Turkam dazvolili nie budavać hatel na płoščy Jakuba Kołasa ŭ Minsku. Što tam budzie?
Ułady dazvolili tureckamu inviestaru stvaryć na miescy byłoha palihrafkambinata na płoščy Jakuba Kołasa ŭ Minsku šmatfunkcyjanalny kompleks zamiest zapłanavanaha tam raniej piacizorkavaha hatela. Pra heta tut.by paviedamiła niekalki krynic.
U 2013 hodzie ŭrad Biełarusi daručyŭ Minharvykankamu zaklučyć inviestycyjnuju damovu z tureckaj kampanijaj pa pieratvareńni byłoha budynka palihrafkambinata imia Jakuba Kołasa ŭ centry Minska ŭ piacizorkavuju haścinicu na 250 numaroŭ. Realizatar prajekta - padkantrolnaja tureckamu chołdynhu «Irad» kampanija «Minsk Prynces Hatel», jakaja vałodaje haścinicaj Crown Plaza na Kirava. Ale ŭ 2016 hodzie inviestdamovu skasavali pa pahadnieńni bakoŭ z-za nazapašanych ŭ inviestara štrafnych sankcyj i ŭkłali damovu na prajektavańnie i budaŭnictva — heta značyć bieź ilhot.
Z taho momantu sprava taksama tołkam nie zrušyłasia. «Minsk Prynces Hatel» chiba što pryvodziŭ fasady budynka ŭ paradak paśla pradpisańniaŭ miascovych uładaŭ. Akramia taho, inviestar praciahły čas šukaŭ suinviestaraŭ dla realizacyi prajekta.
Jak kažuć infarmavanyja krynicy, «Minsk Prynces Hatel» vioŭ pradmietnyja pieramovy z adnym ź vialikich minskich deviełapieraŭ, ale ŭ vyniku turkaŭ nie zadavolili ŭmovy biełarusaŭ. Zaraz pošuk suinviestaraŭ praciahvajecca.
Ale cikaviej toje, što niadaŭna «Minsk Prynces Hatel» atrymaŭ zhodu prezidenta na pieraprafilavańnie budynka palihrafkambinata nie ŭ hatel, a ŭ šmatfunkcyjanalny kompleks. To bok, tearetyčna tut moža być i handal, i ofisy.
Taki razvarot łahičny i moža pryciahnuć uvahu patencyjnych partnioraŭ. Bo ciapier u Minsku patreba ŭ hatelach (asabliva piacizorkavych) u asnoŭnym zadavolenaja, a voś jakasnych ofisnych płoščaŭ nie chapaje.
Palihrafkambinat - nie adziny prablemny aktyŭ «Minsk Prynces Hatela». Tak, ułady mohuć zabrać u hetaj kampanii budynak byłoha kinateatra «Sučaśnik», dzie turki płanavali pabudavać zabaŭlalny kompleks. Ale ruchu na hetym abjekcie niama ŭžo niekalki hadoŭ.
