MARH rastłumačyŭ, čamu nichto nie moža zabaranić šarłatanskuju hazietu «Cielebnik'»
Niekalki tydniaŭ tamu čytač vydańnia «Anłajnier» padzialiŭsia fota brašury, jakuju raskidajuć pa paštovych skryniach. U hetaj «haziecie» — historyi, jakija majuć na mecie maksimalna napałochać čytača dziela taho, kab paśla jaho raskrucić na nabyćcio cudadziejnych srodkaŭ, jakija pavinny dapamahčy ad usich chvarob. Ci možna na heta vydańnie znajści ŭpravu, raskazała ahienctva «Minsk-Naviny».
U Ministerstvie antymanapolnaha rehulavańnia i handlu patłumačyli, što hetaja hazieta parušaje niekalki artykułaŭ Zakona Respubliki Biełaruś ad 10 maja 2007 hoda №225-Z «Ab rekłamie».
«Zhodna z punktam 8 artykuła 10 abjavy nie pavinny ŭtrymlivać ukazańnie na lačebnyja ŭłaścivaści prapanavanych tavaraŭ, — rastłumačyli ŭ viedamstvie. — Vyklučeńnie składajuć tolki aficyjna zarehistravanyja ŭ Respublicy Biełaruś lekavyja preparaty, vyraby miedycynskaha pryznačeńnia i miedycynskaja technika, a taksama mietady akazańnia miedycynskaj dapamohi, rabot i (abo) pasłuh, jakija składajuć miedycynskuju dziejnaść».
Pavodle infarmacyi Ministerstva achovy zdaroŭja, srodki, prapanavanyja ŭ vydańni «Cielebnik'», da takich nie naležać.
Taksama siarod parušeńniaŭ — uviadzieńnie spažyŭca ŭ zman adnosna ŭłaścivaściaŭ prapanavanaj pradukcyi (p. 3 art. 26 zakona «Ab rekłamie»), adsutnaść źviestak pra rekłamadaŭcu (p. 4 art. 10 zakona «Ab rekłamie»).
Tym nie mienš, spynić raspaŭsiud brašury pakul, maŭlaŭ, mahčymaści niama. Na terytoryi Minska hetym zajmajecca arhanizacyja «FitamaksTrejd», i za minuły hod na jaje byli składzienyja try pratakoły i nakładzieny štraf sumaj 140 bazavych adzinak. Ale ŭ vydańni «Cielebnik'» niama nijakaj infarmacyi pra pradaŭca tavaraŭ i miesca vytvorčaści rekłamnaha vydańnia.
MARH, jak śćviardžajecca, nakiroŭvaŭ materyjały ŭ Ministerstva pa padatkach i zborach i Ministerstva infarmacyi ab akazańni sadziejańnia ŭ nadańni infarmacyi. Adnak heta, maŭlaŭ, nie dało vynikaŭ.
Nie atrymałasia taksama vyśvietlić, što za arhanizacyja vydaje hazietu «Cielebnik'», pakolki toj, chto heta robić, nie maje adpaviednaj licenzii.
Čytajcie taksama:
Bondarava zaniałasia fizijałohijaj mozha: vyjaviła źmieny hipofiza pry mienstruacyi
pahladzicie na čerhi-dyskateki 2020-ha hoda... što heta takoje było? jak nie čarhovaja zambavanaja (chaj nie telikam, a telehramam - jakaja roźnica?) masa biez krytyčnaha myśleńnia maładych ludziej