4 kastryčnika ŭ Biełarusi zatrymali 15 žurnalistaŭ
Ciaham dnia 4 kastryčnika ŭ Biełarusi byli zatrymanyja 15 žurnalistaŭ. Bolšaść ź ich paśla pravierki dakumientaŭ adpuścili z RUUSaŭ.
Ale piać čałaviek zastalisia ŭ izalatarach da suda pa administracyjnych pracesach. Mierkavana, usich buduć sudzić za ŭdzieł u niesankcyjanavanych vuličnych pratestach. Heta — Nadzieja Pužynskaja (Homiel), Maryna Maŭčanava, Alesia Łacinskaja, Dzianis Nosaŭ, Juryj Kamisaraŭ (Babrujsk), piša BAŽ.
Homiel
Zatrymanaja videakarespandentka «Silnych novostiej» Nadzieja Pužynskaja. Žurnalistku zatrymali kala IČU, kudy jana niesła pieradaču zatrymanym kaleham — Hańnie i Dzianisu Jakštasam. Na jaje skłali pratakoł za «ŭdzieł u niesankcyjanavanym mierapryjemstvie».
Nadzieju zatrymali za niavyznačanaje «niesankcyjanavanaje mierapryjemstva». Zasnavalniku homielskaha papularnaha miedyja «Silnyje novosti» Piatru Kuźniacovu paćvierdzili ŭ abłasnym UUS, što Pužynskuju zatrymali — «u suviazi ź viadzieńniem administracyjnaha pracesu pavodle artykuła 23.34». Na pytańnie ab tym, za jaki epizod jaje zatrymali, kali jana nie ŭdzielničała ŭ masavych mierapryjemstvach, pradstaŭnik UUS Vital Prystromaŭ adkazaŭ: «Nie mahu vam skazać, dumaju, tam jość padstavy».
Žurnalistku da suda pakinuli ŭ izalatary časovaha ŭtrymańnia.
Viciebsk
Byli zatrymanyja žurnalistka TUT.by i BiełaPAN Taćciana Matviejeva, žurnalist TUT.by i «Narodnaj Voli» Aleś Pilecki, redaktar «Narodnych navinaŭ Viciebska» Siarhiej Sierabro. Usich adpuścili paśla «prafiłaktyčnych razmoŭ».
Zatrymańnie viciebskich žurnalistaŭ Taćciany Matviejevaj, Alesia Pileckaha i Sieržuka Sierabro. Fota: «Biełsat»
Hrodna
Zatrymany błohier Andrej Ircha na Savieckaj płoščy ŭ Horadni padčas strymu. Andreja Irchu adpuścili, ale skłali pratakoł apytańnia, zabrali telefon. Jaho niekalki razoŭ udaryli ŭ tvar pry zatrymańni. Pytalisia, ci jon budzie jašče zdymać strymy. Pry zatrymańni mocna ściahnuli ruki plastykavaj ściažkaj
Zatrymali žurnalistak Volhu Kamiahinu i Kaciarynu Hardziejevu. Jany žurnalisty «Narodnaj Voli» i TUT.BY. Paśla pravierki dakumientaŭ i prafiłaktyčnych razmoŭ adpuścili.
Zatrymańnie Volhi Kamiahinaj i Kaciaryny Hardziejevaj. Fota: «Biełsat»
Minsk
Zatrymali i adpuścili: fatohrafa «BiełHaziety» Darju Sapranieckuju, karespandenta Onliner Alaksandra Uładyku.
Fatohrafu Darji Sapranieckaj pazvanili z Kastryčnickaha RUUSa Minska i patrabavali, kab jana tudy viarnułasia. A da kvatery pryjšli milicyjanty i amap — usie byli ŭ bałakłavach, pa słovach žurnalistki. Darja paabiacała zaŭtra pryjści ŭ RUUS kastryčnickaha rajona, kab aznajomicca z administracyjnym partakołam. Dźviery im nie adčyniła, ŭvieś čas išoŭ strym z kvatery.
Siłaviki syšli.
Babrujsk
Zatrymali i pakinuli da suda: Marynu Maŭčanavu, Alesiu Łacinskuju, Dzianisa Nosava i Juryja Kamisarava. Zaŭtra budzie sud. Pra heta BAŽ pa telefonie paviedamiła Maryna Maŭčanava, jakoj dazvolili patelefanavać.
Brest:
Zatrymali hałoŭnaha redaktara haradskoha anłajn-časopisa «Binokl» Ksieniju Piatrovič, fotakarespandenta «Briestskoj haziety» Aleha Pališčuka. Ich adpuścili z RUUSa paśla pravierki dakumientaŭ.
Ksienija Piatrovič i Aleh Pališčuk paśla vychadu z RUUSa.
Mahiloŭ:
Byŭ zatrymany žurnalist BiełaPAN Aleś Asipcoŭ. Asipcova adpuścili paśla prafiłaktyčnaj razmovy.
