«Škodzicie imidžu ŭłady». Da vykładčykaŭ Połackaha ŭniviersiteta pryjechali z prakuratury paśla videazvarotu
U paniadziełak vykładčyki i supracoŭniki Połackaha dziaržaŭnaha ŭniviersiteta apublikavali videazvarot da ŭładaŭ i naroda Biełarusi. A na nastupny dzień usich zaprasili na razmovu z prakuraturaj.
Skrynšot ź videa
U videa vykładčyki patrabavali svabodnych i spraviadlivych vybaraŭ, vyzvaleńnia niavinna asudžanych i zatrymanych, pakarańnia za złačynstvy suprać čałaviečnaści.
«Słavutyja ziemlaki pakinuli nam zapaviet: žyvi ŭ lubovi, žyvi pa praŭdzie, žyvi sumlenna, barani Biełaruś ad zła. Nas mnoha roznych — Biełaruś adna. Dziela Radzimy budziem razam», — prosiać jany ŭ zvarocie.
Jak raskazali «Našaj Nivie», usim, chto źniaŭsia ŭ videa i byŭ u citrach (kala 20 čałaviek), patelefanavali z dekanataŭ, kab źjavilisia va ŭniviersitecie dla sustrečy z prakuraturaj. Kahości ŭ aŭtorak vyklikali ŭ Połacku, kahości ŭ Navapołacku.
«Była prafiłaktyčnaja razmova nakont taho, što tak nielha rabić. Vydali papiaredžańni ab tym, što raspaŭsiud niedakładnaj infarmacyi, jakaja škodzić imidžu ŭłady i dziaržaŭnych orhanaŭ, moža być pieraśledavany pa zakonie. Pužali artykułam 342 Kryminalnaha kodeksa, naprykład.
Ale papiaredžańnie nie ŭsie padpisali», — padzialiŭsia adzin z supracoŭnikaŭ.
U samim univiersitecie z boku rektarata cisku praź videazvarot nie było.
