Biełaruś paśla vybaraŭ, historyja rasizmu i «pijarščyk djabła» — 5 padziej kinafiestyvalu Watch Docs Belarus
Admysłovy fiestyval filmaŭ pra pravy čałavieka zaŭsiody traplaŭ u padspudny nierv biełaruskaha hramadstva, a sioleta Watch Docs Belarus — asabliva aktualnaja padzieja. Pakazy dakumientalnych filmaŭ, u tym liku biełaruskich, a taksama sustrečy i lekcyi raspačalisia ŭčora, praŭda, placoŭka Ok16, jakaja mierkavałasia być asnoŭnaj, u apošni momant paviedamiła arhanizataram pra ramontnyja raboty i akazałasia niedasiažnaj. Tamu łakacyi festu ŭdakładniajucca (adsočvać infarmacyju možna tut), a «Naša Niva» tym časam prapanuje 5 vartych uvahi mierapryjemstvaŭ Watch Docs.
Pakaz tryłohii pra paślavybarnyja časy ŭ Biełarusi i sustreča z aŭtarami — 9 śniežnia
U kino na padziei ŭ Biełarusi pieršaj adreahavała, viadoma, dakumientalistyka. Užo znanyja kiniematahrafisty Andrej Kuciła, Maksim Švied i Kaciaryna Markaviec zrabili pa karotkim mietry, dzie raskazali pra byłuju supracoŭnicu dziaržaŭnaha telebačańnia, jakaja stała achviaraj hvałtu, pra načny Minsk u dni paśla vybaraŭ i vałanciora, što dapamahaje tym, chto paciarpieŭ ad siłavikoŭ. Historyi skłalisia ŭ «Tryłohiju: Biełaruś 2020» — adrazu paśla jaje pakazu adbudziecca sustreča z aŭtarami. Siońnia ž, 9 śniežnia, budzie taksama pakazany film Maksima Švieda «Biełaruś: maršrut pierabudavany» pra razmovy ŭ taksi ŭ pieradvybarnyja časy, a paśla pakazu adbudziecca asobnaja razmova z režysioram.
Pakaz najlepšaha dakumientalnaha filma 2016 hoda pavodle BAFTA «Ja nie tvoj niehr» — 10 śniežnia
Admysłova ŭ Suśvietny dzień pravoŭ čałavieka Watch Docs pakaža maštabnuju dakumientalnuju karcinu, jakaja adsočvaje historyju rasizmu z 1890 hoda da sučasnaści. Režysior Raul Pek raskazvaje historyi troch zabitych afraamierykancaŭ-pravaabaroncaŭ, u tym liku, Marcina Lutera Kinha-małodšaha, adlustroŭvaje ŭvasobleny ŭ mastactvie supraciŭ i tranśluje adkaznaść kožnaha za zachavańnie niaroŭnaści. Film byŭ naminavany na «Oskar», a Brytanskaja akademija telebačańnia i kinamastactva nazvała jaho najlepšym u 2016 hodzie. «Ja nie tvoj niehr» budzie pakazvacca ź biełaruskimi subcitrami, a paśla sieansa adbudziecca dyskusija z anłajn-udziełam paeta i režysiora Ładan Osman z ZŠA.
Pakaz karciny «Upłyŭ» — 11 śniežnia
Heta śviežy film pra «pijarščyka djabła» łorda Cimaci Beła, jaki pracavaŭ z Tetčer, Pinačetam i Łukašenkam. Jon zajmaŭsia hramadskim usprymańniem palitykaŭ, dyktataraŭ i kampanij, suzasnavaŭ kampaniju pa kiravańni reputacyjaj Bell Pottinger, a ŭ vyniku sam zhubiŭ «dobraje rename», kali pryčyniŭsia da rasavaha raskołu ŭ Paŭdniovaj Afrycy. Viadomy palittechnołah užo pamior, a režysiory vykarystali archivy, staryja intervju sa svaim hierojem i razmovy ź jaho siabrami i vorahami, kab raskazać pra ŭpłyŭ sučasnych kamunikacyj na palityku i śviet.
Pakaz biełaruskaha filma «Transfarmacyja» pra transhiendaraŭ — 12 śniežnia
Jak heta — dziela źmieny poła prajści dziaržaŭnuju kamisiju z čynoŭnikaŭ, jakija z pytańniami hiendara ŭvohule nie znajomyja. Dakumientalnaja rabota Ramana Ramanava raskazvaje historyi čatyroch transhiendaraŭ u Biełarusi i stanovicca «apaviadańniem pra ksienafobiju, hvałt i adzinotu». Paśla pakazu adbudziecca sustreča z režysioram.
Padviadzieńnie vynikaŭ, uznaharodžvańnie pieramožcaŭ i zakryćcio Watch Docs — 13 śniežnia
Watch Docs — heta jašče i konkurs biełaruskich filmaŭ. Sioleta ŭ prahramu, aproč zhadanych «Tryłohii» i «Transfarmacyi», uvajšli karciny «Lebiedzi» Haliny Adamovič ab pracy chutkaj dapamohi ŭ Śvietłahorsku, «Hetaja pieśnia nazyvajecca 328» Alaksandry Dyńko pra trahiedyju praz narkotyki i biełaruskaje zakanadaŭstva i, narešcie, «Struktura» Alisy Ioda pra mastactva ŭ ramkach. Pieramožcy, što vyznačajucca hladackim hałasavańniem, buduć nazvanyja na zakryćci fiestyvalu i atrymajuć sabranyja praz kraŭdfandynh hrašovyja pryzy.
