Žanočaja łaźnia, Ejnštejn i Miesi. 7 novych dakumientałak na vychadnyja
Pierad vialikimi vychadnymi prapanujem vam dakumientalnyja filmy apošnich miesiacaŭ, jakija dapamohuć raznastaić hety čas.
Kadr ź filma «Sakrety nieandertalcaŭ». Fota: skryn z trejlera filma
The Greatest Night in Pop (Najvialikaja noč dla pop-muzyki)
Netflix
U 1985 hodzie zorki zachodniaha šoŭ-bizu sabralisia razam, kab zapisać dabračynny trek We Are the World. Pieśniu napisali Majkł Džeksan i Łajaneł Ryčy, a siarod vakalistaŭ byli taksama Brus Sprynhścin, Sindzi Łopier, Rej Čarlz, Styvi Uander, Dajana Ros i Cina Ciornier — usiaho 46 čałaviek!
Zimoj Netflix vypuściŭ pra heta dakumientałku. U film uvajšli raniej nieviadomyja kadry taho, jak Džeksan i Ryčy pisali pieśniu, a taksama hutarki z udzielnikami najvialikaj nočy dla pop-muzyki. Toj momant nazyvajuć unikalnym, a taksama adznačajuć žvavaść filmu i toje, jak šmat novaha jon raskazvaje.
Occupied City (Akupavany horad)
A24
Hety film nam padaryła studyja A24 — lidar u niezaležnym kino. A režysior «Akupavanaha horada» — Styŭ Makuin, naminant na «Oskar» za režysuru filma «12 hadoŭ niavolnictva».
Sama dakumientałka — rupliva zroblenaje daśledavańnie taho, jakim byŭ Amsterdam časoŭ Druhoj suśvietnaj, pabudavanaje na kadrach horada ŭ čas pandemii. Ale ž film doŭžycca 4 hadziny 22 chviliny, to raźličvajcie svaje siły.
Smoke Sauna Sisterhood (Siastrynstva łaźni pa-čornamu)
Alexandra Film, Kepler 22 Production, Ursus Parvus
Kinošniki z Estonii, Francyi i Isłandyi abjadnalisia, kab stvaryć hetuju vielmi žanočuju historyju. I stužka atrymałasia ŭdałaja: z času premjery ŭ kancy 2023-ha «Siastrynstva łaźni pa-čornamu» ŭžo sabrała niekalki fiestyvalnych uznaharod i było vyłučanaje ad Estonii na «Oskar» za najlepšy film na zamiežnaj movie.
U ciemry łaźni pa-čornamu žančyny dzielacca svaimi patajemnymi sakretami i intymnym dośviedam. Razam jany zmyvajuć ź siabie soram i adnaŭlajuć svaju siłu.
Einstein and the Bomb (Ejnštejn i bomba)
Netflix
Što zdaryłasia paśla taho, jak Albiert Ejnštiejn źbieh z nacysckaj Hiermanii? Kab raskazać pra heta, stvaralniki novaha filma abjadnali archiŭnyja zdymki i słovy samoha fizika, a taksama adnavili na zdymačnaj placoŭcy momanty ź jaho žyćcia.
U dakumientałcy fizik kaža, što zrabiŭ u žyćci adnu vialikuju pamyłku: «Kali b ja viedaŭ, što niemcy nie zdolejuć stvaryć jadziernuju zbroju, ja b nie prymaŭ udzieł u adkryćci hetaj skryni Pandory». Mienavita strach taho, što źjavicca niamieckaja jadziernaja bomba, prymusiŭ Ejnštejna napisać list Ruźvieltu, ź jakoha pačałasia honka ŭzbrajeńniaŭ.
Messi's World Cup: The Rise of a Legend (Čempijanat śvietu Miesi: uzychodžańnie lehiendy)
Apple TV+
U hetaj dakumientałcy čatyry sieryi. Razam z Apple TV+ my projdziem pa šlachu Miesi i arhiencinskaj zbornaj praz ažno piać čempijanataŭ śvietu — šlachu, jaki narešcie skončyŭsia tryŭmfam Arhienciny ŭ 2022 hodzie.
Paralelna z hetym my pačujem razvažańni Miesi, abiacajuć šmat asabistych dumak pra karjeru arhiencinca ŭ nacyjanalnaj zbornaj i źviazanyja ź joj vykliki. U kadry źjaviacca i inšyja viadomyja arhiencincy ad futbolnaha śvietu — naprykład, Anchiel Dzi Maryja i Radryha De Pol.
Hideo Kojima: Connecting Worlds (Chidea Kadzima: abjadnoŭvajučy śviety)
Disney+
Chidea Kadzima — kultavy japonski dyzajnier hulniaŭ, i hetaja novaja dakumientałka daje redkuju mahčymaść zazirnuć u jaho pracu.
Kab raskazać, jak aŭtar Metal Gear stvaraje svaje šedeŭry, scenarysty ŭziali intervju ŭ jaho lepšych siabroŭ, taksama zorak u svajoj spravie. U dakumientałcy, da prykładu, źjaviŭsia režysior Hiljerma del Tora, akcior Norman Rydus i kanadskaja śpiavačka Hrajms — byłaja Iłana Maska.
Secrets of the Neanderthals (Sakrety nieandertalcaŭ)
Netflix
Razynka hetaha filmu — pryhožyja kadry žyćcia nieandertalcaŭ, zroblenyja, vierahodna, pry dapamozie štučnaha intelektu. Nieandertalcy isnavali na Ziamli ciaham 300 tysiač hadoŭ, a potym čamuści źnikli, i ŭ novaj dakumientałcy nam prapanujuć razam z archieołahami ŭ hetym razabracca.
Nam pakažuć raskopki ŭ roznych krainach i abiacajuć, što my atrymajem novaje ŭjaŭleńnie pra svaich svajakoŭ z dalokaha minułaha, to-bok nieandertalcaŭ. Zamiest žorstkich i hrubych piačornych ludziej jany paŭstanuć pierad nami tvorčymi i kłapatlivymi — prosta inšym prykładam taho, što značyć być čałaviekam.
«Naša Niva» — bastyjon biełaruščyny
PADTRYMAĆČytajcie taksama:
«Padzieńnie impieryi»: mocny film pra raspad nacyi, što pakinie ŭ biełarusaŭ adčuvańnie dežaviu
«Rypli»: tonki i hustoŭny detektyŭ u styli nuar, ale nie dla ŭsich
Vyjšaŭ sieryjał «Zadača troch ciełaŭ» pa tvorach najviadomiejšaha fantasta sučasnaści. Što ŭ im?
