Žychar Baranavičaŭ z-za techničnaj pamyłki atrymaŭ 700 tysiač rubloŭ, ale patraciŭ nie ŭsio
Biełarus, jaki zachaplajecca azartnymi hulniami, vyrašyŭ praz ARIP papoŭnić svoj rachunak na adnoj z takich hulniavych placovak. Ale z-za techničnaha zboju na baku arhanizatara nie ŭsie pieravody prachodzili. Paźniej na rachunku hulca źjavilisia lišnija amal 695 tysiač rubloŭ. Mužčyna paśpieŭ patracić častku hrošaj na hulni i vyvieści niekatoruju sumu, ale ŭ vyniku akazaŭsia ŭ sudzie. Padrabiaznaści hetaj historyi źjavilisia ŭ Banku sudovych rašeńniaŭ, piša «Lusterka».
Ilustracyjnaje fota
Sud Baranavickaha rajona i horada Baranavičy ŭ kancy śniežnia minułaha hoda razhledzieŭ pazoŭ bukmiekierskaj firmy Betera da adnaho sa svaich klijentaŭ.
Tak, u sakaviku minułaha hoda karystalnik praz ARIP sprabavaŭ papoŭnić svoj hulniavy rachunak, ale prajšło tolki niekalki płaciažoŭ (ahułam na 1849 rubloŭ), astatnija — nie (na 694 508 rubloŭ). Jak paźniej vyśvietliłasia, hrošy nie pastupali z-za techničnaha zboju na baku arhanizatara azartnaj hulni. Ale ŭ adzin ź dzion na rachunku mužčyny źjavilisia lišnija 694 508 rubloŭ. Pry hetym z bankaŭskaha rachunku hetyja hrošy nie byli śpisanyja.
Da taho jak kampanija zabłakavała rachunak hulca, jon paśpieŭ zrabić bukmiekierskija staŭki amal na 308,7 tysiačy rubloŭ: častka ź ich byli projhryšnymi, a druhaja — udałymi (hetyja srodki viarnulisia na rachunak).
Mužčyna za hety čas vyvieŭ vyjhryš na 18 340 rubloŭ, zapłaciŭ ź jaho padatak. Paśla ŭsich hetych manipulacyj kampanija zabłakavała rachunak hulca.
Roźnica pamiž pamyłkova zaličanaj sumaj i toj, jakaja na toj momant była na jaho rachunku, skłała 60,5 tysiačy rubloŭ. Kampanija dasłała klijentu list, u jakim patrabavała viarnuć prysabiečanyja srodki.
«Adnak (jano) adkazčykam praihnaravana, dziejańniaŭ pa viartańni sumy pradpryniata nie było», — paviedamlajecca ŭ banku sudovych rašeńniaŭ.
U vyniku kampanija padała pazoŭ na svajho klijenta. Hulec u sudzie kazaŭ, što paličyŭ «lišnija» hrošy na rachunku bonusam ad arhanizatara.
Z mužčyny spahnali sumu, jakuju straciła kampanija (60,5 tysiačy rubloŭ), a taksama dziaržpošlinu ŭ 3026 rubloŭ. Ahułam vyjšła krychu bolš za 63,5 tysiačy rubloŭ.
