Jak Łukašenka zarablaje na vajnie — rasśledavańnie «Biełpoła»
Niahledziačy na sankcyi, biełaruskija kampanii zdoleli zarabić na vajskovych pastaŭkach u Rasiju vialikija hrošy. Jak u ich heta atrymałasia?
«Pielenh». Fota: aficyjny sajt pradpryjemstva
Abjadnańnie byłych siłavikoŭ «Biełpoł» apublikavała novaje rasśledavańnie. U im aŭtary źviartajuć uvahu na pracu adnaho ź viadučych pradpryjemstvaŭ u sistemie Dziaržvajenpramu Biełarusi — «Pielenh».
«Pielenh», dola dziaržaŭnaj ułasnaści ŭ jakim składaje 48,9%, śpiecyjalizujecca na praviadzieńni navukova-daśledčych, vopytna-kanstruktarskich raspracovak sučasnych prycelnych kompleksaŭ dla sistem kiravańnia ahniom broniatankavaj techniki.
U krasaviku 2023 hoda «Pielenh» zajaviŭ ab uvodzie ŭ ekspłuatacyju dvuch novych karpusoŭ u Minsku i abviaściŭ nabor śpiecyjalistaŭ u suviazi z pašyreńniem vytvorčaści.
Takoha pośpiechu, jak śćviardžaje «Biełpoł», dasiahnuć pradpryjemstvu dapamahła vajna.
U jakaści prykładu jany pryvodziać schiemu pastavak prycełaŭ kamandzira panaramnaha RKP-MRO, jakija źjaŭlajucca abaviazkovym elemientam asnaščeńnia sučasnych madelaŭ tankaŭ.
Pryceł zabiaśpiečvaje kruhavoje nazirańnie za miascovaściu i dazvalaje vyjavić cel na dystancyjach zvyš 5 kiłamietraŭ jak dniom, tak i nočču ŭ składanych umovach i navodzić tank na cel.
Klučavym elemientam prycełu źjaŭlajecca pryvadnaja pryłada PVKU 210, jakaja dazvalaje jamu varočacca na 360 hradusaŭ. Jaho «Pielenhu» pastaŭlaje Minski miechaničny zavod imia Vaviłava — kirujučaja kampanija chołdynhu «BiełOMA».
«BiełOMA». Fota: aficyjny sajt chołdynha «BiełOMA»
U svaju čarhu, kamplektujučyja dla PVKU 210 (rotary i statary) zavod atrymlivaje ad TAA «Ruchsiervamator», jakoje zajmajecca vytvorčaściu stankoŭ i abstalavańnia dla łaziernaj rezki. Hetaja pradukcyja pastaŭlajecca, siarod inšaha, na pradpryjemstvy krain Zachadu.
Aŭtary śćviardžajuć, što kiraŭnictva «Ruchsiervamator» sa svajoj pradukcyi prybrali nalepki z paznačeńniem vytvorcy i nadpis Made in Belarus. Heta było zroblena z-za pieraściarohi vyjaŭleńnia ich udziełu ŭ pastaŭkach pradukcyi ŭ vajennych metach i pahrozy sankcyj.
Biełaruskaja firma-prakładka
Akramia hetaha, kiraŭnictva «Ruchsiervamatora» znajšło firmu-prakładku, jakaja schavała ich pramyja kamiercyjnyja suviazi z zavodam imia Vaviłava. Joj stała TAA «Łabaratoryja adytyŭnych technałohij» («ŁAD»).
Mienavita ź joj, jak śćviardžajuć aŭtary rasśledavańnia, stali zaklučacca dahavory na pastaŭku kamplektaŭ rotaraŭ i stataraŭ. Usiaho pa takoj schiemie ŭ 2023 hodzie było pastaŭlena 600 kamplektaŭ. Aŭtary źviartajuć uvahu, što za 8 miesiacaŭ 2022 hoda było pastaŭlena tolki 40 kamplektaŭ.
Dla vytvorčaści samoha prycełu taksama nieabchodna inšyja kamplektujučyja. Siarod ich — aptyčnyja enkodary, pastaŭkami jakich taksama zajmajecca «ŁAD». Kamplektujučyja dla ich zakuplalisia ŭ Kitai i Tajvani. U vypadku z Tajvaniem apłata prachodziła praz Hruziju.
Aŭtary adznačajuć, što infarmacyja ab sapraŭdnaj mecie pastavak kamplektujučych była nakiravana kampanii-vytvorcy z Tajvania. U vyniku jana abarvała ŭsie suviazi ź biełaruskim bokam. A sama kraina ŭ 15 razoŭ pavialičyła štrafy dla kampanij, jakija zajmajucca pieraprodažam pradukcyi vajskovaha pryznačeńnia ŭ Rasiju i Biełaruś.
Jak vynikaje z dakumientaŭ, jakija atrymali biełpołaŭcy, kampanija «Ruchsiervamator» praź biełaruskuju kampaniju-prakładku «ŁAD» i rasijskuju AAT «Techkam» pastaŭlaje svaju pradukcyju rasijskamu «Urałvahonzavodu», jaki vypuskaje tanki.
Vyrablać panaramnyja pryceły «Pielenhu», jak zdoleli vyśvietlić biełpołaŭcy, dapamahajuć taksama takija biełaruskija kampanii, jak TAA «Ivanar Aŭtamatyŭ», TAA «Dakładnaja miechanika», TAA «Alurtech», TAA «Kiedr Aŭtamatyŭ», TAA «Dazatar-plus», TAA «Hrośvier Hrup», TAA «Kochmašyninh», AAT «Žłobinski zavod «Śviatło», TAA «Hidramanija».
Kitajski śled
U svaim rasśledavańni aŭtary raskazvajuć taksama pra pracu kitajskaj kampanii Shenzhen 5G Hi-Tech Innovation, stvoranaj u 2022 hodzie. Jaje klijentami źjaŭlajucca biełaruskija pradpryjemstvy, jakija znachodziacca pad sankcyjami. Heta «Pielenh», «BiełOMA», «SALEA», «ŁEMT», «KIDMA TEK», jakija źjaŭlajucca viadučymi vytvorcami ŭzbrajeńnia ŭ Biełarusi.
Hienieralnym dyrektaram kitajskaj kampanii źjaŭlajecca hramadzianin Biełarusi Aleh Jurčyk, namieśnikam — Viktar Cydzik.
Siarod mieniedžaraŭ aŭtary źviartajuć uvahu na biełarusku Alaksandru Aksiančuk, jakaja ŭ 2015—2023 hadach pracavała inžynieram u navukova-techničnym centry LEMT chołdynhu «BiełOMA», a praź dziesiać dzion paśla svajho zvalnieńnia, 3 krasavika 2023 hoda, pracaŭładkavałasia ŭ Shenzhen 5G Hi-Tech Innovation. Ciapier žančyna, jak śćviardžajuć biełpołaŭcy, padtrymlivaje suviaź ź inžyniernym składam pradpryjemstvaŭ, jakija ŭvachodziać u «BiełOMA», i arhanizuje pracesy z kitajskaha boku.
Jak śćviardžajuć aŭtary, Shenzhen 5G Hi-Tech Innovation źjaŭlajecca kampanijaj-prakładkaj, jakaja zaklučaje kantrakty z «Pielenham» na pastaŭku kamplektujučych dla pradukcyi vajennaha pryznačeńnia, jakija jana atrymlivaje niepasredna ad kitajskich vytvorcaŭ.
Rasśledavalniki źviartajuć uvahu jašče na adnu biełaruskuju kampaniju, praź jakuju ździajśniajucca pastaŭki kamplektujučych z Kitaja. Heta AAT «Hidramanija», jakaja zajmajecca vytvorčaściu karpusoŭ dla miedycynskaha abstalavańnia, detalaŭ pratezaŭ, płastykavych ram viełasipiedaŭ i inšaha.
Schiema pastavak. Skryn videa: osbbelpol / YouTube
Pastaŭki z Kitaja, jak śćviardžajuć biełpołaŭcy, dazvolać «Pielenhu» pastavić u Rasiju 1750 prycełaŭ dla BTR 82A, 700 prycełaŭ dla tankaŭ T72 i T90, 70 prycełaŭ dla supraćtankavaha rakietnaha kompleksu «Chryzantema-S» i stolki ž dla mabilnaha zienitnaha artyleryjskaha kompleksu «Deryvacyja-SPA», 80 prycełaŭ dla BMPT «Terminatar». Apošnija try, jak adznačajuć aŭtary, nie znachodziacca na ŭzbrajeńni ŭ biełaruskaj armii.
Akramia hetaha, pa infarmacyi, jakoj vałodajuć biełpołaŭcy, «Pielenh» płanavaŭ da kanca 2023 — pačatku 2024 hoda vypuścić 100 prycełaŭ-dubloraŭ televizijnych PDT dla tankaŭ, 70 prycełaŭ kamandzira panaramnaha RKP-MRO.
Aŭtary havorać, što im viadoma pra šeść kantraktaŭ pamiž «Pielenham» i Shenzhen 5G Hi-Tech Innovation, pastaŭki pa ich užo vykanany. A ciapier viaducca raspracoŭki pa vytvorčaści ci arhanizacyi zborki prycełaŭ da strałkovaj zbroi, hranatamiotaŭ i minamiotaŭ, načnych prycełaŭ, kalimatarnych prycełaŭ dla aŭtamataŭ.
Biełpołaŭcy śćviardžajuć, što asobnyja biełaruskija vytvorcy vychodziać na pramoje supracoŭnictva z kitajskimi, biez udziełu firmy-prakładki Shenzhen 5G Hi-Tech Innovation.
Tak, zavod imia Vaviłava zaklučyŭ damovu na vytvorčaść 3 tysiač detalaŭ dla łaziernaha dalamiera. Rahačoŭski zavod «Dyjaprajektar» zamaŭlaje ŭ Kitai tysiačy detalaŭ da prycełu «Sasna-U».
«Biełpoł» paviedamiŭ, što jaho pradstaŭniki ŭ kancy 2023 hoda vystupili ŭ parłamiencie Vialikabrytanii, dziakujučy čamu atrymałasia praduchilić zakupku Shenzhen 5G Hi-Tech Innovation u Kitai aptyčnych enkodaraŭ anhlijskaj vytvorčaści dla «Pielenha».
Čytajcie taksama:
«Rezidencyja «Uschod» — samy vialiki chabar Łukašenku». «Biełpoł» pravioŭ novaje rasśledavańnie
