Sud za sarvanuju ź siłavika masku nie pačaŭsia. Dziaŭčynu abviaścili ŭ vyšuk
Siońnia, 12 listapada, u sudzie Leninskaha rajona Minska mieŭsia pačacca razhlad kryminalnaj spravy pavodle art. 364 KK (Hvałt u dačynieńni da supracoŭnika milicyi) u dačynieńni da Julii Łuščeŭskaj. 11 vieraśnia jana sarvała masku z supracoŭnika AMAPa kala budynka Minabłsuda. Adnak sud pryjšłosia pieranieści na niavyznačany čas: miescaznachodžańnie Julii Łuščaŭskaj nieviadomaje. Vierahodna, dziaŭčyna źjechała ź Biełarusi. Sud abviaściŭ minčanku ŭ vyšuk, paviedamlajuć pravaabaroncy.
11 vieraśnia Julija razam ź inšymi ludźmi pryjšła da budynka suda padtrymać pradstaŭnikoŭ strajkama «Biełaruśkalija». Kiraŭnictva pradpryjemstva patrabavała pryznać strajk niezakonnym. Pryjechali siłaviki i pačali zatrymlivać ludziej prosta pierad sudom. Pry zatrymańni Julija sarvała ź siłavika masku. Incydent trapiŭ na videa.
Sudździa Leninskaha suda Maryna Zapaśnik aštrafavała Juliju za hety vypadak pa dvuch artykułach KaAP: 23.34 (Parušeńnie paradku arhanizacyi i praviadzieńnia masavych mierapryjemstvaŭ) i 23.4 (Niepadparadkavańnie zakonnym patrabavańniam słužbovaj asoby) na 50 bazavych vieličyń (1350 rubloŭ).
Adnak na dziaŭčynu raspačali jašče i kryminalnuju spravu pa artykule 364 Kryminalnaha kodeksa — hvałt u dačynieńni da supracoŭnika milicyi. Julii Łuščeŭskaj abrali mieru strymańnia — padpiska ab niavyjeździe.
12 listapada dziaŭčyna ŭ sud nie źjaviłasia. Jak paviedamlaje pravaabaronca Alaksiej Łojka, jaki ažyćciaŭlaŭ manitorynh sudovaha pracesu, u sudzie prymałasia rašeńnie ab mahčymaści razhladu kryminalnaj spravy ŭ adsutnaść Łuščeŭskaj. Dziaržabvinavaŭca Alaksandr Ramanovič zajaviŭ, što sud nieabchodna adkłaści da vyśviatleńnia miesca znachodžańnia abvinavačanaj.
Sudździa Taćciana Šocik pastanaviła abviaścić Juliju Łuščaŭskuju ŭ vyšuk.
Taksama jana pryniała rašeńnie źmianić mieru strymańnia z padpiski ab niavyjeździe na ŭtrymańnie pad vartaj. Heta značyć, što pry zatrymańni Łuščeŭskuju pavinny adrazu źmiaścić u SIZA-1 i apaviaścić sud.
