«Kupału» mohuć pakazać na «Listapadzie». Režysior pra pirackuju viersiju: Jana nie sapsuje prakat, u Halivudzie sotni takich prykładaŭ
Pakul čarnavaja viersija «Kupały» hulaje ŭ siecivie, «Biełaruśfilm» pa-raniejšamu buduje stratehiju prasoŭvańnia karciny.
7 vieraśnia «nacyjanalnuju premjeru» stužki abviaściŭ telehram-kanał «Biełaruś hałaŭnoha mozhu», ale aŭtary zaklikajuć hledačoŭ dačakacca paŭnavartasnaha pakazu na vialikim ekranie. Nie vyklučana, što jon adbudziecca ŭ najbližejšy čas na kinafiestyvali «Listapad».
Vyraznych namieraŭ pravaŭładalniki nie vykazvajuć.
«Kupała» ŭ lubym razie budzie pakazany ŭ Biełarusi, ale nakont terminaŭ ja bajusia niešta harantavać, — kaža dyrektar «Biełaruśfilma» Uładzimir Karačeŭski. — Najbližejšy miesiac my budziem aceńvać suśvietnuju situacyju ź fiestyvalami i prakatam».
Kinastudyja ŭsio jašče raźličvaje na ŭdzieł karciny ŭ bujnych festach, bo «čym bolšy ŭ «Kupały» tam budzie rezanans, tym bolšy budzie jaho tvorčy i finansavy pośpiech». «Pakazvać dziela pakazu mnie niecikava, — nastojvaje Karačeŭski. — Chočacca, kab prajekt mieŭ imidžavuju historyju, usio ž nie tak časta ŭ nas źjaŭlajucca ŭdałyja filmy».
Pa słovach dyrektara kinastudyi, źliŭ stužki ŭ telehram na płany nijak nie ŭpłyvaje. Bolš za toje, niama nahody kazać, što «Biełaruśfilm» ryzykuje panieści praz heta finansavyja straty.
Zdymki «Kupały» ŭ Minsku. Fota Siarhieja Hudzilina
Tym časam jość vierahodnaść, što premjera «Kupały» adbudziecca ŭžo na kinafiestyvali «Listapad», jaki maje prajści ŭ Minsku z 6 da 13 listapada.
«My hetamu adkryty, naša prapanova ŭ sile, rašeńnie niepasredna za aŭtarami filma, — kamientuje prahramny dyrektar «Listapada» Ihar Sukmanaŭ. — Aproč składanaściaŭ, jakija supravadžajuć prajekt, — a los ihraje ź im u vielmi mudrahielistuju hulniu, — jość jašče žadańnie kinastudyi pravieści premjeru na bujnym kinafiestyvali. Dahetul karanavirus psavaŭ płany i terminy pakazu adsoŭvalisia, ale ci tak heta albo jość inšaja pryčyna, možna tolki zdahadvacca. Ciapier my znachodzimsia na stadyi pieramoŭ z aŭtarami».
Režysior karciny Uładzimir Jankoŭski kaža, što nie prymaje datyčnyja prajekta rašeńni, ale ličyć, što precedent sa źlivam čarnavoj viersii ŭ sieciva słužyć tolki rekłamaj filmu: «Heta nie sapsuje prakat «Kupały», u Halivudzie takich prykładaŭ — sotni. Naadvarot, ciapier film moža vyklikać intares navat u tych, chto pra jaho i nie čuŭ.
Pryčym zavieršanaja viersija, paviercie mnie, u piaćdziasiat razoŭ lepšaja za tuju, što jość u siecivie. Ja rabiŭ histaryčnuju karcinu pra vialikaha paeta, heta film pra našu radzimu, jakaja zaŭsiody zmahałasia za niezaležnaść. Ja nie čakaŭ, što ŭ nas adbuducca padziei, u jakich «Kupała» stanie jašče bolš aktualny».
