Tolki dla žančyn. Siem biełarusak atrymajuć pa $3000 na ažyćciaŭleńnie svajoj mary
Pieršy ŭ Biełarusi prajekt, dziakujučy jakomu siem žančyn atrymajuć finansavuju i mientarskuju padtrymku, kab pačać ułasny biznes, «Aktyvija» rychtavała paŭhoda. U druhi dzień viasny jamu narešcie dali start.
Mientary prajekta (sprava naleva): Maryna Viežnaviec, Volha Kardaš, Taćciana Kieža i Taćciana Žałnierčyk.
Ciaham miesiaca ŭłasnyja idei možna nakiroŭvać kampanii praz sajt «Aktyvija». Pakolki hetaja maštabnaja akcyja prachodzić pad słohanam «Žyvi ŭ harmonii z saboj», to idei musiać upisvacca ŭ ahulny kancept i raskryvać patencyjał adnoj ź siami śfier: dyzajn adzieńnia, kino, kandytarskaja sprava, biznes, taniec, fatahrafija abo vyjaŭlenčaje mastactva.
Usie atrymanyja zajaŭki mientary aceniać zavočna i abiaruć pa try najcikaviejšyja i žyćciazdolnyja biznes-idei ŭ kožnaj ź siami śfier. Dalej aŭtarkam najlepšych prajektaŭ treba budzie «pradać» svaje idei ŭžo ŭžyvuju 11 krasavika i prymusić mientaraŭ pavieryć u toje, što ciaham niekalkich miesiacaŭ jany zdolejuć ich ažyćciavić. Arhanizatary papiaredžvajuć, što atrymać hrošy i pakłaści prajekt u stoł nie atrymajecca. Hranty daduć na realnyja pierśpiektyŭnyja prajekty, zdolnyja vyraści ŭ paśpiachovy biznes.
Sprava naleva: Alaksandra Butar, Maryna Viežnaviec, Volha Kardaš, Taćciana Kieža i Taćciana Žałnierčyk.
Mientary prajekta — paśpiachovyja žančyny, jakija ŭžo ažyćciavili svaje mary i ciapier hatovyja dzialicca dośviedam i dapamahać inšym zmahacca za svajo ščaście. «Vieści» biełarusak da pośpiechu buduć:
- Alaksandra Butar, režysior
- Maryna Viežnaviec, pryma-balaryna Vialikaha teatra i stvaralnica ŭłasnaj baletnaj škoły
- fashion-fatohraf Taćciana Kieža, čyje zdymki trapili ŭ top-100 najlepšych fota Vogue-2016
- Volha Kardaš, dyzajnierka adzieńnia i stałaja ŭdzielnica Belarus Fashion Week
- Taćciana Žałnierčyk, stvaralnica francuzskaj kandytarskaj Moulin u Minsku
- Iryna Sotnikava, ułaśnica kansałtynhavaj kampanii «Tut i Ciapier»
- Hanna Čystasierdava, suzasnavalnica Halerei «Ŭ»
Paśla taho, jak vyznačać siem pieramožcaŭ, jany atrymajuć pa 5500 rubloŭ [biez uliku vypłaty padatkaŭ]. Dalej u ich budzie dva miesiacy na toje, kab mara pierastała być prosta maraj. I mientary buduć uvažliva sačyć za hetym šlacham.
Brend-markiecinh-mieniedžarka «Aktyvii» ŭ Biełarusi Alaksandra Charolskaja i ŭłaśnica kansałtynhavaj kampanii «Tut i Ciapier» Iryna Sotnikava.
Padčas abjaŭleńnia startu kampanii, adna ź mientaraŭ, ułaśnica kansałtynhavaj kampanii Iryna Sotnikava, patłumačyła, čamu jana padtrymała hetuju inicyjatyvu.
«Apošnija hadoŭ 15 ja naziraju, što ŭ hramadstvie źjaŭlajecca šmat tendencyj, jakija tłumačać žančynie, što jana pavinna rabić. Što jana musić być dobraj maci, dobraj žonkaj. Ja ź vialikaj pavahaj staŭlusia da žančyn, jakija śviadoma abirajuć dla siabie być tolki maci, być tolki žonkaj, zachoŭvać ačah i ŭ hetym być ščaślivaj, — kaža spadarynia Iryna. — Ale vielmi časta heta nie śviadomy vybar, a zrobleny pad naciskam źniešniaha asiarodździa. Maŭlaŭ, «ty pavinna», «ty musiš». I žančyny, jakija abirajuć zastavacca doma pad ciskam svajho mužčyny albo hramadskaha mierkavańnia, časta, u rešcie rešt, nie adčuvajuć siabie ščaślivymi. Tamu ja za ŭsio toje, što dazvalaje žančynie rabić svabodny vybar i prymać samastojna rašeńnie, jak joj rasparadzicca svaim žyćciom».
Iryna zaŭvažaje, što samaje składanaje — zrabić pieršy krok. Dalej užo nie budzie kudy dziavacca, elektryčka pačnie nabirać abaroty i daviadziecca paśpiavać.
Śviatłana Baroŭskaja.
Pasprabavać ažyćciavić svaju maru zaklikała i televiadoŭca Śviatłana Baroŭskaja. Adnak jana papiaredziła: samaje hałoŭnaje — upeŭnicca, što vy robicie toje, što atrymlivajecca najlepš.
«Šanoŭnyja dziaŭčaty, kali vy dakładna dobra katajeciesia na łyžach, vy pavinny iści ŭ łyžny sport. Ale vy ŭpeŭnieny, što toje, što vy chočacie rabić, najlepšaje z taho, što vy možacie rabić? — pytajecca Śviatłana. — Kaliści ja dakładna zrazumieła: niahledziačy na toje, što vučyłasia ŭ teatralnym instytucie, artystka ja tak sabie, kali havorka idzie pra kino ci teatr. Tamu što tam ja pakazvaju kahości. Dva viadomyja režysiory kaliści skazali mnie: «Kali ty, Śvieta Baroŭskaja, u telebačańni, ty nie chłusiš. Ciabie možna lubić, nienavidzieć, ty možaš razdražniać, ale abyjakavych ludziej da ciabie niama». I ja dakładna viedaju, što znachodžusia na svaim miescy. Tamu vam dakładna treba zrazumieć, što vy dakładna idziacie pa svajoj biehavoj darožcy».
