Minčuka asudzili za bieł-čyrvona-bieły ściah na bałkonie. Sudździa: Heta byŭ adzinočny pikiet
Žychara Novaj Baravoj sudzili za ściah na łodžyi. Bieł-čyrvona-biełaje pałatno, pa jaho słovach, visić nie zvonku pamiaškańnia, a za škłom, z boku kvatery. U sudzie paličyli situacyju adzinočnym pikietam. Užo paśla publikacyi akazałasia, što taki vypadak u Minskim rajonie nie adzin, piša TUT.BY.
Niadaŭna žycharam Novaj Baravoj (kvartał znachodzicca ŭ vioscy Kopišča Minskaha rajona) kidali pozvy ŭ paštovyja skryni.
Ludziej vyklikali ŭ milicyju: pahražali administracyjnaj adkaznaściu pa art. 21.13 KaAP RB (Parušeńnie architekturnaha rašeńnia fasada budynka abo zbudavańnia) i art. 21.14 KaAP (Parušeńnie praviłaŭ dobraŭparadkavańnia). Usio heta źviazvali sa ściahami, jakija visiać na bałkonach i voknach u mnohich kvaterach.
Cikava, što niekatoryja pozvy byli biezymiennymi — advakat tłumačyŭ TUT.BY, što na papiery biez adrasata možna nie reahavać.
U žychara doma na Avijacyjnaj, 3, Arcioma z Novaj Baravoj jość historyja jašče cikaviejšaja. Dniami jaho asudzili za ściah unutry łodžyi.
22 listapada žycharu kvartała patelefanavali ź milicyi, paprasili pravieryć paštovuju skryniu. Tam akazałasia pozva — zaprašali na administracyjny praces pavodle art 23.34. Na hety raz byli paznačany proźvišča, imia i imia pa baćku adrasata.
Na nastupny dzień minčuk pryjšoŭ u milicyju, tam na jaho skłali pratakoł.
Fota: čytač TUT.BY
U pratakole paznačana, što mužčyna 21 listapada ŭ 15:20 vyviesiŭ «dla publičnaj demanstracyi na ŭsieahulny ahlad nie zarehistravany ŭ adpaviednaści z pałažeńniami Zakona Respubliki Biełaruś ad 26.05.2012 «Ab aficyjnych hieraldyčnych simvałach» bieł-čyrvona-bieły ściah, u centry jakoha raźmieščany hierb «Pahonia».
U milicyi paličyli heta «naŭmysnym praviadzieńniem adzinočnaha pikietu biez dazvołu Minskaha rajvykankama», a taksama «publičnym vyražeńniem svaich hramadska-palityčnych nastrojaŭ».
Na dumku inśpiektara, Arciom parušyŭ art. 10 Zakona Respubliki Biełaruś «Ab masavych mierapryjemstvach».
— Sud byŭ 26 listapada. Ja byŭ z advakatam, jana adznačała, što łodžyja — heta nie publičnaje miesca, što pikiet praduhledžvaje prysutnaść chacia b adnaho čałavieka. Na bałkonie visieŭ tolki ściah — heta bačna i na fota milicyi, — raspavioŭ Arciom. — A ŭ toj čas, jaki paznačany ŭ pratakole, ja naohuł lažaŭ na kanapie i hladzieŭ televizar. Ja nie stajaŭ na bałkonie i nie kryčaŭ adtul łozunhi. U mianie doma jość videakamiera, fajły ź jaje my sprabavali dać sudu — tam vyrazna vidać, dzie ja znachodžusia. Ale sudździa nie stała navat hladzieć heta videa.
Arciom kaža, što jamu prysudzili štraf — 20 bazavych vieličyń (540 rubloŭ) pa artykule 23.34 KaAP (Parušeńnie paradku arhanizacyi abo praviadzieńnia masavych mierapryjemstvaŭ). Pastanovu suda paabiacali dasłać pa pošcie.
— Viadoma, my budziem abskardžvać. Ja nie zhodny z takim rašeńniem, liču, što ŭ siabie doma mahu vykazvać svaje palityčnyja pohlady jak chaču. Łodžyja — heta maja terytoryja.
Jašče adzin žychar Minskaha rajona paviedamiŭ pra sud za ściah na bałkonie. Jaho sudzili 26 listapada, taksama pa č. 1.art. 23.34 KaAP.
Dzianis raskazvaje, što BČB-ściah visieŭ unutry bałkona, za škłom. Heta paličyli «adzinočnym pikietam biez dazvołu Minrajvykankama». Štraf — taksama 20 bazavych (540 rubloŭ).
— Ściah na bałkonie visieŭ z dnia vybaraŭ, nijakich pretenzij raniej da jaho milicyja mnie nie pradjaŭlała, — žychar Baraŭlan raspaviadaje, što papiaredničała sudu. — A 20 listapada milicyjanty pryjšli dadomu kala 8 ranicy. Zapatrabavali źniać ściah, potym ja razam ź imi pajechaŭ va UUS. Pratrymali tam kala dźviuch hadzin.
A voś pastanova suda ab administracyjnym pravaparušeńni. Fota: čytač TUT.BY
Akramia taho, pa infarmacyi TUT.BY, u rajonach stalicy sa staršyniami tavarystvaŭ ułaśnikaŭ viaduć «tłumačalnuju pracu» na tuju ž temu.
— U sieradu vyklikali staršyniaŭ tavarystvaŭ ułaśnikaŭ u Administracyju Maskoŭskaha rajona — jak ja zrazumieŭ, z tych damoŭ na praśpiekcie Dziaržynskaha, jakija ličać prablemnymi, — raspavioŭ adzin z udzielnikaŭ sustrečy. — Z nami sustrakalisia kiraŭnik administracyi, načalnik adździeła haradskoj haspadarki, pradstaŭnik MUS i niechta ŭ cyvilnym.
Skazali, što treba prainfarmavać ludziej, u voknach jakich visiać bieł-čyrvona-biełyja ściahi, sercajki, listy papiery, što ŭsio heta budzie pryraŭnoŭvacca da parušeńnia Zakona «Ab masavych mierapryjemstvach» i art. 23.34 KaAP.
Ale z nas u Maskoŭskim rajonie pakul nichto, jak u Centralnym, nie patrabuje, kab my zdavali kantakty žycharoŭ.
