Chadarkoŭski: Sioleta Ukraina stracić Charkaŭ, letam 2025 — Adesu. Lvoŭ zachavajecca, kali tudy ŭvojdzie NATA
Rasijski palityk i biznesmien pradkazaŭ dalejšaje raźvićcio padziej i abhruntavaŭ svoj pohlad raźlikami.
Michaił Chadarkoŭski. Skryn videa: insiderUKR / Telegram
Na adnym z vystupleńniaŭ u Hiermanii, zapis jakoha raspaŭsiudzili ŭ sacyjalnych sietkach, adzin ź lidaraŭ rasijskaj apazicyi, były kiraŭnik naftavaj kampanii JUKAS Michaił Chadarkoŭski zajaviŭ, što Ukraina i Zachad faktyčna ŭžo prajhrali vajnu:
«Ukrainskich siabroŭ prašu zakryć vušy. Prabačcie, ale ja sabie heta dazvolu. Spadarstva, vy praktyčna ŭžo prajhrali vajnu va Ukrainie. My jaje prajhrali».
Dalej biznesmien i palityk pryvioŭ nastupnyja ličby: «VUP Ukrainy da vajny byŭ 160 miljardaŭ dołaraŭ. Rasii — 2,2 tryljona. Hiermanii — 4,1 tryljona. Jeŭrasajuza — 17 tryljonaŭ.
Pucin vykarystoŭvaje na vajnu 120 miljardaŭ dołaraŭ u hod (pryčym košt samaha raspaŭsiudžanaha artyleryjskaha snarada 152 milimietry — 500 dołaraŭ). Jon tracić na vajnu pryblizna 5,4% VUP.
Jeŭrapiejskaja dapamoha Ukrainie za dva hady vajny skłała kala 88 miljardaŭ dołaraŭ albo 0,25% VUP. I heta pry canie na snarad 155 milimietraŭ ad 5 da 8 tysiač dołaraŭ.
Što aznačaje (z ulikam amierykanskich pastavak) realnyja suadnosiny vydatkaŭ na vajnu — 2,5 da 1 na karyść Pucina ŭ najlepšym vypadku.
U hetym hodzie biez amierykanskich pastavak suadnosiny — 4 da 1 u lepšym vypadku.
Kali ŭ pačatku vajny suadnosiny nasielnictva Ukrainy i Rasii składała 40 miljonaŭ da 142 miljonaŭ, ci 3,5 da 1, to ciapier jano — 7 da 1».
Pryvioŭšy takija raźliki Chadarkoŭski zapytaŭsia: «Jak zahadajecie vajavać?»
«Pry takim raskładzie pastavak i sił Ukraina da kanca hoda stracić Charkaŭ. Da siaredziny nastupnaha hoda — Adesu. Suadnosiny sił stanuć 10-12 da 1 da kanca 2025 hoda. Da siaredziny 2026 hoda Ukraina praciahnie tolki partyzanskuju vajnu, a Lvoŭ zachavajecca, kali tudy ŭvojduć vojski NATA ŭ asobie Polščy», — prahnazuje jon.
Chadarkoŭski akcentavaŭ uvahu prysutnych na tym, što jon pryvioŭ najlepšy scenaryj, jaki praduhledžvaje praciah hieraičnaha supraciŭleńnia USU, niahledziačy na bieznadziejnaść situacyi. Inakš, ličyć pradprymalnik, usio adbudziecca chutčej. Pry hetym šturmavać bujnyja harady nichto nie budzie, bo biez zabieśpiačeńnia jany nie ŭjaŭlajuć pahrozy.
«Ok. A čamu b nie zdradzić Ukrainie? Moža, Pucin jaje zachopić i supakoicca? Moža, navat, atrymajecca vytarhavać u jaho niekalki abłaściej i navat Kijeŭ?» — zadaje pytańni Chadarkoŭski i adkazvaje:
«Moža być. Ale tady treba sumlenna skazać ukraincam: «My vam zdradzili. Zakančvajcie biessensoŭnaje supraciŭleńnie. Voś tolki dalej, praz dva hady, kala miežaŭ Polščy budzie stajać abjadnanaje ruska-ŭkrainskaje vojska».
Miljarder tłumačyć, čamu adbudziecca abjadnańnie ruskich i niekatorych ukraincaŭ: «Ludzi buduć pakryŭdžany. Im treba niešta jeści. A ŭ armii płaciać. My ŭsio heta bačyli na Danbasie».
«Pucin jedzie da SI. Si zajaviŭ, što zabaronienych zonaŭ dla supracoŭnictva bolš niama. Kali demakratyi nie chočuć abjadnoŭvacca i davać rašučy adpor, — dyktatury bolš im padabajucca», — zaŭvažyŭ Chadarkoŭski i akcentavaŭ uvahu na tym, što «Pucinu patrebna nie terytoryja. Pucinu patrebna vajna dla ŭnutranych metaŭ. I słaby Zachad dla hetaha — vydatnaja mišeń».
U kancy svajho vystupu rasijski apazicyjanier zaŭvažyŭ:
«Kali Zachad choča chitra zaciahnuć usie aŭtakratyi razam u suśvietnuju vajnu, to heta zadača, blizkaja da realizacyi. Ci možna zdacca. Moža być, svaboda ŭvohule ničoha nie kaštuje? Vam vyrašać».
Čytajcie taksama:
Ukrainskija bieśpiłotniki vyvieli z ładu 14% naftapierapracoŭčych mahutnaściaŭ Rasii
Pientahon pra situacyju na froncie va Ukrainie: Situacyja składanaja, vyklikaje niepakoj
Budanaŭ maluje zmročnuju karcinu situacyi na froncie
«Tamu što Pucin nie durań». Chadarkoŭski patłumačyŭ, čamu ŭ Rasii niama «svajoj Cichanoŭskaj»
