Padletki abrabavali «Tabakierku» ŭ Maładziečnie: nabrali cyharet i preziervatyvaŭ na 1400 rubloŭ VIDEA
U Maładziečnie čaćviora padletkaŭ raźbili šybu ŭ «Tabakiercy», zaleźli ŭnutr i vynieśli adtul tavaru bolš čym na 1400 rubloŭ, paviedamlaje UUS Mienabłvykankama.
Usio adbyłosia jašče ŭ noč na paniadziełak. Milicyju na miesca zdareńnia kala 7-j ranicy vyklikała pradavačka kijoska «Tabakierka» na vulicy Mira. Pa słovach žančyny, u šapiku było raźbita škło i adkryta kasavaje akienca.
Milicyja vyjaviła, što nieviadomyja raźbili vitrynu i pranikli ŭ handlovy kijosk, adkul vynieśli cyharety, zapalnicy i pački kantraceptyvaŭ na ahulnuju sumu krychu bolš za 1400 rubloŭ.
Paśla prahladu zapisaŭ z kamier videanazirańnia vyśvietliłasia: za noč złamyśniki dvojčy zaleźli ŭ handlovaje pamiaškańnie i vykrali adtul tavar.
Kala čaćviortaj ranicy, paśla taho jak było raźbita vitrynnaje škło, spracavała sihnalizacyja. Niahledziačy na heta, adzin z padletkaŭ zalez unutr kijoska i nabiŭ sumku błokami cyharet z pryłaŭka. Praz šeść chvilin kampanija padletkaŭ viarnułasia na miesca zdareńnia. Toj ža padletak znoŭ zalez unutr kijoska. Jon braŭ błoki tytuniovych vyrabaŭ i praz raźbitaje akno padavaŭ astatnim. Vybracca vonki praz raźbitaje škło jon nie zmoh, tamu pakinuŭ pamiaškańnie praz kasavaje akienca.
Nalotčykami akazalisia čaćviora navučencaŭ miascovaha kaledža 16 i 15 hadoŭ. U internacie, dzie jany pražyvajuć, znajšli častku skradzienaha. U bijahrafii dvaich niepaŭnaletnich heta pieršy kanflikt z zakonam. U dvuch inšych, 15-hadovaha ŭradženca Vałožynskaha rajona i 16-hadovaha padletka rodam ź Miadzieła, heta nie pieršaje znajomstva ź milicyjaj.
