U Čechii pamierła televiadučaja, jakaja paviedamiła pad rulami aŭtamataŭ ab akupacyi ŭ 1968-m
blesk.cz
U Čechii pamierła były dyktar radyjo i telebačańnia Kamiła Maŭčkava. Joj było 92 hady. Jana była adnoj ź pieršych televiadučych u Čechasłavakii i Jeŭropie, piša «Radyjo Svaboda».
U noč na 21 žniŭnia 1968 hoda, paśla ŭvodu ŭ Čechasłavakiju vojskaŭ Varšaŭskaj damovy, Maŭčkava prybyła na pracu i pieradavała infarmacyju hledačam da taho času, pakul nie byli vyklučanyja pieradatčyki. U studyi ŭ hety čas znachodzilisia ŭzbrojenyja sałdaty.
Maŭčkava naradziłasia ŭ 1928 hodzie ŭ siamji kamunistyčnaha funkcyjaniera, žurnalista i byłoha hałoŭnaha redaktara aficyjnaj haziety češskich kamunistaŭ Rudé právo Vilema Novaha. Paśla Druhoj suśvietnaj vajny skončyła kansiervatoryju, z 1948 hoda vystupała ŭ teatry ŭ Prazie. Nieŭzabavie Maŭčkava stała pracavać na čechasłavackim radyjo, a z 1956 hoda prymała ŭdzieł u televiaščańni. Z 1958 hoda stała pracavać viadučaj telenavin. Karjery Maŭčkavaj nie pieraškodziŭ aryšt baćkoŭ, asudžanych pa palityčnym artykule ŭ pačatku 1950-ch hadoŭ.
Sama Maŭčkava pryznavałasia, što da Pražskaj viasny ŭdzielničała ŭ raspaŭsiudzie kamunistyčnaj ideałohii. «Ja ŭsprymała heta bolš jak prafiesiju lektara. Źmiest byŭ druhasny. Viadoma, ja nie mahu apraŭdać siabie za toje, što tak było», — zajaviła dyktar u adnym ź intervju.
london.czechcentres.cz
U 1969 hodzie Maŭčkava była vymušanaja pakinuć vialiki ekran, a nieŭzabavie i telebačańnie. Joj było ciažka znajści novuju pracu, davodziłasia padpracoŭvać u teatralnym bufiecie i zajmacca ručnoj pracaj.
U 1976 hodzie Maŭčkava padpisała Chartyju-77.
Paplečniki i kalehi Maŭčkavaj adznačali, što 20 hadoŭ zabyćcia paśla 1968 hoda nie ścierli ŭspaminy pra televiadučuju. Kali padčas aksamitnaj revalucyi ŭ 1989 hodzie Maŭčkava vyjšła na bałkon hatela «Miełantrych», usia Vacłaŭskaja płošča pačała skandavać jaje imia.
Paśla revalucyi Maŭčkava viała prahramu «Abjektyŭ», supracoŭničała z «Radyjo Svaboda».
U 2013 hodzie prezident Čechii Miłaš Zeman uručyŭ Maŭčkavaj miedal «Za zasłuhi I stupieni». Tady Zieman nazvaŭ televiadučuju simvałam Pražskaj viasny 1968.
