Dabravolski pra spravu «analitykaŭ Cichanoŭskaj»: Nie ŭsie mnie byli znajomyja, heta absurd
Hienprakuratura nakiravała ŭ Viarchoŭny sud dla vyznačeńnia padsudnaści kryminalnuju spravu suprać «analitykaŭ Śviatłany Cichanoŭskaj». Adzin ź fihurantaŭ spravy, staršy daradca Śviatłany Cichanoŭskaj Alaksandr Dabravolski ličyć, što heta ŭsio ad strachu režymu i raić vykanaŭcam złačynnych zahadaŭ padumać pra budučyniu, piša Biełsat.
Alaksandr Dabravolski. Fota: «Naša Niva»
«Režym vielmi baicca taho, što budzie niejkaja krytyka ci niepryniaćcie z boku hramadstva. Chacia režym užo daŭno hramadstva praviaraŭ — ludzi nie padtrymali Łukašenku. I tyja, chto źjaŭlajucca ekśpiertami, analitykami, dla režymu niebiaśpiečnyja», — kaža Alaksandr Dabravolski «Biełsatu».
Jon adznačaje, što ni pra jakoje abjadnańnia ekśpiertaŭ u «analityki Cichanoŭskaj» nie było.
«Ludzi, jakija prachodziać pa hetaj spravie, nie ŭsie mnie byli znajomyja da pačatku hetaj spravy. Ź niekatorymi ja byŭ znajomy, ź niekatorymi sustrakaŭsia, pra niekatorych čuŭ, ale ŭsio heta štučnaje ŭtvareńnie. Na samoj spravie heta pieraśled za mierkavańnie, za toje, što chtości štości z kimści abmiarkoŭvaŭ. Viadoma, pra sumleńnie ludziej, jakija pačali hetuju spravu, i havorki nijakaj niama», — praciahvaje Alaksandr Dabravolski.
Surazmoŭca ličyć biazhłuździcaj, što siłaviki sami prydumali niejkaje farmavańnie i sami pryznali jaho ekstremisckim.
«Heta absurd, kali kiravacca łohikaj. Kali razumieć, što jość čałaviek, jaki ličyć siabie vyšej za hramadstva, vyšej za dziaržavu, ličyć usich i dziaržavu ŭ tym liku svajoj ułasnaściu, to prosta jasna, što takim ludziam zakony nie pisanyja.
Prosta chaču skazać, što tyja, chto vykonvajuć absalutna niezakonnyja, złačynnyja zahady, taksama pavinny razumieć, što adbyvajecca. Kali jany nie mohuć sabie ŭjavić budučyni biez Łukašenki, tady ja razumieju. A kali mohuć, to niachaj padumajuć, tamu što heta nie prosta parušeńnie zakonaŭ, Kanstytucyi. Pieraśled ludziej za mierkavańnie — heta kryminalnaje złačynstva.
Što da taho, jaki moža być vynik — ciapier nie da zakonaŭ u Biełarusi, pravy ludziej nie abaronienyja. U biaśpiecy siabie nie mohuć utrymać navat tyja, chto źjaŭlajucca prychilnikami Łukašenki — kožny ŭ padobnaj situacyi moža na zaŭtra apynucca», — padkreślivaje Dabravolski.
Pa spravie «analitykaŭ Cichanoŭskaj» prachodzić 20 čałaviek. Heta Alaksandr Dabravolski, Ryhor Astapienia, Filip Bikanaŭ, Juryj Drakachrust, Andrej Kazakievič, Hanna Krasulina, Jaŭhien Kryžanoŭski, Dzianis Kučynski, Vieranika Łapućka, Alaksandr Łahviniec, Hanna Lubakova, Vasil Navumaŭ, Maryja Rohava, Piotr Rudkoŭski, Alesia Rudnik, Natalla Rabavaja, Pavieł Usaŭ, Taćciana Čulickaja, Alaksandr Šłyk, Kaciaryna Šmacina.
Usich abvinavačvajuć u ździajśnieńni «złačynstvaŭ ekstremisckaha charaktaru» ŭ suviazi z kampanijaj pa vybarach Alaksandra Łukašenki, a taksama ŭ postelektaralny pieryjad. Na kožnaha zaviedziena pa piać kryminalnych spravaŭ, u tym liku za «zmovu z metaj zachopu dziaržaŭnaj ułady niekanstytucyjnym šlacham» i «spryjańnie ŭ publičnych zaklikach da zachopu dziaržaŭnaj ułady».
