Novyja čatyry stancyi mietro ŭžo hatovyja. Jak vyhladaje zielenałužskaja linija napiaredadni adkryćcia FOTY
Da adkryćcia treciaj linii mietro zastałosia zusim niašmat: pieršyja čatyry stancyi novaha kirunku ŭžo hatovyja, zaraz pravodzicca abkatka ciahnikoŭ. Realt.by pabyvaŭ na ŭsich čatyroch novych stancyjach i pakazvaje, jak vyhladaje minskaja padziemka zielenałužskaj linii.
Pieršaja čarha budaŭnictva treciaj vietki składajecca z 4 stancyj: «Jubilejnaja», «Płošča Franciška Bahuševiča», «Vakzalnaja» i «Kavalskaja Słabada».
Stancyja mietro «Kavalskaja Słabada»
Daŭžynia płatformy 100 mietraŭ (raźličana na piacivahonny sastaŭ). Na vychadach da pierona jość halerei-prachody da lifta, jakija, u svaju čarhu, viaduć prosta na płatformu.
«Vakzalnaja»
Tut płatforma padzielena dvuma šerahami kałon. Asnoŭnyja kolery interjeru — čorny i bieły, ale na stoli raźmieščany śviacilni čyrvonaha i biełaha koleru, jakija simvalizujuć čyhunačnyja šlachi. Uvieś patok śviatła «ściakajecca» da vialikaha dreva daroh, jakoje ŭstanoŭlena ŭ pačatku płatformy.
Travałatary złučajuć st. m. «Vakzalnuju» i st. m. «Płošča Lenina» — da hetaha travałatary nie vykarystoŭvalisia ŭ Minskim mietrapalitenie. Usiaho ruchajucca darožak 7: čatyry ŭ adzin bok i try ŭ inšy.
Stancyja mietro «Płošča Franciška Bahuševiča»
Hetaja stancyja, mabyć, samaja patryjatyčnaja z usich. U pačatku płatformy ŭstalavanaja skulptura — tkacki stanok z cytataj Franciška Bahuševiča.
Stancyja mietro «Jubilejnaja»
Heta samaja hłybokaja stancyja z usich isnujučych u staličnym mietrapalitenie — hłybinia katłavana kala 28 mietraŭ. Uvajści na stancyju «Jubilejnaja» možna budzie praz st. m. «Frunzienskaja» — asobnych uvachodaŭ na stancyju nie praduhledžana. U piešachodnych pierachodach, jakija źviažuć stancyju z «Frunzienskaj», taksama ŭstalavanyja travałatary. Adzin daŭžynioj 24 mietry, a druhi — 45 mietraŭ. Kolery płatformy bieły i čyrvony.
