Atłuścieńnie źviazali z pavyšanaj ryzykaj starečaj demiencyi
Brytanskija miedyki vyśvietlili, što atłuścieńnie moža niehatyŭna ŭpłyvać na pracu mozhu ludziej stałaha vieku: u ludziej ź lišniaj vahoj vierahodnaść raźvićcia starečaj demiencyi vyšejšaja na 30%. Vyniki ich daśledavańnia apublikavaŭ International Journal of Epidemiology.
«U XXI stahodździ demiencyja stanie dla čałaviectva adnoj z samych vialikich prablem, adnoj z hałoŭnych pahroz dla zdarovaha stareńnia ŭsich ludziej na ziamli. Našy nazirańni pakazvajuć, što narastajučaja epidemija atłuścieńnia moža pahoršyć situacyju z pašyreńniem starečaj demiencyi», — raspavioŭ adzin z aŭtaraŭ pracy, prafiesar univiersiteckaha kaledža Łondana Endru Steptoŭ.
Pavodle Suśvietnaj arhanizacyi achovy zdaroŭja (SAAZ), ad chvaroby Alchiejmiera i inšych formaŭ starečaj demiencyi ciapier pakutujuć prykładna 50 młn ludziej pa ŭsioj ziamli. Da 2030 hoda ich kolkaść moža vyraści da 75 młn. Razam ź infarktami i insultami padobnyja prablemy daŭno stali adnoj z hałoŭnych pryčyn śmierci ludziej u krainach pieršaha śvietu.
Navukoŭcy daŭno sprabujuć zrazumieć, što mienavita stanovicca pryčynaj źjaŭleńnia roznych formaŭ demiencyi. Nazirańni pakazvajuć, što hetamu spryjajuć niapravilnaja dyjeta, škodnyja zvyčki i nizki ŭzrovień fizičnaj aktyŭnaści, tady jak zaniatki sportam i intelektualnyja praktykavańni, naadvarot, rezka źnižajuć ryzyku.
Steptoŭ i jaho kalehi adkryli jašče adzin faktar ryzyki, jaki dapamahaje demiencyi raźvivacca. Padčas svajho novaha daśledavańnia jany vyvučali źviestki brytanskaha prajekta ELSA, u jakim udzielničała niekalki tysiač dobraachvotnikaŭ siaredniaha vieku. Jaho meta — vyvučyć, jak stareńnie ŭpłyvaje na pracu roznych orhanaŭ cieła čałavieka, u tym liku i mozhu.
Analizujučy hetuju infarmacyju, brytanskija navukoŭcy zacikavilisia tym, ci ŭpłyvaŭ indeks masy cieła (IMT) udzielnikaŭ daśledavańnia na toje, jak časta ŭ ich ŭźnikała starečaja demiencyja praz 10-15 hadoŭ paśla zapusku ELSA. Akazałasia, što padobnaja statystyčnaja suviaź sapraŭdy isnavała.
U pryvatnaści, navukoŭcy vyjavili, što dobraachvotniki ź IMT bolš za 30 punktaŭ prykładna na 31% čaściej zajmieli demiencyju ŭ paraŭnańni ź ich adnahodkami z narmalnaj masaj cieła. Heta było asabliva charakterna dla žančyn — ich lišniaja vaha padvyšała ryzyku na 39%.
Pakul navukoŭcy nie mohuć dakładna skazać, jak mienavita tłuščavaja tkanina paskaraje raźvićcio demiencyi. Adnak jany miarkujuć, što jana moža spryjać źjaŭleńniu demiencyi jak naŭprost, vypracoŭvajučy roznyja sihnalnyja malekuły, tak i ŭskosnym šlacham, padvyšajučy cisk u sasudach.
