Z Mahiloŭskaha dramteatra zvolnili lehiendarnaha dyrektara Andreja Novikava. Jon uznačalvaŭ kalektyŭ 20 hadoŭ
Fota Anžaliki Vasileŭskaj
Dyrektar Mahiloŭskaha dramteatra Andrej Novikaŭ zvolnieny sa svajoj pasady. Pra heta Tut.by paviedamili ŭ pres-słužbie kalektyvu.
Jak paviedamili ŭ pres-słužbie, «kalektyŭ ličyć rašeńnie ab zvalnieńni kiraŭnika niespraviadlivym i źviarnuŭsia ŭ abłvykankam z prośbaj nie vyzvalać ad zajmanaj pasady A. F. Novikava, dalej maje namier źviartacca ŭ vyšejšyja instancyi».
Andrej Novikaŭ z adukacyi historyk. Pracavaŭ u abłasnym upraŭleńni kultury. U 2000 hodzie byŭ pryznačany dyrektaram teatra. Mienavita pry im kalektyŭ viarnuŭsia ŭ svoj budynak paśla praciahłaha ramontu (1992-2001).
Dziakujučy Novikavu Mahiloŭskaja drama stała viadomaj u krainie.
Z 2006 hoda ŭ horadzie pravodziŭsia Mižnarodny moładzievy teatralny forum «[email protected]» — adzin z samych najlepšych teatralnych fiestyvalaŭ Biełarusi. U Dyrekcyi forumu niaźmienna pracavaŭ dyrektar teatra.
Andrej Novikaŭ — adzin z najbolš pavažanych teatralnych dyrektaraŭ Biełarusi. Jaho sychod — vialiki ŭdar dla biełaruskaj kultury ŭ cełym i dla Mahilova ŭ pryvatnaści.
Adstaŭku Novikava źviazvajuć z hramadzianskaj pazicyjaj, jakuju trupa teatra zajmała ŭ 2020 hodzie.
13 žniŭnia paśla zatrymańnia režysiora Uładzimira Piatroviča 13 supracoŭnikaŭ teatra napisali zajavy ab vychadzie z prafsajuza.
26 žniŭnia 26 supracoŭnikaŭ teatra apublikavali adkryty list, u jakim zaklikali ŭładu «da realnaha, a nie pakaznoha dyjałohu, vykarystańnia demakratyčnych miechanizmaŭ urehulavańnia kanfliktu». U tym liku, jany zapatrabavali «nie dapuskać zakryćcia teatraŭ z-za palityčnych pohladaŭ rabotnikaŭ» (havorka išła ab Kupałaŭskim teatry), «spynić pieraśled aktyvistaŭ i nie zhodnych ź dziejańniami ŭłady hramadzian; nieadkładna spynić hvałt z boku siłavych orhanaŭ».
