Pieršyja admovy. Rabotnika MNS z Łahojska źbili dubinkami paśla vybaraŭ — zavodzić kryminalnuju spravu nie stali
Dniami zakančvajucca terminy pravierki pa zajavach ad paciarpiełych u pieršyja dni paśla vybaraŭ. Praz try miesiacy śledčyja pavinny abo raspačać kryminalnuju spravu, abo admović u joj. I ŭžo viadoma pra pieršyja admovy.
Juryj Kryvašej byŭ zatrymany 11 žniŭnia ŭ Łahojsku. Razam z žonkaj i maleńkim dziciem jon jechaŭ u kramu na mašynie, kali ich spyniła DAI. Inśpiektar paprasiŭ vyjści z aŭto i pakazać dakumienty. Pakul išła pravierka, pobač niečakana spyniŭsia busik, adkul vyskačyli ludzi ŭ čornym z dubinkami. Juryja zapchali ŭ mašynu i pavieźli ŭ adździaleńnie milicyi.
Fota z archiva Juryja
U busiku mužčynu źbivali dubinkami. U RAUS jamu skrucili ruki i adviali ŭ padvał. Kala troch hadzin Juryj pralažaŭ na plitcy z rukami za śpinaj. U toj ža viečar, pa słovach mužčyny, jaho prymusili padpisać rapart ab zvalnieńni — Kryvašej tady pracavaŭ u MNS.
U pratakole napisali, što Juryj admoviŭsia pakazać dakumienty DAI i prajechać u adździaleńnie milicyi dla vyznačeńnia asoby. Pa artykule 23.4 (Niepadparadkavańnie słužbovym asobam) jamu dali 10 sutak aryštu.
U Łahojskim IČU mužčynu ŭžo nie źbivali.
«Skazali navat: prabačcie za našy ŭmovy. Ja raniej fotakarespandentam byŭ, supracoŭničaŭ z hazietaj i amal usich u izalatary viedaŭ u tvar. Moža, im tamu niajomka stała», — uspaminaje Juryj.
Vypuścili jaho praź piać sutak — paśla taho jak žychary rajona ŭzbuntavalisia i patrabavali ad načalnika łahojskaj milicyi Siarhieja Łosiča vyzvalić zatrymanych za palityku. Paźniej u abłasnym sudzie Juryj abskardziŭ svajo zatrymańnie — termin aryštu jamu skasili da tych samych piaci sutak.
17 žniŭnia Kryvašej pajšoŭ u miascovy Śledčy kamitet, napisaŭ zajavu i atrymaŭ nakiravańnie na sudekśpiertyzu. 18-ha źniaŭ paboi. U mužčyny byli hiematomy na śpinie, na rukach i nahach. Adzin z udaraŭ pryjšoŭsia pa kostcy — tolki dva tydni tamu naha pierastała baleć.
«Ale bolšaj była psichałahičnaja traŭma, — pryznajecca Juryj. — Bo ja nie čakaŭ, što mianie zatrymajuć, navat nie było nijakich padstaŭ, ja prosta jechaŭ u mašynie».
Mahčyma, pryčynaj pavyšanaj uvahi da jaho było toje, što mužčyna viadzie navinovy resurs «Pleŝienicy.by».
Tydzień tamu žonku Juryja vyklikali ŭ Śledčy kamitet u jakaści śviedki.
«Napačatku, kaniečnie, była nadzieja na spraviadlivaje raźbiralnictva. Ale kali ja ciapier atrymaŭ list, navat nie adkryŭšy jaho, viedaŭ, što tam budzie napisana», — kaža Juryj.
Raspačać kryminalnuju spravu admovili «za adsutnaściu ŭ dziejańni składu złačynstva» (p. 2 č. 1 art. 29 UPK). Taki adkaz pryjšoŭ ad śledčaj Łahojskaha rajona Iryny Karatkievič.
Z kopijaj pastanovy Juryj jašče nie paśpieŭ aznajomicca.
«Napeŭna, budu abskardžvać rašeńnie. Ale nie vieru, što atrymajecca», — kamientuje jon.
Paśla sychodu z MNS mužčyna pracuje biznes-analitykam. Za miesiac da zdareńnia jon zapisaŭsia na IT-kursy — tady jon jašče nie viedaŭ, što novyja viedy mohuć spatrebicca tak chutka.