U Žłobinie mužčyna padaŭ zajavu na milicyjantaŭ, a atrymaŭ spravu na siabie za «chłuślivyja śviedčańni»
Kryminalnaj spravaj zaviaršyłasia pravierka Śledčaha kamiteta pa zajavie 25-hadovaha žychara Žłobina pa fakcie pryčynieńnia jamu cialesnaha paškodžańnia supracoŭnikam orhanaŭ unutranych spraŭ.
Pavodle materyjałaŭ pravierki, nočču 17 žniŭnia niećviarozy mužčyna paviedamiŭ pa telefonnaj linii, što choča pryciahnuć da adkaznaści supracoŭnika milicyi, jaki pryčyniŭ jamu cialesnyja paškodžańni. Žłobiniec raspavioŭ, što ŭviečary 13 žniŭnia jon jechaŭ na rovary z pracy dadomu pa vulicy Palavoj i ŭ 19 hadzin 15 chvilin byŭ spynieny tryma supracoŭnikami milicyi. Mužčyna davodziŭ, što dva milicyjanty zaviali jamu ruki za śpinu, a treci nanios udar humavaj pałkaj pa levaj haloncy.
Paśla hetaha milicyjanty nibyta praviali ź im prafiłaktyčnuju hutarku pa temie niesankcyjanavanych mitynhaŭ i adpuścili biez składańnia pratakoła.
Sa słoŭ mužčyny, na šlachu dadomu jamu zabaleŭ palec levaj nahi, tamu jon vyrašyŭ pryciahnuć milicyjanta da adkaznaści.
Paśla pravierki śledčyja śćviardžajuć, što ŭ pieryjad času, ukazany zajaŭnikam jak čas ździajśnieńnia złačynstva, mužčyna znachodziŭsia doma. Jon nie źviartaŭsia pa miedycynskuju dapamohu va ŭstanovy achovy zdaroŭja ni 13 žniŭnia, ni ŭ nastupnyja dni. Dla pravierki zajaŭnik nakiroŭvaŭsia ŭ padraździaleńnie HKSE dla prachodžańnia sudova-miedycynskaj ekśpiertyzy, adnak tudy jon tak i nie prybyŭ.
Kali śledčy padaŭ usie atrymanyja źviestki, mužčyna pryznaŭsia ŭ chłuśni. Žychar Žłobina rastłumačyŭ, što prydumaŭ incydent ź milicyjantami, bo pasvaryŭsia z sužycielkaj i vyrašyŭ joj dapiačy.
Žłobinski RASK admoviŭsia zavodzić kryminalnuju spravu ŭ dačynieńni da supracoŭnika orhanaŭ unutranych spraŭ, ale zavioŭ kryminalnuju spravu ŭ dačynieńni da zajaŭnika pa č. 1 art. 400 (Zahadzia łžyvy danos ab ździajśnieńni złačynstva) Kryminalnaha kodeksa Respubliki Biełaruś.
