«U pratakole paznačana 95 podpisaŭ za Cichanoŭskuju, a my sabrali 394 podpisy ludziej, jakija prahałasavali za jaje»
Inicyjatyva «Čiestnyje ludi» prapanuje abyści vybarnikaŭ na svaim učastku, sabrać podpisy tych, chto hałasavaŭ za Śviatłanu Cichanoŭskuju, i pieradać dakumenty na pravierku ŭ kampetentnyja orhany, piša «Radyjo Svaboda».
Siarhiej Łapcevič, naziralnik na prezydenckich vybarach-2020
«Usie supracoŭniki Frunzenskaha RUUS — na vyjeździe. Čakajcie, kali viernucca»
Heta ŭžo treciaja sproba inicyjatyvy štabu Viktara Babaryki «Čiestnyje ludi» damahčysia sumlennaha padliku hałasoŭ na prezydenckich vybarach. Spačatku nieabvieržnyja dokazy falsyfikacyjaŭ sabrali i pieradali ŭ CVK, ale jana ŭsie skarhi adchiliła. Druhim krokam byŭ Viarchoŭny sud, ale jon taksama nie znajšoŭ nijakich parušeńniaŭ.
2 kastryčnika naziralnik Siarhiej Łapcevič padrychtavaŭ čarhovy pakiet dakumentaŭ na 36 staronkach i chacieŭ padać skarhu dla pravierki ŭ Frunzenskaje RUUS. Asabista padać skarhu ŭ RUUS nie ŭdałosia — vyjaviłasia, što ŭsie supracoŭniki, jakija prymajuć hramadzian, «na vyjeździe».
«Vy ŭ čarzie čaćviortyja», — paviedamiła dziažurny siaržant na ŭvachodzie ŭ Frunzenskaje RUUS i pakazała na ludziej, jakija taksama čakali. Ciaham hadziny čarha nia ruchałasia, nivodzin supracoŭnik rajonnaj milicyi z vyjezdu tak i nie viarnuŭsia.
«Kali vierniecca chtości z supracoŭnikaŭ i kolki času čakać — niepradkazalna. Kali niama času, prychodźcie viečaram, paśla 20-j hadziny, mo tady tut čarhi nia budzie», — paraiła siaržant.
Tamu Siarhiej Łapcevič vymušany byŭ pasłać dakumenty poštaju.
Naziralnik Siarhiej Łapcevič prajšoŭ užo niekalki etapaŭ abskardžvańnia vynikaŭ vybaraŭ na svaim učastku.
«Ja padavaŭ zajavu spačatku ŭ prakuraturu. Adtul mianie pieranakiravali ŭ Frunzenskaje RUUS. Atrymaŭ adpisku. Padaŭ zajavu ŭ haradzkoje ŭpraŭleńnie ŭnutranych spravaŭ Mienharvykankamu — a jany spuścili dakumenty nazad u Frunzenskaje RUUS. Ujaŭvicie — usie maje zajavy razvaročvali biez razhladu sutnaści, viartali nazad u RUUS. To-bok ja atrymlivaŭ adpiski. Ciapier čarhovaja sproba», — tłumačyć Siarhiej Łapcevič.
«Na daterminovym hałasavańni my naličyli 750 čałaviek, u pratakołach paznačana ŭdvaja bolš — 1 500»
Siarhiej Łapcevič byŭ naziralnikam na ŭčastkach №13 i 14 Frunzenskaha rajonu Miensku, jakija znachodzilisia ŭ budynku siaredniaj škoły №23 u mikrarajonie Sucharava. Dyrektarka škoły Sačko Śviatłana Viačasłavaŭna — staršynia adnoj kamisii, jaje namieśnica Ananič Darja Alaksiejeŭna — staršynia druhoj. Siabry kamisijaŭ — padnačalenyja im nastaŭniki. Naziralniki, jakich puścili na ŭčastki, — taksama supracoŭniki hetaj škoły. Niezaležnych naziralnikaŭ u budynak nie puścili, jany mahli tolki ličyć ludziej, jakija ŭvajšli ŭ budynak.
Siarhiej kaža, što sam bačyŭ vielmi šmat ludziej ź biełymi stužkami, jakija pryjšli na vybary. A ŭ vyniku ličby naziralnikaŭ nie syšlisia z pratakołami.
«Na daterminovym hałasavańni my naličyli 750 čałaviek, jakija ŭvachodzili ŭ škołu i vychodzili ź jaje. A ŭ pratakołach paznačana 1500 tych, chto prahałasavaŭ. Adkul uzialisia jašče 750 vybarnikaŭ — niezrazumieła.
Pavodle pratakołu, za Cichanoŭskuju prahałasavali 95 čałaviek
Tamu adrazu paśla vybaraŭ my inicyjavali zbor podpisaŭ tych, chto hałasavaŭ za Śviatłanu Cichanoŭskuju. I litaralna ŭ pieršy dzień sabrali bolš podpisaŭ, čym było ŭ vynikovym pratakole. Pryčym my pracavali tolki pa adnoj hadzinie try viečary. U vynikovym pratakole paznačana 95 podpisaŭ za Cichanoŭskuju, a my sabrali 394 podpisy ludziej, jakija prahałasavali za jaje.
Heta musiać vyvučyć kampetentnyja orhany. I dać praŭnuju acenku», — pierakanany prahramist Siarhiej Łapcevič.
Naziralnik kaža, što pratakoły ŭviečary 9 žniŭnia źjavilisia, adnak nie adrazu. A tolki tady, kali siabraŭ učastkovych kamisijaŭ vyvieźli z budynku škoły.
«Tam stajali aŭtazaki, ja ich bačyŭ, pakul my čakali vynikaŭ vybaraŭ. Pryjechaŭ busik. Vyvozili siabraŭ kamisijaŭ nie praz centralny ŭvachod. Pahaśli ŭsie vokny ŭ škole, pratakołaŭ nidzie nie było. Ja sam asabista pravieryŭ, my z vybarnikami, jakija čakali vynikaŭ, nie sychodzili. Praz chvilin 40 u adnym aknie zapaliłasia śviatło i źjavilisia pratakoły. Chtości ich vyviesiŭ», — kaža Siarhiej Łapcevič.
Z pratakołu vynikaje, što za Łukašenku prahałasavali 1137 vybarnikaŭ, za Śviatłanu Cichanoŭskuju — 95. U našych daloka nia poŭnych śpisach — prynamsi 395. Tamu «Čiestnyje ludi» nie spyniajucca i praciahvajuć damahacca sumlennych padlikaŭ vynikaŭ vybaraŭ», — kaža Siarhiej Łapcevič.
