Ekipaž Crew Dragon viarnuŭsia na Ziamlu
Spuščalnaja kapsuła karabla z astranaŭtami NASA Duhłasam Charli i Robiertam Bienkienam 2 žniŭnia u 21:48 pryvadniłasia ŭ Mieksikanskim zalivie na poŭdzień ad horada Piensakoła (štat Fłaryda), piša interfax.by.
Pasadcy papiaredničaŭ 19-hadzinny aŭtanomny palot, pierad jakim Crew Dragon paśpiachova adstykavaŭsia ad Mižnarodnaj kaśmičnaj stancyi (MKS).
Piłatavany kaśmičny karabiel ZŠA Crew Dragon, raspracavany kampanijaj SpaceX u ramkach kamiercyjnaha kantraktu z NASA, startavaŭ u svoj vyprabavalny palot da MKS 30 maja.
U ramkach testavaha palotu karabiel dastaviŭ na MKS Charli i Bienkiena, jakija prapracavali tam dva miesiacy razam z rasijskimi kasmanaŭtami Anatolem Ivanišynym i Ivanam Vahnieram i amierykanskim astranaŭtam Krysam Kesidzi.
Ciapierašniaja misija Crew Dragon źjaŭlajecca apošnim bujnym vyprabavańniem karabla pierad jaho siertyfikacyjaj NASA dla ažyćciaŭleńnia rehularnych kamiercyjnych piłatavanych palotaŭ na MKS. U sakaviku 2019 hoda taki ž karabiel ździejśniŭ pieršy paśpiachovy vyprabavalny palot na stancyju ŭ bieśpiłotnym režymie.
Ad 2011 hoda astranaŭty NASA dastaŭlajucca na MKS rasijskimi karablami «Sajuz», za miescy na jakich amierykanskaje kaśmičnaje ahienctva płacić Rasii. U pryvatnaści, u mai NASA damoviłasia z Raskosmasam ab kupli za 90,2 młn dalaraŭ adnaho miesca na «Sajuzie», jaki ŭ kastryčniku startuje da MKS, u suviazi z mahčymymi zatrymkami ŭ puskach nastupnych misij Crew Dragon da MKS. Pavodle źviestak NASA, nastupny palot takoha piłatavanaha karabla da MKS płanujecca ažyćciavić u kancy vieraśnia.
