Kolki padatkaŭ zapłacili ŭ biudžet Litvy firmy ź biełaruskimi karaniami
U top-500 najbujniejšych płacielščykaŭ padatkaŭ pa vynikach pieršaha kvartała 2024 hoda apynulisia čatyry kampanii ź biełaruskimi karaniami, piša thinktanks.by sa spasyłkaju na Dziaržaŭnuju padatkovuju inśpiekcyja (VMI) pry Ministerstvie finansaŭ Litvy. Usie jany pradstaŭniki IT-siektara, jakija rełakavalisia ŭ Litvu ŭ 2020-2022 hadach, jak i najbujniejšyja padatkapłacielščyki 2023 hoda.
Epam sistemos
Samyja značnyja adličeńni ŭ kaznu Litvy zrabiła kampanija Epam sistemos, jakaja maje ŭ krainie dva centry raspracoŭki — u Vilniusie i Kaŭnasie. Suma jaje padatkaŭ skłała 4,3 młn jeŭra. Dla paraŭnańnia: u anałahičnym pieryjadzie minułaha hoda raspracoŭščyk zapłaciŭ 4,0 młn jeŭra padatkaŭ.
U rejtynhu VMI pa vynikach pieršaha kvartała Epam sistemos zaniała 75-je miesca. Chacia pa vynikach 2023 hoda była 58-j.
Pa vynikach pieršaha kvartała 2024 hoda Epam sistemos zastałasia najvažniejšym płacielščykam u litoŭskaj IT-halinie.
Wargaming Vilnius
Raspracoŭnik suśvietna viadomaj hulni World of Thanks Wargaming Group — vyklučeńnie z trendu.
Jaje miascovaja dačka Wargaming Vilnius skaraciła adličeńni za pieršy kvartał u 1,8 raz — z 5,17 młn da 2,97 młn ieŭra.
U top-500 sioleta jana stała 120-j. Pry hetym paśla zaviaršeńnia 2023 hoda hety raspracoŭščyk zajmaŭ 81-je miesca.
Gurtam
Adzin ź viadučych u śviecie vytvorcaŭ telematyčnaha prahramnaha zabieśpiačeńnia, naadvarot, rezka vyras u vačach litoŭskich padatkavikoŭ.
Jaho litoŭski ofis, jaki z 2021 hoda źjaŭlajecca hałaŭnym dla ŭsioj hrupy, pieraličyŭ im 1,15 młn jeŭra. Heta suma značna bolšaja za tuju, jakaja była zroblena pa vynikach studzienia-sakavika minułaha hoda (kala 880 tys. jeŭra).
Gurtam u vyniku zaniaŭ 370-y radok. Pazicyja pa vynikach 2023 hoda ŭ kampanii była vyšej — 329-aja.
Andersen Soft
Čaćviortaj kampanijaj ź biełaruskimi karaniami ŭ rejtynhu VMI staŭ raspracoŭščyk zakaznoha prahramnaha zabieśpiačeńnia Andersen Soft.
Abjom jaho adličeńniaŭ skłaŭ 1,12 młn jeŭra, a miesca ŭ śpisie najbujniejšych padatkapłacielščykaŭ — 381-je.
U pieršym kvartale 2023 hoda kampanija nie ŭvachodziła ŭ pieralik top-500 najbujniejšych. Biznes pačaŭ raści ŭ druhoj pałovie 2023 hada, jaki Andersen Soft zaviaršyła na 242-m radku.
Biez Flo Health, ale z «Biełaruśsiu»
VMI taksama padličyła najbujniejšych padatkapłacielščykaŭ pa asobnych halinach i rehijonach.
U halinovym razrezie ŭ top-50 najbujniejšych kampanij telekamunikacyjnaha i IT-siektaraŭ pa-raniejšamu adsutničaje Flo Health LTU — litoŭskaja dačka adnajmiennaha startapa biełaruskaha pachodžańnia. Hety biznes vypaŭ ź jaho ŭ druhoj pałovie minułaha hoda.
Zatoje zachoŭvaje pazicyi ŭ pieršaj paŭsotni najbujniejšych płacielščykaŭ Druskininkaja sanatoryj «Biełaruś». Jaho adličeńni ŭ kaznu Litvy, pavodle źviestak VMI, navat vyraśli ŭ paraŭnańni ź minułym hodam — z 89 tys. da 95 tys. jeŭra.
Čytajcie taksama:
Biełaruski miljanier Juryj Mielničak prahnazuje kryzis u IT i dehłabalizacyju suśvietnaj ekanomiki
Inflacyja ŭ Litvie — 0,4%, u Polščy — 2,7%. U Biełarusi pakul 5,6%
