Fiederacyja bijatłona pryviezła na źmienu Domračavaj i Skardzina troch rasijanak FOTY
Fota: vk.com
Try maładyja rasijskija bijatłanistki — Aksana Maskalenka, Kaciaryna Biech i Anastasija Rasskazava — papoŭnili apuścieły skład žanočaj zbornaj Biełarusi, dzie paśla sychodu Darji Domračavaj, Nadziei Skardzina i inšych źjaviłasia šmat vakantnych miescaŭ.
U Rasii z hetaj nahody namieciłasia niezadavolenaść. «Saviecki sport» nazyvaje spartsmienak pierśpiektyŭnymi i ździŭlajecca, jak kiraŭnictva Sajuza bijatłanistaŭ ich adpuściła. Usie troje zajmajucca ŭ Illi Łapuchova. Jaho baćka — Mikałaj Łapuchoŭ — u minułym hodzie byŭ trenieram-kansultantam mužčynskaj zbornaj Biełarusi pa bijatłonie. U traŭni hetaha hoda źjaviłasia infarmacyja, što Łapuchoŭ-starejšy moža ŭznačalić biełaruskich łyžnikaŭ. Pa źviestkach «Sovsporta», Mikałaj Łapuchoŭ datyčny da pierajezdu syna i jaho padapiečnych u Biełaruś.
U Rasii adznačajuć, što nijakaj aficyjnaj zajavy ab zvalnieńni z boku Illi Łapuchova i spartsmienak u SBR nie było ahučana, adnak tam u kursie situacyi i ŭžo abmierkavali mahčymyja miery ŭ adkaz. Spartsmienki ciapier trenirujucca ŭ Raŭbičach, u ich dastatkova času, kab atrymać biełaruskaje hramadzianstva da pačatku novaha siezona. Praviła dvuchhadovaha karancinu moža zakranuć tolki adnu bijatłanistku z troch. Aksana Maskalenka na mižnarodnym uzroŭni nie vystupała, u Kaciaryny Biech karancin zakančvajecca ŭžo ŭ hetym hodzie. A voś Rasskazava jeździła na junijorski Kubak IBU u minułym śniežni. Kali Rasija nie pojdzie nasustrač, to Anastasija moža zastacca biez startaŭ da kanca nastupnaha hoda.
«Pieramovy ab umovach pierachodu jašče majuć adbycca, ale ŭ Maskvie vidavočna nie ŭ zachapleńni ad takoha pavarotu i ŭtojlivych pavodzinaŭ treniera i spartsmienak. Usio ž taki ŭ ich padrychtoŭku byli ŭkładzienyja niemałyja hrošy, a naŭzamien za taki pierachod škoła i rehijon nie atrymajuć ničoha. Mahčyma, budzie pryniata niejkaje rašeńnie, jakoje praduhledžvaje kampiensacyju zatrat z boku spartsmiena», — adznačaje «Saviecki sport».
U Biełaruskaj fiederacyi bijatłonu situacyju nie kamientujuć i adkazvajuć strymana: maŭlaŭ, jak tolki budzie pryniata rašeńnie, jano źjavicca na aficyjnym sajcie. Pry hetym eks-bijatłanist Vadzim Sašuryn jašče paŭtara tydni tamu kazaŭ pra rasijski desant u Raŭbičach.
Što za spartsmienki da nas pryjechali, jakija ŭ ich vyniki, ci zmohuć jany zamianić Domračavu i Skardzina abo stanuć čarhovaj Ilčanka?
Anastasija Rasskazava
Fota: vk.com
Naradziłasia 25 lipienia 1998 hoda ŭ Chabaraŭsku. Majstar sportu, pieramožca i pryzior usierasijskich junijorskich spabornictvaŭ. Na mižnarodnaj arenie pachvalicca asabliva niama čym. Samaje vysokaje miesca na junijorskich čempijanatach śvietu — 25-je ŭ spryncie dva hady tamu. Na etapach junijorskaha Kubka IBU dabirałasia da 16-ha miesca ŭsio ŭ tym ža spryncie. Mienavita hetuju dyscyplinu Anastasija lubić bolš za ŭsio. Praŭda, na darosłym čempijanacie Rasii ŭ hetym hodzie vynik byŭ značna słabiejšy: tolki 55-je miesca ŭ spryncie i 28-je ŭ honcy pieraśledu. Akramia łyžaŭ, patencyjnaja biełaruska lubić čytańnie, viazańnie i vyšyvańnie.
Kaciaryna Biech
Fota: biathlonrus.com
Naradziłasia 19 žniŭnia 1998 hoda ŭ pasiołku Soniečny Chabaraŭskaha kraja. Majstar sportu, pieramožca i pryzior ŭsierasijskich junijorskich spabornictvaŭ. Zaraz znachodzicca na karancinie i nie moža vystupać da 15 śniežnia hetaha hoda. Najlepšy vynik za miažoj — 32-je miesca na maładziožnym Kubku IBU. Jak i Rasskazava, lubić sprynt i viazańnie.
Aksana Maskalenka
Fota: vk.com
Samaja maładaja z hrupy spartsmienak. Aksanie ŭsiaho 18 hadoŭ. Jana naradziłasia 1 studzienia 2000 hoda ŭ padmaskoŭnym Adzincovie. Pakul jašče kandydat u majstry sportu. Ź indyvidualnych dasiahnieńniaŭ — srebra čempijanatu Rasii siarod dziaŭčat. U sakaviku hetaha hoda vyjhrała estafietu ŭ składzie kamandy Maskva-1 na rasijskich mižrehijanalnych spabornictvach. Mižnarodnych startaŭ u karjery Maskalenka pakul nie było.