Zakinutuju siadzibu samaha bahataha jaŭreja Biełarusi pradajuć za $4 tysiačy FOTY
Na aŭkcyjon Dziaržkamiteta pa majomaści patrapiŭ «budynak z tryma terasami i sklepam» pa vulicy Łejby Struhača ŭ Ašmianach, piša realt.by.
Akazałasia, što za hetaj farmuloŭkaj chavajecca siadziba Łejby Struhača — zasnavalnika ašmianskaj vinakurni i draždžavoha zavoda i adnaho z samych bahatych jaŭrejaŭ Biełarusi minułaha stahodździa.
U pačatku XX stahodździa siadziba ŭ vioscy Śviaty Duch (siońnia — heta častka Ašmianaŭ) była adnoj z samych pryhožych na Haradzienščynie.
Dvuchpaviarchovy dom u styli madern, basiejn z załatymi rybkami, piejzažny park, aranžareja, kamienny mur z masiŭnymi varotami — takuju raskošu moh sabie dazvolić tolki kupiec pieršaj hildyi, jakim i źjaŭlaŭsia Łejba Struhač.
Mienavita dziakujučy jamu na bierazie raki Ašmianki vyras najbujniejšy pa tych časach zavod, a ŭ horadzie źjaviłasia novaja sinahoha.
Paśla śmierci Łejby Struhača draždžavoj vytvorčaściu, a taksama domam pad Ašmianami stali kiravać jaho syny. Biznes paśpiachova raźvivaŭsia (u 1927 hodu ašmianski draždžavy zavod uvajšoŭ u trojku najbolš paśpiachovych pradpryjemstvaŭ Uschodniaj Polščy) da 1939 hoda: paśla ŭvachodžańnia Zachodniaj Biełarusi ŭ skład SSSR pradpryjemstva było nacyjanalizavana.
Što tyčycca doma Struhača, to jon trapiŭ na bałans adździeła adukacyi.
U adsutnaść varyjantaŭ žylla rajvykankam zasialiŭ u byłuju jaŭrejskuju siadzibu siemji nastaŭnikaŭ, jakija žyli tut až da pačatku «nulavych». Kali naščadkaŭ nastaŭnikaŭ, narešcie, raśsialili, na budynak źviarnuŭ uvahu niejki inviestar, jaki mieŭ namier adkryć u siadzibie mini-hatel.
Na žal, pradprymalnik nie prosta nie raźličyŭ svaje siły, ale i mocna naškodziŭ staradaŭniamu budynku. Padčas padrychtoŭki siadziby da rekanstrukcyi ź jaje złupili ŭsiu tynkoŭku, dy tak i pakinuli, pieradumaŭšy ramantavać.
U vyniku apošnija niekalki hadoŭ «hołaja» darevalucyjnaja pabudova prosta hnije. Na drenny stan siadziby Łejby Struhača nie raz pakazvali historyki i krajaznaŭcy. Kažuć, što vykupić dom byŭ hatovy i chto-niebudź ź miascovych. Ciapier u budynka źjaŭlajecca šaniec zdabyć haspadara.
Jak paviedamlajecca ŭ apisańni abjekta na sajcie Dziaržkammajomaści, budučy ŭładalnik siadziby abaviazany pravieści rekanstrukcyju i ŭvieści budynak u ekspłuatacyju ŭ terminam nie paźniej za 5 hadoŭ z momantu zaklučeńnia dahavora kupli-prodažu. Pry hetym, niahledziačy na svajo bahataje minułaje, budynak nie źjaŭlajecca historyka-kulturnaj kaštoŭnaściu, a značyć, jaho možna vykarystoŭvać bieź jakich-niebudź abmiežavańniaŭ. Aŭkcyjon pa prodažy siadziby Łejby Struhača projdzie 31 lipienia.
Pačatkovy košt budynka ahulnaj płoščaj 476 kvadratnych mietraŭ — 7819 rubloŭ (ci amal 4 tysiačy dalaraŭ).
