MZS raspaviało, kamu budzie addadzieny pryjarytet pry akredytacyi zamiežnych ŚMI
U MZS raskazali, jak prachodzić akredytacyja žurnalistaŭ zamiežnych ŚMI pa novych praviłach. Adpaviednaja zajava pres-sakratara MZS Anatola Hłaza raźmieščana na sajcie viedamstva.
Nahadajem, što 2 kastryčnika MZS admianiła akredytacyju ŭsich zamiežnych žurnalistaŭ. Heta było źviazana z tym, što viedamstva raspracavała novaje Pałažeńnie ab akredytacyi. Pryjom elektronnych zajavak na novuju akredytacyju pačaŭsia z hetaha paniadziełka.
Anatol Hłaz raskazaŭ, što padadziena bolš za 70 zajavak amal ad 15 zamiežnych ŚMI.
«Viadoma, u pieršuju čarhu, jak i abiacali, razhledzim raniej padadzienyja zajaŭki. Pasprabujem taksama apieratyŭna dać mahčymaść pracavać chacia b niekalkim žurnalistam roznych suśvietnych ŚMI, pakul razhladajucca dakumienty ich kaleh», — skazaŭ pradstaŭnik viedamstva.
Pry hetym jon padkreśliŭ, što adnaznačny pryjarytet na hetym etapie taksama budzie addadzieny hramadzianam tych krain, dzie zarehistravana zamiežnaje miedyja.
«Sučasnyja akredytacyjnyja kartki novaha ŭzoru taksama padrychtavany ŭžo. Niejkija pytańni, zrazumieła, mohuć uźnikać.
Naprykład, užo mahčymy pieršy precedent vykarystańnia kamisijaj punkta 11 pałažeńnia, jaki datyčycca pryncypu ŭzajemnaści pa tych vypadkach, dzie prymianiajucca abmiežavalnyja miery ŭ adnosinach da žurnalistaŭ biełaruskich ŚMI. Pa chodzie raboty kamisii situacyja budzie aktualizavacca», — dadaŭ Anatol Hłaz.
