U praviły hulni ŭ futboł uniesieny siem źmienaŭ — poŭny śpis
2 sakavika mižnarodnaja rada futbolnych asacyjacyj IFAB (arhanizacyja, jakaja zajmajecca rehulavańniem praviłaŭ hulni ŭ futboł) sabrałasia ŭ Abierdzinie i zaćvierdziła niekalki źmien u praviłach. Ničoha radykalnaha, ale pra hetyja rašeńni vam treba viedać, kab nie mocna ździŭlacca, kali budziecie hladzieć futboł u nastupnym siezonie.
sportsman
• Dotyk da miača rukoj hulcom, jaki zabiŭ hoł abo stvaryŭ halavy momant, ciapier ličycca parušeńniem praviłaŭ niezaležna ad taho, była hetaja hulnia naŭmysnaj ci nie. Ciapier fołam ličycca tolki naŭmysnaja hulnia rukoj, traktoŭka zastajecca spravaj arbitra. Pry hetym dla astatnich vypadkaŭ, uklučajučy dotyk da miača rukoj u svajoj štrafnoj, usio budzie pa-raniejšamu.
• Zamienieny hulec pavinien pakinuć pole praź bližejšuju bakavuju liniju. Bolš nie treba iści da centru i abdymacca z tym, chto vychodzić na zamienu. Sens vidavočny — baraćba z zaciažkaj času, asabliva na apošnich chvilinach, kali treniery časta mianiajuć hulca z dalokaj broŭki.
• Hulcy kamandy ataki pry prabićci štrafnych bolš nie mohuć ustavać u ścienku, jakuju vybudoŭvaje ich supiernik. Minimalnaja adlehłaść — mietr. Pry hetym jany mohuć vybudoŭvać svaju ścienku pamiž miačom i ścienkaj supiernika, kab abciažaryć bačnaść bramniku. Meta — paźbiehnuć sutyčak i šturchaniny, skaracić zatrymki hulni.
• Admienienaje praviła, pa jakim pry rozyhryšy ŭdaru ad varot miač pavinien pakinuć štrafnuju płošču da taho, jak jaho zakranie palavy hulec. Heta mocna palehčyć žyćcio kamandam Hvardyjoły — i ŭsim astatnim, chto pačynaje budavać ataki ad svajoj štrafnoj praz karotki pas.
• Pry prabićci pienalci bramnik ciapier moža datykacca linii varot tolki adnoj nahoj. Nieistotna — hetaje praviła ŭsio roŭna nichto nikoli nie vykonvaje.
• Žoŭtyja i čyrvonyja kartki ciapier buduć davać i trenieram — za nieprystojnyja pavodziny i inšyja parušeńni. Ciapier sudździa tych trenieraŭ, jakija jaho asabliva dastali, adpraŭlaje na trybuny žestam i słovami.
• Paśla traplańnia miača ŭ sudździu budzie pryznačacca sprečny miač. Ciapier hulnia ŭ takich vypadkach nie spyniajecca.
