U Słucku aštrafavali dvuch daktaroŭ, jakija vyjšli da płoščy pad nacyjanalnymi ściahami
Fota: Alesia Biełaja.
U paniadziełak, 2 listapada, u Słucku asudzili dvuch daktaroŭ, jakija 1 listapada vyjšli da płoščy ź bieł-čyrvona-biełym ściaham. Padtrymać ich pryjšło bolš za 40 čałaviek. Sud praviali ŭ budynku RAUS, paviedamlaje Infa-Kurjer.
Nahadajem, što asudzili Juryja Akajomava, traŭmatołaha-artapieda, zahadčyka traŭmatałahičnaha adździaleńnia Słuckaj CRB, i Juryja Michajłaŭskaha, lekara-chirurha. Ich abvinavacili pa častcy 1 artykuła 23.34 KaAP — «Parušeńnie paradku arhanizacyi abo praviadzieńnia masavych mierapryjemstvaŭ».
Na sudzie abodva doktara pryznali svaju vinu całkam. Pahadzilisia na razhlad spravy biez daśledavańnia dokazaŭ. Advakataŭ u ich nie było.
Daktary skazali, što vyjšli ź bieł-čyrvona-biełym ściaham, tamu što hety ściah raniej byŭ aficyjnym simvałam našaj krainy, a ciapier — simvał pratestu.
Juryj Akajomaŭ skazaŭ, što vyjści na akcyju ich zaachvociła niazhoda z mnohimi dziejańniami ŭłady.
Pakolki daktary pahadzilisia nie daśledavać dokazy i pryznali vinu, sud pastanaviŭ pryznać ich vinavatymi.
Kožny z daktaroŭ atrymaŭ štraf u 10 bazavych vieličyń (270 rubloŭ). Pasiadžeńnie praciahvałasia kala 15 chvilin.
Kali Juryj Akajomaŭ i Juryj Michajłoŭski vyjšli z budynka RAUS, hrupa słuččakoŭ, jakaja pryjšła padtrymać ich, sustreła daktaroŭ avacyjami.
