Bolš za 800 biełaruskich dziejačaŭ kultury vykazalisia suprać hvałtu i falsifikacyj
Bolš za 800 muzykaŭ, mastakoŭ, akcioraŭ, vykładčykaŭ, režysioraŭ, litarataraŭ dy inšych dziejačaŭ i aktyvistaŭ padpisali Adkryty list z patrabavańniami pierahledzieć vyniki prezidenckich vybaraŭ, spynić hvałt, admianić «čornyja śpisy» i nie čynić cisk na majstroŭ kultury, nie zhodnych z palitykaj biełaruskich uładaŭ.
Padpisanty «adnahałosna i salidarna» patrabujuć:
— pravieści paŭtornyja vybary prezidenta Respubliki Biełaruś adpaviedna ź mižnarodnymi standartami, a taksama źniać z pasadaŭ dziejny skład CVK z pryciahnieńniem da praduhledžanaj zakanadaŭstvam adkaznaści;
— spynić zapałochvańnie i represii ŭ dačynieńni da rabotnikaŭ śfiery kultury z boku siłavych strukturaŭ i inšych słužbovych asobaŭ;
— likvidavać instytut «čornych śpisaŭ»;
— adnavić na pracoŭnym miescy ŭsich rabotnikaŭ śfiery kultury, jakija byli zvolnienyja za svaju hramadzianskuju pazicyju;
— vyzvalić i reabilitavać usich palityčnych źniavolenych, a taksama ŭsich hramadzianaŭ, zatrymanych padčas mirnych akcyjaŭ;
— spynić supraćpraŭnuju dziejnaść supracoŭnikaŭ siłavych orhanaŭ i pravieści pravierki zakonnaści ich dziejańniaŭ;
— pryciahnuć da adkaznaści kiraŭnikoŭ siłavych strukturaŭ, adkaznych za hvałt, raspravy i pahrozy, za ŭmiašańnie ŭ pryvatnaje žyćcio hramadzianaŭ;
— nieadkładna pačać adkryty hramadzki dyjałoh ułady z pradstaŭnikami narodu na pradmiet praviadzieńnia sumlennych, prazrystych i spraviadlivych vybaraŭ u Respublicy Biełaruś z nastupnaj pieradačaj prezidenckich i ŭładnych paŭnamoctvaŭ zakonna abranamu kiraŭniku dziaržavy.
