Каманда Навальнага пахвалілася, што паспрыяла арышту намесніка Шайгу. Успыхнуў скандал
Адразу пасля таго, як у Расіі за хабар затрымалі высокапастаўленага вайсковага чыноўніка, прадстаўнікі Фонду барацьбы з карупцыяй (ФБК) заявілі аб унясенні свайго ўкладу ў гэты арышт, чым адразу справакавалі буру незадаволенасці сярод расійска-апазіцыйных і ўкраінскіх колаў. Расказваем, у чым сутнасць прэтэнзій і каму ў каментарах, наадварот, спадабалася заява ФБК.
Намеснік міністра абароны Расіі Цімур Іваноў у судзе чакае рашэння аб абранні меры ўтрымання. Фота: тэлеграм-канал судоў агульнай юрысдыкцыі горада Масквы
У каментарах пад заявамі прадстаўнікоў каманды Навальнага і ФБК ў твітары, дзе адзначалася роля арганізацый у затрыманні і змяшчэнні ў СІЗА намесніка міністра абароны Расіі Цімура Іванова за буйны хабар, успыхнуў скандал з гарачымі абмеркаваннямі наконт правільнасці выкаранення карупцыі ў расійскім войску падчас вайны ва Украіне.
У сваіх публікацыях ФБК і іншыя прыхільнікі забітага апазіцыйнага палітыка Аляксея Навальнага акцэнтавалі ўвагу на тым, што яны праводзілі антыкарупцыйнае расследаванне ў дачыненні да Цімура Іванова яшчэ ў канцы 2022 года, і што пасля гэтага можна было дакладна ўказваць на віну чыноўніка ў хабарніцтве.
Гэтыя заявы многім не спадабаліся, асабліва антываенна настроеным расіянам і ўкраінцам. Тыя сталі масава абвінавачваць ФБК у дапамозе расійскай арміі і спецслужбам, «бо без карупцыянераў у войску больш грошай пойдзе на вайну».
Вось, напрыклад, як гэта было ў каментарах пад допісамі супрацоўніцы ФБК Марыі Пеўчых і афіцыйнага акаўнта каманды Навальнага.
Апроч негатыўных рэакцый, таксама знайшлося месца і ўхваляльным. І гаворка ідзе больш не пра выказванні тых карыстальнікаў, хто спрабаваў супакоіць розныя бакі канфлікту, а пра рэакцыі расійскіх Z-акаўнтаў і ботаў, якія масава набеглі ў каментары і сталі хваліць ФБК за паляпшэнне эфектыўнасці арміі Расіі, тым самым правакуючы ўкраінцаў і апазіцыйных расіян на далейшы канфлікт.
«Наша Нiва» — бастыён беларушчыны
ПАДТРЫМАЦЬЧытайце таксама:
Патрыярх Кірыл забараніў у служэнні святара, які праводзіў паніхіду на магіле Аляксея Навальнага
