Rekordna vialiki biełaruski mitynh sabraŭsia ŭ niadzielu ŭ Ńju-Jorku
15 žniŭnia amierykanskija biełarusy i ich siabry ź inšych krain vyjšli razam na mitynh u padtrymku demakratyi ŭ Biełarusi. Bolej za tysiaču ŭdzielnikaŭ pratestu sabralisia na Manchetanie u parku nasuprać budynku AAN, kab vykazać svajo abureńnie falsifikacyjami i parušeńniami, dapuščanymi padčas apošnich prezidenckich vybaraŭ. Amal kožny, z kim udałosia parazmaŭlać dzialiŭsia svaim staŭleńniem da padziej u Biełarusi i hučali jany adnolkava: ''Nam, biełarusam u emihracyi, vielmi baluča bačyć jak abychodzicca dyktatarski režym sa svaimi hramadzianami, jakija vyjšli na vulicy Minska i inšych bujnych haradoŭ, kab mirna vykazać svaju niazhodu z padmienaj sapraŭdnych vynikaŭ vybaraŭ namalavanymi pryhožymi ličbami''.
Asnoŭnymi patrabavańniami mitynhujučych było spynić amonaŭski hvałt suprać biełaruskaha narodu, pryciahnuć da adkaznaści dyktatara Łukašenka i jaho siłavikoŭ, učyniŭšych ździeki nad niavinnymi hramadzianami, vyzvalić palitviaźniaŭ i ŭsich zatrymanych na vuličnych akcyjach. Na mitynhu z karotkimi pramovami vystupili biełaruskija aktyvisty i lidary hramadskich arhanizacyj, a taksama vystupili pradstaŭniki inšych dyjaspar: Ukrainy, Rasii, Turkmienistanu i navat Čačni.
Usie jany vykazali svaju padtrymku ŭ imknieńni Biełarusi być niezaležnaj demakratyčnaj dziaržavaj. Na zakančeńnie ŭdzielniki praśpiavali biełaruski himn ''Mahutny Boža'' na słovy Natalli Arsieńnievaj.
Varta zaznačyć, što pa kolkaści prysutnych mitynh u padtrymku demakratyi ŭ Biełarusi pabiŭ usie rekordy biełaruska-amierykanskaj supolnaści: nikoli raniej nie źbirałasia stolki žadajučych vykazać svaju hramadzianskuju pazicyju adnosna padziej u Biełarusi i pakazać našym svajakam i siabram u Biełarusi, što ŭ dumkach i ŭ sercy my ź imi.
Šmat fotaŭ tut
