Matč, jaki moža vyznačyć čempijona, i zmahańnie za «bronzu». Što cikavaha budzie ŭ 28-m tury čempijanatu pa futbole
Padčas dvuchtydniovaj paŭzy ŭ čempijanacie Biełarusi dahulali ŭsie pieraniesienyja hulni i vyraŭniali tablicu. Ciapier usie kamandy majuć pa 27 zhulanych matčaŭ, tamu možna zrabić peŭnyja vysnovy.
Razam z Bukmiekierskaj kantoraj Leon praciahvajem sačyć za vyšejšaj lihaj.
Davajcie zahlaniem u tablicu:
Ź imaviernaściu ŭ 95% možna skazać, što razam sa «Smalavičami» vyšejšuju lihu pakinie «Biełšyna». Babrujčanie amal zmahli vyratavacca, ale pakul jany siadzieli na karancinie, «cukrovyja» kamandy niaŭčas pierastali buksavać.
Z pary «Słuck» — «Haradzieja» ŭ stykavyja matčy, chutčej za ŭsio, adpravicca druhaja kamanda. «Bieła-zialonyja» nikoli nie vyjhravali ŭ Słucku (u subotu tam projdzie «cukrovaje» derbi), a paśla ich čakajuć matčy z bresckim «Dynama» i «Isłačču», jakija taksama majuć vialikuju matyvacyju. Słuččakoŭ ža ŭ apošnim tury čakaje hulnia sa «Smalavičami», dzie, vidać, jany i zabiaśpiečać siabie vyratavalnym 13-m radkom.
Fota: FK «Słuck».
U apošni dzień kastryčnika bresckaje «Dynama» niečakana zhulała ŭničyju ŭ Mazyry i źviało svaje pierśpiektyvy na čempijonstva da nula. Z ulikam haračaha kalendara (napieradzie jašče matčy suprać pramych kankurentaŭ z Žodzina i Hrodna) zachavać by «bronzu».
Pa spartovych ŚMI papaŭźli čutki, što prajektu pad nazvaj «Dynama-Brest» u ciapierašnim vyhladzie zastałosia niašmat. Kažuć, što Alaksandr Zajcaŭ pieraklučycca na «Ruch», kudy pieraciahnie častku lidaraŭ «Dynama». Astatnich užo svatajuć u inšyja kłuby: Kiślaka i Bykava — u minskaje «Dynama», Savickaha — u «Šachcior».
Što tyčycca čempijonskaj intryhi, to nas čakaje matč siezonu, dzie ŭ Salihorsku «Šachcior» prymie BATE. Salihorcy praviali niebłahuju repietycyju, u pieraniesienym matčy razhramiŭšy «Biełšynu» ź likam 5:1, i hatovyja pazmahacca za druhoje čempijonstva ŭ historyi.
Fota: FK «Šachcior».
BATE vielmi važna pieramahčy ŭ subotu i nie raściahvać intryhu da apošniaha tura, dzie im hulać suprać minskaha «Dynama», jakoje nabrała dobry chod. Vyjhravaj «Šachcior», a paśla dematyvavanuju «Biełšynu» — i ty čempijon. BATE bolš za try hady nie moža vyjhrać u stalicy harniakoŭ, tamu nas čakaje pa-sapraŭdnamu haračaja hulnia.
Ale 28-y tur budzie cikavy nie tolki matčam u Salihorsku. Pra heta — u našym tradycyjnym ahladzie.
«Isłač» — «Minsk»
«Isłač» nie prajhraje ŭ vyšejšaj lizie ažno dzieviać turaŭ, ale zajzdrosnaja chada «vaŭkoŭ» zamarudziłasia — apošnija try hulni skončylisia ŭničyju, što adkinuła kamandu na siomy radok.
«Minsk» nie vyrašaje turnirnych zadač, ale Vadzimu Skrypčanku ŭdałosia stvaryć kamandu, jakaja moža začapić luboha favaryta.
Prahnoz «NN»: totał, bolšy za 2.5.
«Viciebsk» — «Ruch»
- 06.11, 18:00. CSK FK «Viciebsk»
Chutčej za ŭsio, «Ruch» skončyć svoj debiutny siezon u vyšejšaj lizie na miažy pieršaj pałovy. Mahło b być lepš, dva matčy bieź pieramoh pakinuli kamandu Siadniova biez vysokich turnirnych pierśpiektyŭ.
U «Viciebska», zdajecca, druhi zapar niaŭdały siezon. Letaś chacia b byŭ finał Kubka, a sioleta nieviadoma, čym možna apraŭdać pramiežkavy dziasiaty radok.
Prahnoz «NN»: ničyja.
«Smalavičy» — «Nioman»
- 07.11, 13:00. Smalavičy, stadyjon «Aziorny»
Paśla dźviuch paraz «Nioman» nie tolki zastaŭsia biez nadziej na čempijonstva, ale i dazvoliŭ bresckamu «Dynama» vykinuć siabie z trojki.
Šancy na miedali jašče zastajucca niebłahimi. Dla hetaha treba pieramahać najhoršuju kamandu lihi, a dla viartańnia ŭ čempijonskuju honku treba čakać ničyju ŭ Salihorsku.
Prahnoz «NN»: pieramoha «Niomana».
«Słuck» — «Haradzieja»
- 07.11, 15:00. Słuck, stadyjon «Haradski»
- Kaeficyjenty: «Słuck» (pieramoha) — 2.26; ničyja — 3.33; «Haradzieja» (pieramoha) — 3.60
My ŭžo zhadvali, što «Haradzieja» nikoli nie vyjhravała ŭ «Słucku»: ni ŭ čempijanacie vobłaści, ni ŭ vyšejšaj lizie. Ale, kali pamiatajecie, sioleta žodzinskaje «Tarpieda» zmahło ŭpieršyniu vyjhrać doma ŭ BATE, tamu ŭsim sieryjam rana ci pozna prychodzić kaniec.
U pieršaj pałovie čempijanatu «Haradzieja» razhramiła «Słuck», ale «cukrovyja» derbi ŭ Słucku nie adroźnivajucca halavymi fiejeryjami. Heta tendencyja naŭrad ci pierarviecca.
Prahnoz «NN»: totał, mienšy za 2.5.
«Dynama-Brest» — «Tarpieda-BiełAZ»
- 07.11, 17:00. DASK «Brescki»
- Kaeficyjenty: «Dynama» (pieramoha) — 2.19; ničyja — 4.00; «Tarpieda» (pieramoha) — 3.18
U žodzincaŭ usiaho adna paraza ŭ apošnich dziesiaci turach i tolki adzin bał adstavańnia ad treciaha miesca. Na jakim — bresckaje «Dynama».
Tamu łohika prostaja: kamandzie Puntusa treba prosta pieramahčy ŭ Breście. Inšych varyjantaŭ pry najaŭnaści turnirnych ambicyj prosta niama.
Prahnoz «NN»: «Tarpieda» nie prajhraje.
«Šachcior» — BATE
- 07.11, 19:00. Salihorsk, stadyjon «Budaŭnik»
Vielmi darečy dla «Šachciora» znoŭ pačaŭ zabivać Džasurbiek Jachšybojeŭ. Uźbiek maŭčaŭ amal dva miesiacy, daŭšy siabie abahnać u honcy bambardziraŭ, ale ŭ apošniaj hulni z «Biełšynaj» aformiŭ chiet-tryk.
Hulnia BATE i «Šachciora» ŭ pieršym kruzie skončyłasia skandałam. Jak budzie na hety raz? Fota: FK «Šachcior».
Jak Jachšybojeŭ moža hulać, u stanie BATE vydatna pamiatajuć — a vy pamiatajecie matč pieršaha tura, dzie Jachšybojeŭ u składzie «Enierhietyka» paździekavaŭsia z barysaŭcaŭ?
Prahnoz «NN»: ničyja.
«Biełšyna» — «Enierhietyk-BDU»
- 08.11, 13:00. Babrujsk, stadyjon «Spartak»
Hulnia z «niematyvavanymi» minčukami — apošni šaniec chacia b za niešta začapicca ŭ siezonie dla «Biełšyny».
Fota: FK «Biełšyna».
«Enierhietyk» za druhuju pałovu siezona rastranžyryła ŭsio, što ŭdałosia zavajavać raniej, ale navat i taki finał na miažy dziasiatki ŭ paraŭnańni ź letašnim 12-m radkom — užo prahres.
Prahnoz «NN»: pieramoha «Biełšyny».
«Słavija» — «Dynama-Minsk»
- 08.11, 15:00. Mazyr, stadyjon «Junactva»
Minskaje «Dynama» vyjhrała čatyry hulni zapar i ŭžo šostaje. Usiaho za try bały ad «bronzy».
U kamandy Kučuka raskład davoli kamfortny: «Słavija», «Enierhietyk-BDU» i BATE ŭ apošnim tury, jaki ŭžo moža być niematyvavanym. Tamu, mahčyma, minskaje «Dynama» moža pieratvaryć patencyjna pravalny siezon u davoli paśpiachovy.
Prahnoz «NN»: pieramoha «Dynama».
Dzialiciesia prahnozami ŭ kamientarach. Kali ličycie siabie ekśpiertam u biełaruskim futbole, zrabicie staŭku ŭ Bukmiekierskaj kantory Leon!