«Cieła pakul nie addajuć». Siamja Ramana Bandarenki raspaviała, što adbyvajecca
vk.com
Trahičnaj hibiellu 31-hadovaha Ramana Bandarenki zaraz zajmajecca Hienieralnaja prakuratura. Ranicaj siamja pajechała ŭ viedamstva, kab atrymać dazvoł na vydaču cieła, ale na pryjom nie zmahła trapić. Z mamaj Ramana taksama nichto nie źviazvaŭsia, piša Tut.by.
— Mama Ramana siońnia dvojčy pryjazdžała ŭ Hienieralnuju prakuraturu. A 9-j ranicy dziažurny skazaŭ pryjazdžać ab 11.00, potym skazali čakać adkazu i źviartacca paźniej, — raspaviadaje Volha Kučarenka, stryječnaja siastra Ramana Bandarenki.
Uviečary 12 listapada źbity małady čałaviek pamior u balnicy chutkaj miedycynskaj dapamohi. Daktary napiaredadni skazali rodnym: u Ramana šaniec vyžyć adzin z tysiačy.
31-hadovy Raman Bandarenka 11 listapada vyjšaŭ na Płošču Pieramien», kab spytać u ludziej u cyvilnym i maskach, navošta jany zdymajuć bieł-čyrvona-biełyja stužki. Jak raspaviadali vidavočcy, na Ramana nakinulisia nieviadomyja, stali bić, a potym «prafiesijna zatrymali» i adnieśli ŭ mikraaŭtobus. Praz paŭtary hadziny jon byŭ dastaŭleny z Centralnaha RUUS Mienska ŭ balnicu. Apieracyja doŭžyłasia niekalki hadzin, žyćcio maładoha čałavieka vyratavać nie ŭdałosia.
Pravierku pa fakcie śmierci pačaŭ pravodzić Śledčy kamitet, a 13 listapada Alaksandr Łukašenka daručyŭ Hienprakuratury ŭziać pad kantrol rasśledavańnie hibieli ramana Bandarenki.
— Jašče ŭ piatnicu byli ŭ Śledčym kamitecie, tam adkazali, sprava ŭžo ŭ Hienprakuratury, źviartacca varta tudy. My tak i zrabili, adkaz nie atrymali. Nam kazali, što mienavita śledčy pavinien dać dazvoł na vydaču cieła, — raspaviadaje Volha. — My nie viedajem ničoha: zrabili ekśpiertyzu ci nie, cieła Ramana nam pakul nie addali, z nami nichto nie źviazvaŭsia. Treba ž płanavać pachavańnie… pajšoŭ čaćviorty dzień.
Blizkija Ramana raspaviadajuć, što adzin z rytualnych załaŭ prapanavaŭ im svaje pasłuhi, a potym skazaŭ: «My vymušanyja vam admović». Kankretnych pryčyn nie patłumačyli.
