Abama pra pieršuju sustreču z Pucinym: Na stale stajaŭ samavar, jaki raździmaŭ botam mužčyna ŭ kasavarotcy
Na hetym tydni ŭ śviet vyjšli miemuary byłoha prezidenta ZŠA Baraka Abamy «Ziamla zapavietnaja».
U pieršyja ž sutki kniha razyšłasia nakładam u 890 000 asobnikaŭ tolki ŭ ZŠA i Kanadzie — rekord dla Vydavieckaha doma Penguin Random House. Čakajecca, što adkryćci 44-ha prezidenta stanuć samymi pradavanymi ŭ historyi z usich prezidenckich miemuaraŭ, piša VVS.
Fota: Vikipiedyja
U svajoj knizie Abama raspaviadaje nie tolki ab amierykanskaj palitycy i prablemach va ŭłasnym siamiejnym žyćci. Značnaja častka miemuaraŭ pryśviečana jaho zamiežnym pajezdkam i, naturalna, sustrečam z suśvietnymi lidarami.
Upieršyniu ŭ jakaści prezidenta Abama pabyvaŭ u Rasii letam 2009 hoda. Pierad vizitam kiraŭnika Biełaha doma kansultavaŭ supracoŭnik Rady nacyjanalnaj biaśpieki ZŠA Majkł Makfoł.
Prezidentam Rasii byŭ Dźmitryj Miadźviedzieŭ, jaki zrabiŭ na Abamu ŭražańnie «sučasnaha palityka», zacikaŭlenaha va ŭstalavańni dobrych adnosin z ZŠA. Makfoł zahadzia papiaredziŭ Abamu, što Miadźviedzieŭ sapraŭdy sprabuje dakazać svaju «surjoznuju rolu na suśvietnaj arenie».
«Nie zabyvajcie, što rašeńni pa-raniejšamu prymaje Pucin», — udakładniŭ daradca prezidenta.
Heta paćvierdziłasia. Adnoj z hałoŭnych prablem u dvuchbakovych adnosinach tady była «trochdzionnaja vajna» z Hruzijaj. Abama uspaminaje, što ledź ab hetym zajšła razmova, Miadźviedzieŭ, «jak byccam jaho trymali na łancuhu», paŭtaryŭ usie dovady aficyjnaj rasijskaj ułady. Ale kali havorka zajšła ab inšych pytańniach, jon vidavočna rassłabiŭsia i z zadavalnieńniem vioŭ hutarku.
«Jon jak byccam sprabavaŭ pakazać mnie, što i sam nie vieryć nivodnamu svajmu słovu», — piša Barak Abama.
Paśla hetaha amierykanski hość sustreŭsia ŭ Nova-Aharovie z Uładzimiram Pucinym, jaki zajmaŭ tady pasadu premjer-ministra.
Abamu prymali na vierandzie rezidencyi, dzie byŭ «bahata nakryty stoł», a ŭ jakaści ruskaj ekzotyki prysutničaŭ niejki mužčyna ŭ kasavarotcy, jaki raździmaŭ botam samavar.
Sa słoŭ Abamy, rasijski lidar nahadaŭ jamu ludziej, ź jakimi jamu ŭžo davodziłasia sutykacca ŭ Čykaha, kali jon upieršyniu staŭ zajmacca palitykaj, — «niešta nakštałt rajonnaha bosa, ale tolki ź jadziernaj zbrojaj i vieta ŭ Radzie Biaśpieki AAN».
«Pucin nahadaŭ mnie mužčyn taho typu, jakija kaliści zapraŭlali čykahskaj palitykaj ci Tymani-chołam [dziejnaj u Ńju-Jorku ŭ XIX i da siaredziny XX stahodździa palityčnaj supolnaściu Demakratyčnaj partyi, jakaja rehulavała vyłučeńnie kandydataŭ i inš.]
— vychavanyja vulicaj, žorstkija, pazbaŭlenyja santymientaŭ typy; vuzkałobyja, jakija nikoli nie vychodzili za ramki svajho abmiežavanaha dośviedu i jakija rasceńvali «kryšu», chabary, šantaž, padman i pieryjadyčny hvałt jak zakonnyja mietady svajoj dziejnaści», — piša Abama.
Čykahskaja palityčnaja «mašyna» ŭ ZŠA ŭžo daŭno stała simvałam karupcyi.
Jak uspaminaje były kiraŭnik Biełaha doma, rasijski lidar u samym pačatku razmovy chacieŭ padrabiazna vykłaści ŭsie svaje pretenzii da ZŠA.
«Ja ledź paśpieŭ skončyć svajo pytańnie, jak Pucin puściŭsia ŭ, zdavałasia, biaskoncy manałoh, — śćviardžaje Abama ŭ svaich miemuarach. — Jon padrabiazna pieraličyŭ usie vypadki ŭjaŭnaj niespraviadlivaści […] i niepavahi da ruskich z boku amierykancaŭ. Nahadaŭ, što mienavita jon patelefanavaŭ prezidentu Bušu 11 vieraśnia […], prapanavaŭšy dać dadzienyja vyviedki».
Rasijski lidar taksama zhadaŭ, što jon dapamoh ZŠA ŭhavaryć ułady Uźbiekistana i Kyrhyzstana raźmiaścić u hetych krainach amierykanskija vajskovyja bazy. Jak uspaminaje Abama, Pucin asabliva padkreśliŭ, što Buš nie «prysłuchaŭsia da jahonych papiaredžańniaŭ» i svaim uvarvańniem u Irak «destabilizavaŭ Blizki Uschod».
U svaim manałohu Pucin taksama zhadaŭ ab pašyreńni NATA i «kalarovych revalucyjach», jakija byli arhanizavanyja ZŠA ŭ «rasijskaj śfiery ŭpłyvu», i sproby Vašynhtona «daminavać va ŭsim śviecie».
Da taho ž, na dumku Pucina, Złučanyja Štaty nie bačać u Rasii «raŭnapraŭnaha partniora», tak što ŭ hetych umovach ciažka spadziavacca na palapšeńnie dvuchbakovych adnosin.
Abama śćviardžaje, što ažyŭleny manałoh Pucina praciahvaŭsia roŭna 45 chvilin. Paśla hetaha amierykanski lidar pasprabavaŭ było padrabiazna adkazać na ŭsie vykazanyja pretenzii, ale ŭ jaho skłałasia ŭražańnie, što premjer-ministru Rasii hetyja tłumačeńni byli nie cikavyja. Prynamsi, Pucin słuchaŭ svajho hościa nie nadta ŭvažliva.
