Paśla ŭdziełu Alaksandra Kornyšava ŭ prahramie «Biełsata» ŭ jaho baćkoŭ praviali pieratrus
Alaksandr Kornyšaŭ — redaktar internet-vydańnia «Vitiebskij kuŕjer news». Jon źjechaŭ ź Biełarusi ŭ 2020‑m, a sioleta na pačatku lutaha ŭ prahramie «Biełarus biełarusu» na telekanale «Biełsat» Alaksandr raspavioŭ pra toje, što padčas vymušanaj emihracyi ŭ jaho źjavilisia prablemy sa zdaroŭjem — u jaho vyjavili niekroz tazabiedranych sustavaŭ, tamu nieabchodnyja dźvie apieracyi pa zamienie sustavaŭ i doŭhaja reabilitacyja.
Fota: Radyjo Svaboda
Paśla vychadu pieradačy ŭ efir u chatu da baćkoŭ Kornyšava pačali rehularna naviedvacca milicyjanty i śledčyja, piša Biełsat.
U siaredzinie krasavika ŭ chacie, dzie žyvuć jahonyja baćki, byŭ praviedzieny pieratrus, raspavioŭ Alaksandr:
«U hetym žytle ja prapisany, chacia ŭžo kala 25 hadoŭ nie žyvu z baćkami. Chata padzielenaja na dźvie pałovy, u adnoj žyvie moj brat, u druhoj — baćki, im užo za 80, i tata vielmi chvory, u jaho byli dva insulty. Pieratrus pravodziŭsia ŭ miežach kryminalnaj spravy, dzie ja, nakolki zrazumieli maje svajaki, maju status śviedki. Pakolki nijakich maich rečaŭ tam niama ŭvohule, milicyjanty ničoha nie zabirali, tolki prahledzieli infarmacyju ŭ kampjutar i płanšecie brata, a taksama pravieryli telefon baćki. Sfatahrafavali našu pierapisku ŭ Telegram. Pierapisvajemsia my nie tak časta, pryčym nie zakranajem palityčnych tem, u asnoŭnym havorym na temy zdaroŭja. Maim rodnym skazali, što kryminalnaja sprava tyčycca majho intervju «Biełsatu», — maŭlaŭ, heta ekstremisckaje farmavańnie, a ja nibyta spryjaju ekstremisckaj dziejnaści».
Pakolki baćki Alaksandra — vielmi stałyja ludzi, jamu chaciełasia b, kab vizity siłavikoŭ z rospytami spynilisia. Tym bolš, što svajaki nie majuć nijakaha dačynieńnia ni da intervju miedyja, pryznanamu ŭ Biełarusi ekstremisckim farmavańniem, ni ŭvohule da taho, čym jon zajmajecca.
«Niezadoŭha da pieratrusu, dzieści ŭ sakaviku, sa Śledčaha kamiteta patelefanavali bratu. Śledčaja spačatku źbirałasia vyklikać jaho na dopyt, ale potym vyrašyła sama pryjści da jaho damoŭ. Pakazvała videazapis pieradačy «Biełsata», pytałasia ŭ svajakoŭ, ci heta nasamreč ja. Cikaviłasia, dzie ja ciapier, čym zajmajusia, jak vychodzić «Vitiebskij kuŕjer news». Baćki nie duža razumiejuć «ijerarchiju» siłavikoŭ, tamu proźviščaŭ tych, chto da ich prychodzić, nie zapaminajuć, nijakich aficyjnych papier nie patrabujuć. Ale niekalki razoŭ pytalisia, ci nasamreč suprać mianie zaviali kryminalnuju spravu i što mnie pahražaje. Adkazy kožnaha razu roznyja: to im kažuć, što sprava jość, to jaje jašče niama. Adnojčy skazali, što kryminalnuju spravu zaviaduć, jak tolki ja viarnusia ŭ Biełaruś, ale «šmat nie daduć», — raspavioŭ Alaksandr Kornyšaŭ.
Pavodle jahonych słoŭ, apošni raz milicyjanty prychodzili z tydzień tamu, adnak u dom nie zajšli. Raspytvali susiedziaŭ, pakazvali fotazdymak, cikavilisia, ci viedajuć jany takoha čałavieka, ci daŭno bačyli. Uvohule ž vizity siłavikoŭ užo nabyli rehularny charaktar: jany pačalisia naprykancy 2022 hoda, i hałoŭnaje, pra što tady raspytvali rodnych Alaksandra — heta jaho dziejnaść jak redaktara «Vitiebskoho kuŕjera news». Taksama pytalisia pra jahonyja pohlady na palityku biełaruskich uładaŭ, nastojliva prasili nazvać jahony ciapierašni adras i jakim čynam ź im možna źviazacca.
Apošni raz niepasredna sa śledčymi Alaksandr Kornyšaŭ mieŭ kantakty ŭ listapadzie 2020 hoda: praz try dni paśla jahonaha adjezdu z radzimy jamu ŭ telehram napisaŭ śledčy ź Minska. Jon chacieŭ dapytać Alaksandra pa spravie kiraŭnika hramadskaj inicyjatyvy «Altiernativa» Aleha Korbana, zatrymanaha napiaredadni, 25 kastryčnika. Kornyšaŭ byŭ jahonym namieśnikam, i, razumiejučy pahrozu asabistaj svabodzie, źjechaŭ ź Biełarusi spačatku ŭ Kijeŭ, potym niejki čas žyŭ u Niamieččynie, ciapier pierabraŭsia ŭ Polšču.
Čytajcie taksama:
Znoŭ aštrafavali na bujnuju sumu Ninu Bahinskuju
Źniavoleny videaapieratar Viačasłaŭ Łazaraŭ u kałonii zachvareŭ na pnieŭmaniju
