Прэм’ера камедыі ад «Беларусьфільма»: у галоўнай ролі расеец, а малады рэжысёр прапануе вадзіць школьнікаў
Днямі ў пракат выйшаў новы фільм «Беларусьфільма» — «Кіношнікі». Ён пра хлопца Мікалая, які патрапіў па размеркаванні на той самы «Беларусьфільм» і марыць зняць аўтарскае кіно. Але ўчорашняга выпускніка адпраўляюць працаваць у архіў кінастудыі. Хто зняўся ў айчыннай камедыі? І ці плануе хтосьці яе глядзець?
Фота з сайта belarusfilm.by
Прэзентацыя «Кіношнікаў» адбылася больш за месяц таму — фільм адкрываў Мінскі міжнародны кінафестываль «Лістапад». Наўрад ці можна сказаць, што беларуская камедыя ўразіла журы: «Кіношнікі» атрымалі дыплом «За шчырасць і жыццярадаснасць» у намінацыі «Кіно маладых» і спецыяльны прыз Мінгарвыканкама.
Але рэжысёр Кірыл Халецкі быў поўны аптымізму. На адной з прэс-канферэнцый ён казаў, што гатовы ўжо здымаць фільм-працяг ці нават серыял — калі гледачы захочуць. «Сусвет «Кіношнікаў» дазваляе зрабіць прыквел, працяг і, магчыма, нават ператворыцца ў серыял. Мы будзем назіраць за рэйтынгамі і водгукамі. Магу сказаць, што я ўжо думаў над працягам, таму калі аўдыторыя добра прыме наш першы фільм, мы гатовы рабіць другі».
Фота з сайта belarusfilm.by
Рэцэнзію на камедыю цяжка знайсці нават у дзяржаўных СМІ. Вось некалькі фактаў, якія агучваліся: сцэнарый перапісвалі ажно 12 разоў (дарэчы, сцэнарыстамі былі сам Халецкі і расіянін Канстанцін Бакулін, які звычайна піша сцэнарыі для серыялаў на ТНТ), здымалі фільм 21 дзень і 9 дзён мантавалі. У «Кіношніках» адбылося 24 прафесійныя дэбюты, а каб дадаць крыху «зорнасці», запрасілі Юрыя Стаянава.
Галоўную ролю выканаў расеец Станіслаў Пякарскі, які дагэтуль паспеў зняцца ў серыяле «Сева Капуцын», дзе яму дасталася другая галоўная роля, а таксама адыграў у эпізодзе серыяла цыкла «Пра людзей і пра вайну». З беларускіх акцёраў у «Кіношніках» можна пабачыць Лаліту Табарку, Аляксея Анісеня, Уладзіслава Соладава, Юрыя Цвірко і Івана Паўлава.
Фота з сайта belarusfilm.by
Дарэчы, асоба рэжысёра таксама цікавая. Кірылу Халецкаму 23 гады (ён толькі ў мінулым годзе скончыў Акадэміі мастацтваў), да «Кіношнікаў» зняў кароткаметражныя карціны «Дарога» і «Аднойчы была Зямля», тройчы атрымоўваў прэмію спецыяльнага фонду Лукашэнкі.
На пытанне журналіста «Беларускага часу» як жа так атрымалася, што маладому хлопцу дазволілі зняць поўны метр за кошт дзяржсродкаў, Кірыл адказаў:
«Думаю, дапамагло, што ў Міністэрстве культуры да таго часу ўжо лунала: Кірыл Халецкі, Акадэмія мастацтваў, узнагароды. Перад размеркаваннем мне патэлефанаваў Уладзімір Міхайлавіч Карачэўскі, тады генеральны дырэктар «Беларусьфільма», прапанаваў эксперыментальны варыянт — накіраванне ў новае падраздзяленне, студыю маладзёжнага кіно, рэжысёрам. Сказаў, ёсць імавернасць зрабіць поўны метр.
Для мяне гэта было вельмі клёва, таму што ў 22 гады зняць поўнаметражнае кіно — гэта… Шчыра, я наогул такіх прыкладаў не ведаю. І мы практычна адразу сталі думаць над сцэнарыям. Праз паўгода заявіўся на конкурс, і мне выпаў гонар зрабіць дэбютны поўнаметражны фільм на замову Міністэрства культуры».
Кірыл таксама адзначыў, што галоўнага героя камедыі спісваў з сябе.
Рэжысёр Кірыл Халецкі. Фота з сайта belarusfilm.by
А вось метады папулярызаваць беларускае кіно ў Халецкага, нягледзячы на малады ўзрост, даволі савецкія. Ён прапаноўвае вадзіць школьнікаў класамі ў кінатэатры глядзець айчынныя фільмы:
«На мой погляд, трэба мяняць стаўленне гледачоў да свайго кіно. У нас ёсць залатыя хіты, якія ўсё ведаюць. А вось класікі апошніх гадоў мы пакуль не сфарміравалі. У гэтым сэнсе мне сімпатычны досвед кітайскага кінематографа. Ён поўнасцю незалежны ад усяго свету. Кітайскае кіно глядзяць толькі ў Кітаі, і яно вельмі добрае акупляецца. Пачынаюць са школы: вучні класамі раз на тыдзень ходзяць на айчынныя фільмы.
Мусіць, нам бракуе чагосьці такога. Калі мы пачнём са школьнай лавы прывіваць любоў да свайго кіно, паказваць, што яно сапраўды ў нас ёсць, гэта створыць цікавасць. Але мусіць прайсці час».
Перад выхадам кіно ў пракат арганізавалі спецпрагляд для беларускіх селебрыціз у кінатэатры «Мір». А вось з камерцыйнымі паказамі, здаецца, пакуль сітуацыя жаласная. Выглядае, што няшмат хто на выхадных плануе патраціць 85 хвілін свайго жыцця на «Кіношнікаў»: на суботу ў кінатэатр «Аўрора» прададзены адзін квіток, у «Беларусь» − 12, «Камсамолец» − 25, «Кастрычнік» − 5, «Ракета» − 23. У кінатэатры «Піянер» запланавана ажно два сеансы на дзень, але пакуль не куплена ніводнага квітка.
Чытайце таксама:
Cёння стартуе кінафестываль «Лістапад»
Памёр рэжысёр стужкі «Дарога на Курапаты», здымаць якую дапамагаў Зянон Пазняк
