Alaksandra Hierasimienia raskazała, jak tancavała z Łukašenkam na pieršaj sustrečy ź im
Płyŭčycha Alaksandra Hierasimienia ŭ intervju Youtube-kanału «Žizń-malina» raskazała, pry jakich abstavinach paznajomiłasia z Łukašenkam.
— Raskažy, kali pieršy raz ubačyła Łukašenku?
— Ja była jašče vielmi junaja. U mianie tady byli pieršyja pośpiechi ŭ płavańni. Ja śviatkavała Novy hod, jak i ŭsie. Śviatkavała nie doma, była ŭ haściach. A mnie patelefanavali i skazali być 1 studzienia na jalincy. A ja ž u haściach, naturalna, pieršaha studzienia ja nie budu zranku doma. I ja pryjšła ŭ džynsach, švedry i krasoŭkach. A tam ludzi ŭ viečarovych strojach. Ja navat nie viedaju, jak mianie puścili. Niajomka było, ale ja razumieła, što dziela hetaha nie hatovaja jechać dadomu i mianiać svoj harderob, kab pryjści na jalinku pryhožaj.
— Tabie patłumačyli, što heta prezidenckaja jalinka?
— Naturalna. U mianie jość svaje pryjarytety, tamu ja abrała ŭsio ž taki adpačyvać ź siabrami, śviatkavać svoj dzień naradžeńnia ŭ kole siabroŭ, čym biehčy dadomu, pieraapranacca (u Alaksandry 31 śniežnia dzień naradžeńnia — NN). Dla mianie heta ŭmoŭnaść. Kali mianie chočuć bačyć, jakaja roźnica, u čym ja budu: u viečarovaj sukiency ci voś tak. Naturalna, mnie było niekamfortna, bo ŭsie byli takija vaŭ, a tut ja takaja voś. Plus jašče, jak ja zrazumieła, byŭ zapłanavany taniec sa mnoj. Tamu ja zhańbiłasia pa poŭnaj.
— Raspaviadzi.
— Mianie zaprasiŭ prezident na taniec, i ja voś takaja pryhožaja ź im tančyła — u absalutna štodzionnaj vopratcy.
— A vy kamunikavali ŭ tancy?
— Sprabavali niejak. Ale muzyka była hučnaja, šumna, tamu tam asabliva nie pakamunikuješ. Pytałasia niešta takoje, ci zajmaŭsia jon sportam. Heta było litaralna paru chvilin.
— U vyniku nichto nie zrabiŭ tabie zaŭvahu?
— Nie.
— Byli takija momanty, kali ty zachaplałasia Łukašenkam?
— Dy kab zachaplacca čałaviekam, čałaviek pavinien zrabić niešta takoje, kab mianie zusim… Naŭrad ci. U mianie byli momanty, što heta kruta, kali prezident tabie ciśnie ruku, ciabie adznačyli. Nasamreč, tak, dla mianie heta było pryjemna, i kali mianie ŭznaharodžvali, značycca, ja niečaha vartaja, sam prezident zaprašaŭ mianie i ŭručaŭ uznaharody, ale kab zachaplacca, to takoha, napeŭna, i nie było.
