Mova naša. Dachod ci prybytak? Košt ci cana?
U fejsbuku, u adnoj z moŭnych supołak, adzin z karystalnikaŭ padniaŭ pytańnie: ci jość roźnica pamiž paniatkami «dachod» i «prybytak»? Mnohija na heta paraili nie zamaročvacca: maŭlaŭ, roźnicy niama, chopić prosta prybytku. Ale ludzi ekanamična adukavanyja tut ža zapiarečyli: heta ž absalutna roznyja paniaćci, nielha nijak ich atajasamlivać!
Sapraŭdy, davajcie raźbiaromsia na prykładzie.
Pradprymalny čałaviek Antoś kupiŭ u susiedki na vioscy 10 kiłahram (pa 1 rubli) pamidoraŭ — pamidory hruntovyja, śpiełyja, duchmianyja. Pavioz ich na Kamaroŭku, raschapali pamidory za 3 rubli za kiłahram.
Ličym: dachod ad prodažu kiemlivaha Antosia — 30 rubloŭ (3 rub.×10 kh = 30 rub). A jaki ž prybytak (raźličvajem jaho pa formule: dachod minus vydatki)? 30 rubloŭ minus daroha ŭ Minsk u dva baki (6 rubloŭ), 10 rubloŭ addaŭ susiedcy — vychodzić 14 rubloŭ.
Davajcie ciapier jašče zaadno z canoj i z koštam raźbiaromsia — heta taksama ekanamična roznyja paniaćci, i mova ŭ hetym dapamahaje razabracca.
Što ž takoje košt? Heta toje, u što abyšoŭsia tavar pradaŭcu: sabiekošt adnaho kiłahrama pamidoraŭ dla Antosia — 1,6 rubla (1 kiłahram pamidoraŭ + 60 kapiejek za darohu na kožny kiłahram). Cana — heta toje, pa čym tavar pradajecca, u što abyšoŭsia kiłahram pamidoraŭ kupcu — 3 rubli. Roźnica pamiž sabiekoštam i canoj — navar Antosia, prybytak (3 — 1,6 = 1,4; 1,4 * 10 kh = 14 rub.).
Košt + prybytak = cana (price, prix, cina, ciena).
Cana * kolkaść tavaru = dachod.
Nie błytajcie!
