«Šmat maich siabrovak maryli pravilna vyjści zamuž, kab nie pracavać». Darja Žuk raskazała, jak zdymała sieryjał «Utrymanki»
Biełaruskaja režysiorka Darja Žuk źniała druhi siezon papularnaha rasijskaha sieryjała «Utrymanki». Jon raskazvaje pra toje, jak dziaŭčaty z pravincyi pryzdžajuć skarać Maskvu i nie hrebujuć dapamohaj bahatych «papikaŭ». «Naša Niva» pahavaryła z režysiorkaj pra pracu ŭ rasijskaj industryi, maru «vyhadna vyjści zamuž» i jaje płany na biełaruskaje kino.
«Naša Nina»: Upeŭniena, paśla vašaha filma «Kryštal», jaki naminavali na «Oskar», było šmat cikavych prapanoŭ. Čamu vybrali mienavita hety sieryjał?
Darja Žuk: U poŭnym mietry ŭ mianie byli jarkija žanočyja piersanažy, i mnie padałosia, što va «Utrymankach» taksama cełaja plejada takich hierojaŭ, jakija mnie cikavyja. Heta ŭnikalnaja hleba dla daśledavańniaŭ. I choć ja ŭ svaim žyćci vybirała inšyja šlachi, u mianie šmat jakija siabroŭki chvareli na hetuju ideju — jak pravilna vyjści zamuž, kab nie pracavać. Hety vybar nie papularny ŭ astatnim śviecie, suhučny tolki našamu hramadstvu, tamu chaciełasia hłybiej zazirnuć u temu.
«NN»: U adnym intervju vy nazyvali siabie fieministkaj. Što fieministka ŭnutry vas moža skazać pra toje, jakimi žančyny pakazvajucca ŭ sieryjale?
DŽ: Ja nie baču ničoha niefieminisckaha ŭ im. Naprykład, hałoŭnaja hierainia, śledčy, jakoha hraje Darja Maroz, razryvajecca pamiž dźviuma rolami — jana syšła z pracy, žyvie z kachanym čałaviekam, ale, mahčyma, škaduje, što kinuła karjeru.
Samaje hałoŭnaje dla mianie, što hety sieryjał prachodzić test Biekdeł (pravierka na hiendernuju pieraduziataść — «NN»). Tut u hieraiń jość imiony, i jany razmaŭlajuć adna z adnoj nie tolki pra mužčyn. Kali jaho analizavać z punktu hledžańnia fieministyčnaj teoryi kino, jakuju nam prapanavała Łaŭra Małvi ŭ 1970-ja (jana pra toje, što ŭ filmach tranślujecca mužčynski pohlad — «NN»), to tut usio vielmi navat niadrenna.
«NN»: Što vy chacieli pryŭnieści ŭ novy siezon? Čym jon budzie adroźnivacca?
DŽ: Tut mienš abjektyŭnaj kamiery, bolš subjektyŭnaj. Ty isnuješ razam z hierojami, bližej da ich padychodziš. I mnie zdajecca, jość adčuvańnie empatyi, niahledziačy na niedaskanałaść hetych hierojaŭ. Chaciełasia jašče pryhledziecca da ich śvietu ciažkaha luksu, nakolki heta mahčyma (śmiajecca).
Darja Žuk (źleva) na zakrytaj premjery sieryjała.
«NN»: Nakolki praca nad filmam adroźnivajecca ad pracy nad sieryjałam?
DŽ: Sieryjalnaja praca — kamandnaja. Ty nie samy hałoŭny, nie zaŭsiody za režysioram apošniaje słova. Ale pry takoj kolkaści materyjału dobra, što ŭ ciabie jość kamanda, jakaja dobra jaho viedaje i dapamahaje tabie. Ujavicie, ja zdymała raniej adzin poŭny mietr, a ciapier mnie treba było źniać čatyry takija, ale ŭdvaja chutčej. Heta, kaniečnie, nakładaje adbitak. Takimi tempami fizična ciažka prapuścić praź siabie ŭvieś materyjał. U ciabie doŭhija pracoŭnyja dni. Ty adnačasova zdymaješ, rychtuješsia, mantuješ.
«NN»: Jakija ŭvohule ŭražańni ad pracy ŭ rasiejskaj industryi kino?
DŽ: Usio robicca vielmi chutka (uśmichajecca). Tut ludzi ryzykujuć bolš, ryzykujuć vialikimi hrašyma. Usie pracujuć u ekstremalnych situacyjach, i mnie zdajecca, što jany nastolki pryvykli da hetaha, što kali ekstremalnyja situacyi prybrać, to, mahčyma, u ich by horš atrymlivałasia.
«NN»: Biełaruskija akciory, jakija zdymajucca ŭ rasijskich sieryjałach, zaŭsiody kažuć, što heta dobryja hrošy dla ich. A dla režysiora heta dobryja hrošy?
DŽ: Niadrennyja. Viadoma, nie takija dobryja, jak na Zachadzie. Tut prosta za košt abjomu, kolkaści sieryj, atrymlivajecca niadrenny zarobak. Ale paviercie mnie, układańnie zdaroŭja kaštuje hetak ža doraha.
Viadoma, praca na vysokabiudžetnym sieryjale daść mnie mahčymaść bracca za małabiudžetnyja prajekty. Naprykład, zaraz maru źniać klip dla biełaruskaha hurta «Mołčat doma».
«NN»: Ci nie baiciesia, što vas buduć paraŭnoŭvać z režysioram pieršaha siezona Kanstancinam Bahamołavym?
DŽ: Heta ž vydatna! Ja dumaju, što ŭsie tolki i buduć rabić, što paraŭnoŭvać. Heta ž cikava, jak adnu i tuju ž karcinu napisali dva roznyja mastaki. Dysiertacyi tolki na hetym, napeŭna, i budujucca.
«NN»: Sami lubicie hladzieć sieryjały?
DŽ: Tak, kaniečnie. Rasijskija nie paśpiavała pahladzieć, tamu što apošnim časam tolki i rabiła, što pracavała. A tak hladžu amierykanskija, jeŭrapiejskija. Mnie vielmi spadabaŭsia novy sieryjał Apple, jaki nazyvajecca «Ranišniaje šou», «Naščadki» ad NVO. Ja vialiki fanat sieryjała «Vialikaja maleńkaja chłuśnia».
«NN»: A sačyli za tym, što adbyvajecca ŭ biełaruskaj kinaindustryi? «Voziera radaści», «II»?
DŽ: Cudoŭny film Ułady Siańkovaj. Ja navat parekamiendavała Alinu Juchnievič (aktrysu, jakaja hrała tam. — «NN») na prajekt, jaki zdymajecca ŭ Rasii. Čakaju ad Ułady novych rabot.
«Voziera radaści» — nu, heta ž karotki mietr, heta niesurjozna (uśmichajecca). Heta ŭsio vielmi miła, ale… Pakolki filmaŭ mała, navat nievialikija pracy stanoviacca važnymi dla biełaruskaj kinaindustryi, ja heta razumieju. Ale liču, što režysior biez poŭnaha mietra — nie režysior.
«NN»: Kali čakać vašaha viartańnia z aŭtarskim prajektam? Što pieraškadžaje zdymać tut?
DŽ: Mianie cikaviać historyi nie tolki biełaruskija. Choć ja liču, što historyja z Femen — vielmi navat biełaruskaja taksama. Prosta tak zdaryłasia, što Ukraina bolš adkryta ryzykoŭnym, palityzavanym temam. Ja b z zadavalnieńniem častkova źniała pra Femen u Biełarusi, prosta bajusia, što hetaha nie dazvolać zrabić. Choć mianie chvaluje družba i ŭzajemaadnosiny dziaŭčat bolš, čym ich palityčnaja dziejnaść.
Navat razhladajučy prajekty ŭ Rasii, ja zaŭsiody sprabuju padtrymać ziemlakoŭ. Ciapier zacikaviŭ prajekt z pradziusaram i scenarystam ź Biełarusi, na hałoŭnuju rolu taksama padbirajem biełarusku.
Spadziajusia, źjavicca mahčymaść rabić i biełaruskija filmy. Ale pakul naša sistema finansavańnia pracuje tak, što vielmi składana zajavić aŭtarski prajekt. Nieviadoma, kali ŭ ministerstvie pryjom zajavak na finansavańnie, źmianiajucca temy. Naprykład, ja vielmi čakaju film Darji Jurkievič, ale niezrazumieła, ci zmoža jana navat padać svoj scenar na konkurs, tamu što ŭsio vielmi niepradkazalna.
A kali šukać niezaležnaje finansavańnie, to heta pavinien być nie aŭtarski prajekt, a chutčej, bolš kamiercyjny, jaki zmoža sabrać kasu. Takaja situacyja niaprostaja.
Heta značyć, dla taho, kab mnie zrabić biełaruski film, u ideale treba, kab jon byŭ cikavy ŭkraincam ci rasijanam.
