U Homieli zamachnulisia na samyja vialikija ŭ Biełarusi mohiłki
U Homielskim rajonie abjaŭlena pra hramadskaje abmierkavańnie budaŭnictva druhich mohiłak kala vioski Stukačoŭka. Abmierkavańnie pradoŭžycca da 29 krasavika 2024 hoda. Kali prajekt realizujecca, to hetyja mohiłki stanuć samymi bujnymi ŭ Biełarusi, pišuć «Mocnyja naviny».
Fota: gomel.ritual.by
Stukačoŭskija mohiłki płanujuć istotna pavialičyć. Pavodle dakumientaŭ, ahulnaja płošča ziamielnaha ŭčastka pad novyja mohiłki składaje 150 hiektaraŭ. Płošča ŭžo najaŭnych — 44 hiektary.
Heta značyć, što paśla realizacyi prajekta Stukačoŭskija mohiłki stanuć najbujniejšymi ŭ Biełarusi. Pakul ža samymi vialikimi mohiłkami ŭ Biełarusi źjaŭlajucca Paŭnočnyja ŭ Minsku. Tam na terytoryi ŭ 82 hiektary pachavana bolš za 100 tysiač čałaviek.
U pieršuju, druhuju i treciuju čerhi budaŭnictva płanujecca asvoić terytoryju dla tradycyjnych pachavańniaŭ. Ale hałoŭny punkt u novym prajekcie — budaŭnictva krematoryja i kałumbaryjaŭ (miescaŭ pad pachavańnie urnaŭ z pracham).
Na siońniašni dzień adziny ŭ krainie krematoryj pracuje na tych ža Paŭnočnych mohiłkach u Minsku. Jaho pabudavali jašče ŭ 1986 hodzie.
Homielski krematoryj pa prajekcie maje dźvie žałobnyja zały i dva pakoi dla znachodžańnia svajakoŭ pamierłaha. Dla jaho abstalavańnia płanujuć zakupić u Rasii dźvie hazavyja piečy.
Uźviadzieńnie kompleksu krematoryja i kałumbaryja na mohiłkach №2 u Stukačoŭcy zapłanavana ŭ apošniuju, čaćviortuju čarhu prajekta. Pa dakumientach, heta adbudziecca ŭ 2028 hodzie.
Čytajcie taksama:
Da haradoŭ, dzie miascovyja mohiłki pieratvarylisia ŭ bałota, dałučyŭsia Rahačoŭ
Vypadak ź miortvym ciełam, jakoje pierabłytali ŭ Homieli nie ŭnikalny — toje samaje było ŭ Pinsku
