Maryja Kaleśnikava: «Nijakaha dyjałohu ŭ takich umovach być nie moža»
Fota Nadziei Bužan
Advakatu Maryi Kaleśnikavaj udałosia atrymać novyja kamientary adnosna subotniaj sustrečy ŭ SIZA i «śpiešnym napisańniem Kanstytucyi», paviedamlajecca ŭ akaŭncie Maryi ŭ fejsbuku.
Maryja ličyć, adznačajecca ŭ paviedamleńni, što nijakaha dyjałohu ŭ takich umovach być nie moža. Pierahavorščyki pavinny znachodzicca ŭ roŭnych umovach. Kazać pra vynikovaść pieramovaŭ niemahčyma, pakul usie palityčnyja viaźni nie adpuščanyja i znachodziacca ŭ turmie.
«Taki krok pakazvaje słabaść dziejučaj ułady. Na žal, nie pačutyja patrabavańni naroda, choć usie apošnija miesiacy niastomna havaryłasia ab nieabchodnaści dyjałohu i kampramisach», — adznačaje Maryja.
Nahadajem, što Maryja Kaleśnikava, jakaja znachodzicca ŭ žodzinskim SIZA, u sustrečy Łukašenki z palitviaźniami ŭ SIZA KDB udziełu nie brała. Jaje advakat skazaŭ žurnalistam, što jana admoviłasia jechać u Minsk. «Puł pieršaha», u svaju čarhu, zajaviŭ, što Maryju na sustreču nie zaprašali.
