Minsku, jość hrupy «Alfa» i «Ałmaz». Ale mała chto viedaje, čym adroźnivajucca pamiž saboj hetyja struktury, chto imi kiruje, što ŭvachodzić u ich funkcyi. «NN» prapanuje karotki ahlad asnoŭnych śpiecpadraździaleńniaŭ.
Amal kožny viedaje, što jość śpiecnaz va Uruččy, Marjinaj Horcy, Minsku, jość hrupy «Alfa» i «Ałmaz». Adnak mała chto viedaje, čym adroźnivajucca pamiž saboj hetyja struktury, chto imi kiruje, što ŭvachodzić u ich funkcyi. NN prapanuje karotki ahlad asnoŭnych biełaruskich śpiecpadraździaleńniaŭ.
Uručanskaja bryhada śpiecnaza
Treciaja asobnaja Čyrvanaściažnaja bryhada śpiecnaza (v/č 3214, Uručča) była sfarmavanaja ŭ 1990‑ia hady na bazie 334 pałka 120‑j dyvizii. Jana padrychtavanaja jak dla razhonu vuličnych akcyj, tak i dla ŭdziełu ŭ śpiecyjalnych apieracyjach. Heta ŭdarnaja častka Unutranych vojsk. Jaje kolkaść blizu 1500‑2000 čałaviek. U składzie častki niekalki padraździaleńniaŭ — bataljony śpiecyjalnaha pryznačeńnia, Śpiecyjalny atrad chutkaha reahavańnia (SOBR) i padraździaleńni zabieśpiačeńnia.
Asnoŭnymi zadačami bryhady źjaŭlajucca baraćba z teraryzmam, dziejańni pry ŭźniknieńni nadzvyčajnych situacyj, bajavaja padrychtoŭka na vypadak uźniknieńnia vajennaj niebiaśpieki.
U mirny čas bajcy bryhady vykonvajuć funkcyi pa achovie hramadskaha paradku. Časta pradstaŭniki bryhady vyjazdžajuć na zadańni i za miežy Minska. Naprykład, achoŭvajuć «Słavianski bazar».
Padčas vuličnych akcyj apazicyi ŭručanskuju bryhadu zvyčajna trymajuć na padstrachoŭcy. Ich vykarystoŭvajuć tolki ŭ krajnich vypadkach, kali z demanstrantami nie moža spravicca PMSP. Niekalki razoŭ bajcy Paŭličenki byli zaŭvažanyja padčas minułych prezidenckich vybaraŭ.
Sam Paŭličenka, budučy kamandziram bryhady, nieadnarazova zajaŭlaŭ, što starajecca vychoŭvać bajcoŭ u «duchu pravasłaŭja». Na terytoryi častki jość chram.
Vielmi vialikaje značeńnie advodzicca bajavoj padrychtoŭcy, jana ŭ razy bolš žorstkaja, čym u inšych vajskovych častkach. U prahramie — akrabatyka, rukapašny boj, siłavaja padrychtoŭka, atletyčnaja himnastyka, krosy. Vielmi vialikaje značeńnie nadzialajecca stralbie z roznych vidaŭ zbroi, a taksama taktyčna‑śpiecyjalnaj padrychtoŭcy pa dziejańniach u roznych situacyjach.
Varta adznačyć, što bolšaść šarahovych bajcoŭ znachodzicca ŭ bryhadzie hod ci paŭtara. Heta zvyčajny termin słužby ŭ vojsku.
Mienavita Paŭličenka fihuravaŭ u spravach Zacharanki i Hančara — pakul tyja spravy rasśledavaŭ KDB. U 2000 hodzie Łukašenka adstaviŭ staršyniu KDB Mackieviča i hienprakurora Bažełku, i ŭsio ŭstała.
PMSP = AMAP
Minski połk milicyi śpiecyjalnaha pryznačeńnia byŭ sfarmavany vosieńniu 2005 hoda, niezadoŭha da prezidenckich vybaraŭ. PMSP byŭ stvorany na bazie AMAPa, i ŭznačaliŭ jaho Jury Padabied. Jak tłumačyŭ tahačasny načalnik HUUS Minharvykankama Anatol Kulašoŭ (siońniašni ministr unutranych spravaŭ), hałoŭnaja meta stvareńnia pałka zaklučałasia ŭ achovie hramadskaha paradku ŭ čas praviadzieńnia roznych masavych akcyj.
Pa jahonych słovach, bajcy hetaha padraździaleńnia pavinny być padrychtavanymi da kataklizmaŭ, katastrofaŭ, avaryj pryrodnaha i technahiennaha charaktaru. Treciaj pryčynaj Kulašoŭ nazvaŭ toje, što stvareńnie pałka daść mahčymaść inšym supracoŭnikam milicyi vykonvać svaje niepasrednyja abaviazki. Supracoŭniki pałka nosiać formu čornaha koleru. Mienavita jany ŭ asnoŭnym udzielničali ŭ razhonie vuličnych akcyj, u tym liku Płoščy.
PMSP byŭ stvorany z asabistaj prośby Juryja Padabieda, jaki skardziŭsia na toje, što ŭ krainie ŭvieś čas rasła kolkaść mierapryjemstvaŭ, jakim patrebnaja była achova. Našmat byŭ pavialičany i štat.
Ciapier kiruje PMSP Alaksandr Łukomski. Jon skončyŭ Leninhradskaje vyšejšaje palityčnaje vučylišča ŭnutranych vojskaŭ (1992), Akademiju milicyi (1998), kamandna‑štabny fakultet Vajennaj akademii (2002). Da hetaha ŭznačalvaŭ staličnuju milicejskuju bryhadu ŭnutranych vojskaŭ (v/č 5448).
Marjina Horka
Pad Minskam, u Marjinaj Horcy (Puchavicki rajon), isnuje 5‑aja asobnaja bryhada śpiecyjalnaha pryznačeńnia. Ale heta nie Unutranyja vojski. Marjinahorski śpiecnaz adnosicca da Ministerstva abarony.
Farmavańnie bryhady pačało adbyvacca ŭ 1962 hodzie.
Za savieckimi časami bajcy dasiahnuli ŭzroŭniu padrychtoŭki, jaki adpaviadaŭ atradu «Vympieł» KDB SSSR. Bajcy z Marjinaj Horki prymali aktyŭny ŭdzieł u afhanskim kanflikcie. Praz dva hady paśla vyvadu adtul desantniki z Marjinaj Horki znoŭ trapili na vajnu. Amal całkam bryhada (805 čałaviek) pad kamandavańniem pałkoŭnika Baradača znachodzilisia ŭ Armienii.
31 śniežnia 1992 hoda byłyja savieckija śpiecnazaŭcy prysiahnuli na viernaść Biełarusi. Asnoŭnymi nakirunkami padrychtoŭki siońniašnich bajcoŭ u častcy źjaŭlajecca dyviersijnaja dziejnaść i vyviedka. Vyviedčykaŭ vučać pieraadolvać bałoty, vodnyja pieraškody, lasy. Dla hetaha časta pravodziacca vučeńni ŭ lasach. Pa dziesiać sutak jany znachodziacca ŭ nieviadomaj dla siabie miascovaści.
U Marjinaj Horcy ličać, što ichniaja častka źjaŭlajecca samaj elitnaj u krainie. Adčuvajecca nieaficyjnaje spabornictva i supraćstajańnie śpiecnaza ŭručanskaha i marjinahorskaha. I tam, i tam ličać, što ichniaja častka najlepšaja.
U 1996 hodzie były kiraŭnik marjinahorskaj častki pałkoŭnik Baradač vystupiŭ na baku Kanstytucyi, suprać Łukašenki.
«Ałmaz»
Faktyčna z «Ałmaza» i pačynaŭsia biełaruski śpiecnaz u kancy 1980‑ch hadoŭ. Praŭda, tady hetaje padraździaleńnie mieła nazvu «Bierkut», i asnoŭnym naznačeńniem była arhanizacyja atradaŭ turemnaha antyteroru. Jany byli stvoranyja i ŭ inšych savieckich respublikach.
Ciapier ža heta svojeasablivy atrad chutkaha reahavańnia. U 1994 hodzie tahačasny kiraŭnik «Bierkuta» i budučy ministr unutranych spravaŭ Uładzimir Navumaŭ vystupiŭ ź inicyjatyvaj pierajmienavać śpiecpadraździaleńnie ŭ «Ałmaz». U pamiatcy dla bajcoŭ Navumaŭ niekali napisaŭ: «Zaŭsiody pomni, što supracoŭnik śpiecpadraździaleńnia pavinien być čysty i ćviordy, jak ałmaz».
U 2002 hodzie bazu «Ałmaza» adkryvaŭ asabista Alaksandr Łukašenka.
U vypadku tryvohi «ałmazaviec» pavinien prybyć na bazu ciaham 5‑7 chvilin. A ciaham 20 chvilin na miesca zdareńnia ŭ lubuju kropku krainy adpraŭlajucca raźviedka i bajavaja hrupa. Jašče praz 20 chvilin śledam vyjazdžaje druhaja hrupa.
U funkcyi «ałmazaŭcaŭ» uvachodzić zmahańnie z terarystyčnaj dziejnaściu, vyzvaleńnie zakładnikaŭ, abiasškodžvańnie vybuchovych rečyvaŭ. «Ałmazaŭcy» niekali zatrymlivali ŭ Minsku padazravanych u zabojstvie rasijskaha žurnalista Poła Chlebnikava.
«Ałmazaviec» pavinien treniravacca nie mieniej troch razoŭ u ty¬dzień. Heta nie tolki spartovyja praktykavańni, ale prykładnyja, kali bajcy iduć na barjery, łazy, leśvicy ŭ poŭnaj ekipiroŭcy.
U asnoŭnym u «Ałmaz» traplajuć aficery z anałahičnych padraździaleńniaŭ Ministerstva abarony, milicejskaha śpiecnaza, słužby achovy kiraŭnika dziaržavy, pahraničnych vojsk. Jak praviła, heta ludzi, jakija addali słužbie nie mienš za piać hadoŭ i ŭžo ŭdzielničali ŭ śpiecapieracyjach. Słužać u «Ałmazie» i žančyny — pieramoŭščycy i snajpierki.
Akurat supracoŭniki «Ałmazu» źbili 2 sakavika 2006 hoda kandydata ŭ prezidenty Alaksandra Kazulina. Bajcy hetaha ž atrada zatrymlivali sioleta Mikałaja Aŭtuchoviča i jahonych paplečnikaŭ. Mienavita byłyja «ałmazaŭcy» byli asudžanyja pa spravie źniknieńnia teleapieratara Dźmitryja Zavadskaha.
«Ałmaz» uznačalvaje pałkoŭnik Mikałaj Karpiankoŭ. Jon byŭ jašče ŭ «Bierkucie», kali z 1992 da 1994 hoda źjaŭlaŭsia kamandziram bajavoj hrupy padraździaleńnia. U 2003 hodzie Karpiankoŭ viarnuŭsia ŭ «Ałmaz» u jakaści kaman¬dzira.
«Alfa»
Hrupa «Alfa» pry Kamitecie dziaržaŭnaj biaśpieki SSSR była stvoranaja jašče ŭ 1974 hodzie. U sakaviku 1990 tahačasny hałoŭny čekist Sajuza Kručkoŭ padpisaŭ ukaz ab dadatkovym uviadzieńni hrupy «Alfa» z dysłakacyjaj u Minsku. Siarod metaŭ stvareńnia hrupy nazyvalisia łakalizacyja i papiaredžańnie terarystyčnych i ekstremisckich akcyj, asabliva niebiaśpiečnych złačynnych prajavaŭ, jakija pahražajuć biaśpiecy krainy. Pieršapačatkova hrupa dziejničała i na bałtyjskija krainy.
Cikava, što až da studzienia 1992 hoda «Alfa» znachodziłasia ŭ pramym padparadkavańni hałoŭnaha ŭpraŭleńnia pry prezidencie SSSR. Tolki potym uvajšła ŭ strukturu biełaruskaha KDB. Bajcy «Alfy» zabiaśpiečvajuć fizičnuju abaronu i biaśpieku biełaruskaha kiraŭnictva i vysokich zamiežnych haściej. U novyja abaviazki taksama ŭvajšła baraćba ź niezakonnym vyvazam kaštoŭnych mietałaŭ, materyjalnych i histaryčnych kaštoŭnaściaŭ za miežy krainy.
Pry stvareńni «Alfy» pieravaha addavałasia aficeram‑afhancam, vedevešnikam, prafiesijnym spartoŭcam. Ciapier vyšejšaja adukacyja i słužba ŭ vojsku abaviazkovaja dla kandydataŭ. Taksama ŭvaha nadajecca zdolnaści vynosić vialikija psichałahičnyja i fizičnyja nahruzki. Uzrost bajcoŭ — 30‑35 hadoŭ.
Adznačajecca, što ciakučka kadraŭ u «Alfie» vielmi małaja. Dla taho, kab stać sapraŭdnym prafiesijanałam, patrebna čatyry‑piać hadoŭ. Uvieś hety čas bajec znachodzicca na druhich‑trecich rolach. Adna poŭnaja ekipiroŭka «alfaŭca» (broniekamizelka, šałom, zbroja, bojeprypasy) važyć bolš za 20 kiłahramaŭ.
Deputat Viarchoŭnaha Savieta XII sklikańnia ad BNF Siarhiej Navumčyk u svaich uspaminach śćviardžaje, što mienavita supracoŭniki «Alfy» źbivali deputataŭ ad apazicyi, jakija abviaścili haładoŭku ŭ avalnaj zale.
Niejki čas chadzili čutki, što bajcy «Alfy» atrymlivali vajenny dośvied u Čačni, ale kiraŭnictva hrupy ŭparta heta admaŭlaje. Kiraŭnikom hrupy «Alfa» źjaŭlajecca pałkoŭnik Mikałaj Ivinski.
Pahraničny śpiecnaz
Svoj śpiecnaz isnuje i ŭ pahraničnikaŭ. Heta Asobnaja słužba aktyŭnych mierapryjemstvaŭ, ci nie samaje zakrytaje i małaviadomaje śpiecpadraździaleńnie.
ASAM źjaviŭsia ŭžo paśla razvału Savieckaha Sajuza, u 1993 hodzie. Pieršym načalnikam byŭ Hienadź Niavyhłas.
Najpierš stvareńnie śpiecpadraździaleńnia tłumačyłasia baraćboj ź nielehalnaj mihracyjaj. U asnoŭnym, hramadzian z azijackich krain u Jeŭropu. Mienavita heta i było pieršaj zadačaj.
Paźniej źjavilisia novyja — baraćba z ekanamičnaj złačynnaściu i narkatrafikam, supraćdziejańnie tranzitnamu teraryzmu i handlu ludźmi.
Pravierka budučaha asamaŭca doŭžycca ad hodu da dvuch. Ciaham hetaha času z asablivaj uvahaj praviarajuć pasłužny śpis bajca, usich blizkich i dalokich svajakoŭ. Siaredni ŭzrost aficeraŭ 33 hady. Na formiennym šaŭronie bajca ASAMa — dva skryžavanyja miačy i ruža viatroŭ na fonie konturu krainy.
U svoj čas ASAM uznačalvaŭ siońniašni staršynia Pahraničnaha kamiteta Ihar Račkoŭski. A słužyli ŭ śpiecpadraździaleńni starejšyja syny Łukašenki — Viktar i Dźmitryj.
