Skardzina, Kryŭko, Alimbiekava, Domračava: chto jany, alimpijskija čempijonki? FOTY
Biełaruskija bijatłanistki ŭ niejmaviernym styli atrymali pieramohu ŭ estafiecie na Alimpijadzie ŭ karejskim Pchiončchanie. Nichto nie pravaliŭsia na svaim etapie, a Dynara Alimbiekava, jakaja vyklikała najbolšy niepakoj, vystupiła vyšej za ŭsiakija čakańni.
My viedajem Nadzieju Skardzina, Irynu Kryŭko, Dynaru Alimbiekavu i Darju Domračavu jak vydatnych spartsmienak, a chto jany ŭ žyćci? U hetym artykule havorym pra alimpijskich čempijonak z čałaviečaha hledzišča.
Nadzieja Skardzina: maju dźvie radzimy
Nadzia rodam ź Pieciarburha, ale ŭžo daŭno žyvie ŭ Biełarusi. «Ja i ruskaja, i biełaruska, — kaža Nadzieja. — U Biełarusi ludzi niejkija dabrejšyja. Heta ja zaŭvažyła, kali pryjechała ŭ Picier i zajšła tam u mietro. Usie niejkija złyja, zasiarodžanyja. Biełarusy bolš raźniavolenyja».
Vyrasła Skardzina ŭ šmatdzietnaj siamji: u jaje jość dva braty i čatyry siastry. Nadzieja dapamahaje rodnym, čym moža.
Biełaruskaja bijatłanistka adna z samych trapnych u śviecie. Heta pry tym, što jana maje prablemy z vačyma — astyhmatyzm. «Chvaroba ŭźnikła, bo ja časta stralała», — kaža Nadzia. Dziaŭčyna zrabiła apieracyju, ale miedyki nie mohuć abiacać, što chvaroba nie vierniecca.
Rost Nadziei ŭsiaho 160 santymietraŭ — heta adna z samych minijaciurnych bijatłanistak. Na Alimpijadzie ŭ Sočy Nadzieja ŭžo brała bronzu ŭ indyvidualnaj honcy, ciapier budzie mieć i załaty alimpijski miedal.
Što tyčycca asabistaha žyćcia, to Skardzina pakul niezamužniaja.
Iryna Kryŭko: u bijatłon pryjšła, bo zhareŭ dom
Dziaŭčynie 26 hadoŭ, jana rodam ź Sianna, nievialikaha rajcentra na Viciebščynie. Ira kaža, što pajšła ŭ sport praź niaščaście: zhareŭ dom. I siamja pierajechała ŭ internat, jaki znachodzicca pobač z trenirovačnaj bazaj. «Kali b dom nie zhareŭ, to naŭrad ci b pajšła ŭ bijatłon, bo sa staroha miesca chadzić na treniroŭki treba było praz mohiłki», — kaža Kryŭko.
Siamja Iryna zusim nie bahataja. Mama pracuje pamočnicaj vychavacielki ŭ dziciačym sadku, a baćka daŭno syšoŭ ź siamji. Maci Kryŭko pryznavałasia, što kali dzieci pajšli ŭ bijatłon, to joj stała značna praściej: šmat što ŭziała na siabie dziaržava. Brat Iryny — Viktar — taksama bijatłanist, ale takich pośpiechaŭ nie dasiahnuŭ.
Letaś u śniežni Iryna pryznałasia, što joj zrabili prapanovu i ciapier jana chodzić ź piarścionkam. Jaje abrańnik — servismien nacyjanalnaj zbornaj, to bok para zaŭsiody pobač. U toj samy miesiac jana ŭpieršyniu padniałasia na pjedestał etapa Kubka śvietu, uziaŭšy srebra ŭ masstarcie.
Dynara Alimbiekava: u try hady pierajechała ŭ Biełaruś
Samaja maładaja ŭdzielnica našaj kamandy — Dynary ŭsiaho tolki 22 hady. Baćka ŭ Dynary kazachstaniec, i dziaŭčynka sama naradziłasia ŭ Karahandzie. Mama — rasijanka. Kali Dynary było try hady, siamja pierajechała ŭ Biełaruś, u rajcentr Čavusy na Mahiloŭščynie. Mama tam pracuje buchhałtaram, z baćkam dziaŭčyny jana razyšłasia. Jašče jość brat.
Paśla hetaha ŭ Kazachstanie Dynara była ŭsiaho tolki adzin raz — u siem hadoŭ. Vystupać za kazachskuju zbornuju dziaŭčyna nikoli nie maryła. «Mianie ŭsio zadavalniaje ŭ Biełarusi». U bijatłon trapiła, kali było 11 hadoŭ. Na toj momant Alimbiekava ŭžo zajmałasia chareahrafijaj i fartepijana. Płakała i prasiła mamu, kab adpuściła zajmacca sportam. Udałosia ŭhavaryć.
U kamandzie Dynaru pa-dobramu nazyvajuć Dynazaŭrykam — heta ad jaje imia. «Ale ja zusim nie kryvažernaja. Naadvarot, dobraja. Časam navat praźmierna dobraja».
Darja Domračava: hieroj Biełarusi
Pieršaja i pakul adzinaja žančyna, jakaja atrymała hanarovaje zvańnie Hieroja Biełarusi. Heta adbyłosia paśla taho, jak Darja zavajavała adrazu try załatyja miedali na Alimpijadzie ŭ Sočy. Paśla zołata Pchiončchana ŭ Domračavaj stała ahułam čatyry ŭznaharody najvyšejšaj proby. Takim čynam, Darja — samaja tytułavanaja bijatłanistka u historyi Alimpijad.
Darja naradziłasia ŭ Minsku, ale vychoŭvałasia ŭ rasijskaj Niahani Ciumienskaj vobłaści. Kali razvalvaŭsia Sajuz, baćka Dašy Uładzimir pierajechaŭ u Sibir pracavać architektaram. Potym pa jaho inicyjatyvie tudy zaprasili i mamu Łarysu, jakaja stała hałoŭnym architektaram Niahani. U 2004 maci źjechała spačatku ŭ Maskvu, a potym u Biełaruś. Baćka zatrymaŭsia… Jon tak i pamior u Niahani va ŭzroście 54 hadoŭ, nie vytrymała serca. Pachavali jaho ŭ Michnavičach pad Minskam.
Nakont abrańnia krainy, za jakuju źbirałasia vystupać Domračava, sumnievaŭ nie było. Jana zaŭždy chacieła pradstaŭlać tolki Biełaruś. U Darji atrymałasia fantastyčnaja spartyŭnaja karjera, jana maje i alimpijskija załatyja miedali, i čempijonstvy śvietu, i pieramohu ŭ Kubku śvietu.
Asabistaje žyćcio Domračavaj nie tajamnica. Jana zamužam za karalom bijatłona, vialikim narviežcam Ule-Ejnaram Bjorndalenam.
Para žyvie ŭ Aŭstryi, buduje katedž pad Minskam. U Darji i Ule jość dačka Ksienija. Padčas Alimpijady jana zastavałasia z babulaj u Minsku. Mienavita muž byŭ pieršym, chto pabieh vinšavać Domračavu z čarhovym miedalom.
Ciapier dla Domračavaj budzie vyrašalny momant: vyznačyć, ci zaviaršać karjeru, ci praciahvać dalej.
